Judg 12 | BxrBBL2024 | STEP | Эпрааимай угай сэрэгшэд Цапоон хото ерэбэ. – Намтай хамта ябагты гэжэ ши бидэниие дуудангүйгөөр юундэ аммоонуудтай дайлалдахаяа ошообши? Бидэнэр шамайе гэртэйш хамта шатаахамнай,

‏ Judges 12

Иптаа ба Эпрааим

1 Эпрааимай угай сэрэгшэд Цапоон хото ерэбэ.

– Намтай хамта ябагты гэжэ ши бидэниие дуудангүйгөөр юундэ аммоонуудтай дайлалдахаяа ошообши? Бидэнэр шамайе гэртэйш хамта шатаахамнай, – гэжэ Иптаада хэлэбэ.

2 Иптаа тэдээндэ иигэжэ хэлэбэ:

– Би болон минии арад аммоонуудтай аргагүй ехэ хэрэлдээтэй байгаабди. Би таанадые дуудааб. Теэд таанад намайе тэрэнэй гарһаа абаржа шадахагүй байгаат. 3 Таанад намайе абархагүй гэжэ һанаад, ами наһандам аюултайшье һаань, мүрэн гаталжа, аммоонуудтай тулалдааб. Эзэн тэдэниие минии гарта дамжуулан үгөө. Мүнөө таанад намтай юундэ дайлалдахаяа ерээбта?

4 Иптаа Эпрааимай обогойнхидые үй бута сохимсоороо, Галаадта ажаһуудаг бүхы эрэшүүлыень суглуулаад, тэдээндэ иигэжэ хэлэбэ:

– Таанад Эпрааимай угайнь оргодолнууд гээшэт. Таанад өөһэдын газар үгыт. Таанадай заримашуул Эпрааимайшье болон Мэнашшээгэйшье угайхид болоно.

5 Галаадай уг удамууд Иордан мүрэн гаталдаг бүхы гарсануудые эзэмдэн абаба. «Мүрэн гаталхыемни намда зүбшөөгыш», – гэжэ Эпрааимай угһаа хэзээ нэгэтэ тэрьедэһэн оргодолнуудай хэн нэгэнэйнь гуйхада, галаадайхид тэрээнһээ иигэжэ асуудаг байба: «Ши Эпрааимай угай гүш?» «Үгы», – гэжэ тэрэнэй харюусахадань: 6 «„Шибболет“гэжэ хэлэл даа», – гэжэ тэдэнэр тэрэниие баадхадаг байба.

Эпрааимай угай хүнүүд энэ үгэ хэлэжэ шадахагүй һэн тула «сибболет» гэдэг байба. Тиигэжэ галаадайхид Эпрааим угайхидые мэдэдэг болоод, Иордан гаталдаг гарсануудай дэргэдэ тэдэниие хадхажа аладаг болобо.

Тиихэдэ тэдэнэр Эпрааимай угай дүшэн хоёр мянган хүнүүдые алаһан юм.

7 Иптаа зургаан жэл соо Израилиин ударидагша байба. Һүүлдэнь Галаад угай Иптаагай наһа барахадань, Галаадай хотонуудай нэгэндэ тэрэниие хүдөөлүүлһэн юм.

Хэшбоон ударидагша болобо

8 Иптаагай наһа барахадань, Бэтлэһээм хотын Хэшбоон Израилиин ударидагша болобо. 9 Тэрэ гушан хүбүүтэй, гушан басагатай байгаа. Тэрэ өөрынгөө басагадые түрэл бэшэ эрэшүүлдэ хадамда үгэбэ, өөрынгөө хүбүүдтэ түрэлнүүдэйнгээ басагадые һамга абхуулба. 10 Тиигээд Хэшбоон наһа бараба. Тэрэниие Бэтлэһээм хотодо хүдөөлүүлбэ.

Элоон ударидагша болобо

11 Хэшбооной наһа барахадань, Зэбүлүүнэй обогой Элоон Израилиин ударидагша болобо. Тэрэ арбан жэл соо израильшуудые ударидаба.

12 Тиигээд Зэбүлүүнэй обогой Элоон наһа бараба. Тэрэниие Зэбүлүүнэй харьяата газарай Аялоондо хүдөөлүүлбэ.

Абдоон ударидагша болобо

13 Элооной наһа барахадань, Пиратоон хотын Һиллээлэй хүбүүн Абдоон Израилиин ударидагша болобо. 14 Абдооной дүшэн хүбүүд, гушан ашанар далан элжэгэнүүдые унадаг байгаа. Тэрэ найман жэл соо Израилиин ударидагша байба.

15 Тиигээд Пиратоон хотын Һиллээлэй хүбүүн Абдоон наһа бараба. Тэрэниие амалээгүүдэй ажаһуудаг хада дээрэ, Эпрааим угай харьяата газар дээрэхи Пиратоон хотодо хүдөөлүүлбэ.