‏ Judges 13

Самсоон түрэбэ

1Израильшууд Эзэндэ дахин муу юумэ хэжэ эхилбэ. Тиихэдэнь Эзэн тэдэниие дүшэн жэл соо пилиштүүдэй гарта тушааба.

2Тэрэ сагта Цораа хотодо түрэһэн Даанай угһаа гарбалтай Манооһаа гэжэ нэрэтэй хүн ажаһууба. Һамганайнь түрэдэггүй байһан тула тэрэ үхибүүдгүй байгаа.

3Эзэнэй Эльгээмэл Манооһаагай һамганай урда бии болоод, тэрээндэ иигэжэ айладаба:

– Ши үхибүүтэй болодоггүй байнаш, харин мүнөө хээлитэй боложо, хүбүү түрэхэш. 4Тиихэдээ болгоомжолжо, үзэмэй дараһан архи болон шара ундаа бү уу, бузартай эдеэ хоол бү эди. 5Үхибүүнэйнгээ үһыень бү хайшала. Юундэб гэхэдэ, нарайлха нялхашни умай сооһоо өөрыгөө Эзэндэ зорюулан үгэнхэй юм. Таанадай энэ хүбүүн израильшуудые пилиштүүдэй гарһаа абаран аршалжа эхилхэ.

6Тэрэ эхэнэр өөрынгөө үбгэндэ гүйжэ ерээд, иигэжэ хэлэбэ:

– Бурханай хүн намда ерээл. Тэрэнэй шарайнь аймшагтай байба. Би тэрэнэй хаанаһаа ерэһые һураагүйб. Тэрэ намда нэрэеэшье хэлээгүйл. 7Бурханай тэрэ хүн намда иигэжэ хэлээ юм: «Хээлитэй болобош, хүбүү түрэхэдөө, үзэмэй дараһан архи болон һогтоодог шара ундаа бү уу, бузартай эдеэ хоол бү эди. Ушар юуб гэхэдэ, нарайлха нялхашни умай сооһоо наһалха наһанайнгаа эсэс хүрэтэр өөрыгөө Эзэндэ зорюулан үгөө».

8Манооһаа Эзэндэ зальбараад, иигэжэ хэлэбэ:

– Эзэн минии! Танай эльгээһэн Бурханай хүн дахин бидэндэ ерэг лэ! Түрэхэеэ байһан үхибүүнэй томо болотор юу хэбэл дээрэб гэжэ бидэниие һургаг лэ.

9Эзэн Манооһаагай хэлэхые дуулаба. Эзэнэй Эльгээмэл дахин тэрэ эхэнэртэ ерэбэ. Тиихэдэнь тэрэнэй хажуудань Манооһаа үгы, харин тэрэ эхэнэр ори гансааран таряаланайнгаа талмай дээрэ байба.

10Үнөөхи эхэнэр үбгэндөө гүйжэ ерээд, тэрээндэ иигэжэ хэлэбэ:

– Үсэгэлдэр ерэгшэ Бурханай хүн дахин намдаш ерээл!

11Манооһаа бодоод, һамгаяа дахажа, таряаланайнгаа талмайда ошоод, тэрэ хүнһөө иигэжэ һураба:

– Минии һамгантай хөөрэлдэһэн хүн ши болоно гүш?

– Билби даа, – гэжэ Эзэнэй Эльгээмэл харюусаба.

12Тиихэдэнь Манооһаа тэрээнһээ иигэжэ һураба:

– Хэлэһэн үгыншни бэелүүлэгдэхэдэ, манай хүбүүн яажа ажаһууха болоноб? Тэрэмнай юу хэхэ ёһотойб?

13Эзэнэй Эльгээмэл тэрээндэ иигэжэ харюусаба:

– Минии хэлэһэн тэдэ бүхы юумэнүүдһээ һамганшни һэргылэг. 14Уһан үзэмэй эшэһээ гараһан бүхы юумэнүүдые бү эдиг, үзэмэй дараһан архи болон һогтоодог шара ундаа бү ууг, бузартажа муу болоһон эдеэ хоол бү эдиг. Шинии һамган Минии хориһон эдэ бүхы юумэнүүдһээ сээрлэг.

15Тиихэдэнь Манооһаа Эзэнэй Эльгээмэлые иигэжэ гуйба:

– Бидэнэй эшэгэ шанаад асартар ши намайе эндээ хүлеэгыш даа.

16Эзэнэй Эльгээмэл тэрээндэ иигэжэ айладаба:

– Шамайе би хэды хүлеэгөөшье һаа, шанаад асарһан эдеэ хоолыешни эдихэгүйб. Хэрбэеэ тэрэнээ Эзэндэ үргэхэ гэбэл, ши тэрэнээ түгэс шатаалта үргэлдэ үргөөрэй.

Манооһаа тэрэ хүниие Эзэнэй Эльгээмэл гэжэ мэдэбэгүй.

17Манооһаа Эзэнэй Эльгээмэлһээ иигэжэ асууба:

– Шинии хэлэһэн үгын бэелүүлэгдэхэдэ, бидэнэр шамайе магтан алдаршуулха гэнэбди. Тиимэһээ ши бидэндэ өөрынгөө нэрые хэлэжэ хайрлыш.

18Эзэнэй Эльгээмэл Манооһаада иигэжэ айладаба:

– Ши юундэ минии нэрые һурабаш? Минии нэрэ юрэ бусын юм.

19Манооһаа шанаһан эшэгэеэ болон хилээмэн үргэлнүүдээ асаржа, Эзэндэ үргэхэеэ шулуун дээрэ табиба. 20Үргэлэй шэрээһээ галай дүлэн огторгой өөдэ дэгдэбэ. Тиихэдэнь Эзэнэй Эльгээмэл тэрэ дүлэнтэй хамта дэгдэлсэбэ. Манооһаа ба тэрэнэй һамган эдэ бүгэдые хараад, нюураараа газар дэрлэн унажа, Тэрээндэ зальбаршабад.

21Эзэнэй Эльгээмэл дахин харагдабагүй. Тиихэдэнь Манооһаа тэрэниие Эзэнэй Эльгээмэл байба гэжэ мэдэбэ.

22Манооһаа ухаа алдажа, өөрынгөө һамганда иигэжэ хэлэбэ:

– Бидэ Бурханиие хараһан тула үхэхэмнайл!

23Теэд һамганиинь үбгэндөө иигэжэ хэлэбэ:

– Хэрбэеэ Эзэн бидэниие алаха гэбэл, Тэрэ бидэнэй гарһаа түгэс шатаалта ба хилээмэн үргэлнүүдые абахагүй, бидэндэ эдэ бүгэдые харуулха, хэлэхэ үгы байгаал!

24Үнөөхи эхэнэр хүбүү түрөөд, тэрээндээ Самсоон гэжэ нэрэ үгэбэ. Самсоон томо болобо. Эзэн тэрэниие адислаба. 25Цораа болон Эштаһоол хоёрой хоорондо оршодог Маханээ-Даан хотодо Самсооной ажаһуухадань, Эзэнэй Һүлдэ тэрэнэй толгой дээрэ буужа, ажал ябуулгыень эрхилүүлсэжэ эхилбэ.