Judg 10 | BxrBBL2024 | STEP | Абимээлэхэй алуулһанай һүүлдэ израильшуудые абархын тула Иссахаарай үеын Пуһаагай хүбүүн Толаа ударидагша болобо. Тэрэ Пуһаа Додоогой аша мүн. Тэрэ Эпрааимай уг удамуудай байдаг хадалиг газарай Шамиир хотодо ажаһуугаа.

‏ Judges 10

Зарга шүүгшэ Толаа

1 Абимээлэхэй алуулһанай һүүлдэ израильшуудые абархын тула Иссахаарай үеын Пуһаагай хүбүүн Толаа ударидагша болобо. Тэрэ Пуһаа Додоогой аша мүн. Тэрэ Эпрааимай уг удамуудай байдаг хадалиг газарай Шамиир хотодо ажаһуугаа. 2 Тэрэ хорин гурбан жэл соо Израилиин ударидагша байба. Тэрэнэй наһа барахадань, тэрэниие Шамиир хотодо хүдөөлүүлбэ.

Зарга шүүгшэ Яһиир

3 Толаагай үхэһэнэй һүүлдэ Галаад хотын Яһиир ударидагша болобо. Тэрэ хорин хоёр жэл соо Израилиин ударидагша байһан юм. 4 Яһиир гушан хүбүүтэй, унадаг унаагай гушан элжэгэтэй байгаа. Тэдэнэр Галаадай газар дээрэ гушан хототой байба. Тэдэниие Яһиирай хотонууд гэжэ мүнөөшье болотор нэрлэдэг. 5 Яһиирай наһа барахадань, тэрэниие Камоондо хүдөөлүүлбэ.

Израильшууд Эзэндэ дахин шүтэдэг болобо

6 Израильшууд Эзэндэ дахин муу юумэ үйлэдэжэ, хуурмаг бурханууд Баалда, Аштаартуудта болон араамшуудай, сидоонуудай, моһаабуудай, аммоонуудай, пилиштүүдэй бурхануудта шүтэн мүргэжэ эхилбэ. Тиихэлээрээ тэдэнэр Эзэнээ орхижо, Тэрээндэ шүтэн мүргэхэеэ болибо. 7 Тиихэдэнь Эзэн израильшуудта сухалдажа, тэдэниие пилиштүүдэй болон аммоонуудай гарта үгэбэ. 8 Тэрэ жэлһээ эхилжэ найман жэл соо тэдэнэр Иордан мүрэнэй зүүн эрьеһээ саашанхи эмооршуудай Галаад нютагта ажаһууһан израильшуудые хашан дарлаба. 9 Аммоонууд Иордан мүрэн гаталаад, Иудын, Бэньямиинэй болон Эпрааимай обогуудай урдаһаа эсэргүүсэн дайлалдахаяа ошобо. Израильшууд тон ехэ дарлалтада орожо доройтобо.

10 Тиихэдээ израильшууд Эзэндэ иигэжэ хашхаралдаба:

– Бидэ Танда эсэргүүсэжэ, нүгэл хээбди. Бидэ өөһэдынгөө Бурхан орхёод, Баалай бурханда шүтэн мүргөөбди.

11 Эзэн израильшуудта иигэжэ айладаба:

– Таанад египедүүдтэ, эмооршуудта, аммоонуудта, пилиштүүдтэ, 12 сидоонуудта, амалээгүүдтэ болон моһаабуудта харшалуулан дарлуулбат. Таанадай Намда хашхаралдан гуйхада, Би таанадые тэдэнэй гарһаа абараагүй аалби? 13 Таанад Намайе орхёод, ондоо бурхануудта шүтэн мүргөөт. Би таанадые дахин абархагүйб. 14 Таанад шэлэжэ абагша өөһэдынгөө бурхануудта ошоод, тэдээнһээ туһа эрин хашхаралдагты. Тэдэнэр таанадые харшалта болон дарлалтаһаа гаргаг лэ.

15 Израильшууд Эзэндэ иигэжэ хэлэбэ:

– Танай урда бидэнэр нүгэл хээбди. Та бидэнтэй дураараа болооройт, теэд Та мүнөө гансал бидэниие аршалжа хайрлыт!

16 Тэдэнэр үнэнхэ зүрхэнһөө хариин бүхы бурхануудые буруушаажа, Эзэндэ шүтэжэ эхилбэ. Тиихэдэнь Эзэн тэдэнэй зобохо тулихыень хараад, тэдэниие хайрлаба.

Удамаршые бэдэрһэн тухай

17 Аммоонууд дайлалдахаяа суглараад, Галаадай газар дээрэ өөһэдынгөө майхан хүреэн татажа байрлаба. Израильшууд сэрэгээ суглуулаад, Мицпаа хотодо байрлаба.

18 Галаадай сэрэгшэд болон ударидагшад бэе бэедээ иигэжэ хэлэбэд: «Аммоонуудтай дайлалдахада хэн бидэниие дахуулхаб? Тэрэ Галаадай бүхы зоной ударидагша болохо».