Judg 17 | BxrBBL2024 | STEP | Эпрааим угайхидай ажаһуудаг хадалиг орон нютагта Михаа гэжэ нэрэтэй хүн байба.

‏ Judges 17

Михаагай бурхануудай дүрсэ хүрэгүүд

1 Эпрааим угайхидай ажаһуудаг хадалиг орон нютагта Михаа гэжэ нэрэтэй хүн байба. 2 Михаа өөрынгөө эхэдэ иигэжэ хэлэбэ:

– Шинии мянга нэгэ зуун шээкэл мүнгэнэй үгы болоходонь, ши минии хажууда ерээд, хараалай муу хараалаар хараагаа бэлэйш. Тэдэ мүнгэншни намда байна. Би хулуугааб.

– Минии хүбүүн, Эзэн шамайе адислаха болтогой! – гэжэ тэрээндэ эхэнь хэлэбэ.

3 Михаа өөрынгөө эхэдэ мянга нэгэ зуун шээкэл мүнгэ бусааба. Тиихэдэнь эхэнь хүбүүндээ иигэжэ хэлэбэ:

– Би энэ мүнгөө арюудхажа, хүбүүнэйнгөө түлөө Эзэндэ зорюулан үргэнэб. Энэ мүнгөөрни шабар болон шудхамал бурхануудай дүрсэнүүдые бүтээг.

4 Михаа өөрынгөө эхэдэ тэдэ мүнгыень бусааба. Тэрэнэй эхэ хоёр зуун шээкэл мүнгэ абаад, тэдэнээ мүнгэшэ дарханда үгэбэ. Мүнгэшэ дархан шабараар болон мүнгэ шудхажа бурхануудай дүрсэнүүдые бүтээгээд, тэдэнээ Михаагай гэр соо табиба.

5 Михаа бурхануудай дүрсэнүүдтэ һүгэдэн мүргэдэг гэртэй болобо. Тэрэ эфод болон терафим ^{▼▼ Эфод болон терафим – эндэ иигэжэ шажанай шүтөөнэй ямар нэгэн зүйлнүүд нэрлэгдэнэ.} хэжэ, хүбүүдэйнгөө нэгэндэ һахил хүртөөлгөөд, тэрэниие өөрынгөө санаарта болгобо.

6 Тэрэ сагта Израильда хаанай үгы байһан тула хүн бүхэн зүб гэжэ һанаһан лэ юумэеэ хэдэг байба.

7 Эгээл тэрэ үедэ Иудын Бэтлэһээм хотодо Иудын обогой залуу левит хүбүүн ажаһууба. 8 Ажамидархын тула хамаагүй хаанашье тогтон байрлахаб гэжэ тэрэ залуу хүбүүн сэдьхээд, Бэтлэһээмһээ гаража ошобо. Тэрэ яба ябаһаар Эпрааимай уг удамуудай ажаһуудаг хадалиг орон нютагта байһан Михаагай гэртэ ерэбэ.

9 – Ши хаанаһаа ерэбэш? – гэжэ Михаа тэрээнһээ һураба.

– Би Иудын Бэтлэһээмһээ уг гарбалтай левит хүнби, хоолойгоо тэжээхэ, ажамидарха газар бэдэрнэб, – гэжэ залуу хүбүүн харюусаба.

10 – Манайда байгыш даа. Ши минии эсэгэ ба санаарта боло. Би жэл бүхэндэ шамда арбан шээкэл мүнгэ үгэхэб, хубсаһа болон эдеэ хоолоор хангахаб, – гэжэ Михаа тэрээндэ дурадхаба.

11 Залуу левит хүбүүн зүбшөөжэ, Михаагай гэртэ байжа, тэрэнэй түрэһэн хүбүүн шэнги болобо.

12 Михаа залуу хүбүүндэ һахил хүртүүлжэ, өөрынгөө санаарта болгобо.

13 – Минии гэртэ левит хүбүүнэй санаарта болоходонь, мүнөө Эзэн намда туһалха гэжэ би найданаб, – гэжэ Михаа хэлэбэ.