‏ Judges 20

Израильшуудай болон Бэньямиинуудай хоорондохи дайн

1Даанһаа Бэһээр-Шээбэ хүрэтэр ажаһуудаг израильшууд болон Галаадта ажаһуугшад бултадаа нютаг нютагһаа гаража, Мицпаадахи Эзэнэй гэрэй урда сугларбад. 2Тэндэ Израилиин бүхы обогуудай болон бүхы үенүүдэйнь ударидагшад байба. Тэндэ Эзэнэй шэлэһэн арад болон элдэеэ шагтагалан бүһэлһэн дүрбэн зуу мянган сэрэгшэд сугларба. 3Мицпаада израильшууд сугларба гэжэ Бэньямиинэй угай зон дуулаба.

– Ямар ушарһаа энэ муухай үйлэ хэрэг хэгдээб гэжэ хэлыт? – гэжэ израильшуудай ударидагшад асуубад.

4Алуулагша эхэнэрэй үбгэн болохо үнөөхи левит тэдээндэ иигэжэ хэлэбэ:

– Би баряанайнгаа эхэнэртэй хамта Бэньямиинэй Гибаа хотодо хонохоёо ерээ бэлэйб. 5Гибаагай эрэшүүл намда эсэргүүсэн бодожо, хоножо байһан гэрыемни тойрон хүреэлөө һэн. Тэдэнэр намайе алаха зорилготой байгаа. Тэдэнэр минии баряанай эхэнэрые хүсөөрөө эдлэжэ зобоогоод алаа. 6Би баряанайнгаа эхэнэрые хэсэгүүд болгожо отолоод, тэдэнээ нэгэ нэгээр израильшуудай эзэмдэжэ байһан бүхы орон нютагуудта тараажа эльгээгээб. Ушар юуб гэхэдэ, Бэньямиинэйхид Израильда хуули буса ба эшхэбтэр үйлэ хэрэг хэбэ бшуу. 7Мүнөө таанад, израильшууд, энэ үйлэ хэрэг зүбшэжэ, яаха хээхэеэ хэлсэгты!

8Тэдэнэр бултадаа нэгэ хүн мэтээр иимэ шиидхэбэри гаргабад: «Бидэнэй нэгэншье өөрынгөө майханда бү ошог! Бидэнэй хэншье өөрынгөө гэртэ бү бусаг! 9Мүнөө бидэнэр жээрэб хаяжа, Гибаада добтолходо болохо гү, али үгы гү гэжэ мэдэебди. 10Бидэ Израилиин обог бүхэнэй зуун хүнһөө арбан хүниие, мянган хүнһөө зуун хүниие, арба мянган хүнһөө мянган хүниие шэлэжэ абаябди. Тэдэнэр Израильда хорото муухай үйлэ хэрэг хэгшэдые хэһээхэеэ Бэньямиинэй Гээбэ хотодо добтолхоёо ошоһон сэрэгшэдтэ эдеэ хоол асаржа байг! Манай сэрэг Бэньямиинэй газар дээрэхи Гээбэ ошожо, энэ муухай үйлэ хэрэгэйнь түлөө тэдэнһээ үһөөгөө абаг!»

11Тиигээд Израилиин сэрэгшэд Гибаада добтолхоёо хажуудань ошобо. 12Израилиин обогуудай болон үенүүдэйнь ударидагшад хандалга бэшэгтэйгээр элшэдээ Бэньямиинэй бүхы үенүүдтэ эльгээбэ. Тэрэ хандалга бэшэг соонь иигэжэ бэшээтэй байба: «Таанад ямар муухай үйлэ хэрэг хэбэ гээшэбта? 13Таанад хэрэгээ дүүрэһэн яндан бүхы эрэшүүлые Гибаа хотоһоо барижа, бидэндэ үгэгты. Бидэнэр тэдэниие алажа, хорото муухай ябадал Израильһаа зайсуулхамнай!»

Теэд Бэньямиинэй обогой сэрэгшэд Израилиин сэрэгшэдэй, өөһэдынгөө аха дүүнэрэй үгыень дуулабагүй. 14Тиигээд тэдэнэр өөһэдынгөө хотонуудые орхижо, Израилиин сэрэгшэдтэй дайлалдахаяа Гибаа хотодо сугларбад. 15Тэрэ үдэр бусад хотонуудһаа Гибаада сугларһан Бэньямиинэй обогойхиной элдэеэ хуйһаань һугалжа шадаха сэрэгшэдэй тоо хорин зургаа мянган эрэшүүл болобо. Тэдээнһээ гадуур Гибаа хотодо ажаһуугшад өөһэдынгөө долоон зуун шэлэгдэмэл сэрэгшэдые израильшуудай урдаһаа эльгээбэ. 16Тэдэ долоон зуун шэлэгдэмэл сэрэгшэд бултадаа һалгайбша ба һур бэһээр шулуу шэдэхэдээ, хилгааһа алдангүй тудадаг байбад.

17Бэньямиинэй обогой сэрэгшэдһээ гадуур израильшуудай дүрбэ мянган сэрэгшэд тэндэ сугларба. Тэдэ сэрэгшэд элдэеэ хуйһаань һугалжа шадаха, дайшалхы дүй дүршэлтэй байбад.

18Израильшууд бодожо, Бэт-Ээлдэ ерээд, Бурханһаа иигэжэ һураба:

– Бидэнэй хэн эгээн түрүүн Бэньямиинэй угайхидтай дайлалдахаяа ошохоб?

Эзэн тэдээндэ иигэжэ хэлэбэ:

– Иуда эгээн түрүүн ябаха.

19Үглөө үглөөгүүрынь израильшууд бодоод, Гибаагай хажууда сэрэгэйнгээ майхан хүреэн татажа байрлаба.

20Тэдэнэр Бэньямиинэй угай сэрэгшэдэй урдаһаа сэрэгээ абаашажа жагсаалда зогсоолгоод, Гибаагай хажууда тэдэнтэй дайлалдахаар бэлэн болобод. 21Бэньямиинэй угай сэрэгшэд израильшуудтай дайлалдахаяа Гибааһаа гарабад. Тэдэнэр тэрэ үдэр хорин хоёр мянган израильшуудые алаба.

22Израильшууд урда үдэрынь тогтон байрлаһан газартаа бусажа ерээд, тэдэнтэй дахин дайлалдахаяа бэлдэбэд. 23Тэдэнэр үдэшэ болотор уйлалдабад. Тиигээд тэдэнэр Эзэнһээ иигэжэ асуубад:

– Бидэнэр өөһэдынгөө аха дүүнэр болохо Бэньямиинэй угайхидтай дахин дайлалдахамнай гү, али яахамнайб?

Эзэн тэдэндэ иигэжэ харюусаба:

– Урагшаа! Тэдэнтэй дайлалдагты!

24Хоёрдохи үдэр израильшууд Бэньямиинэй угай сэрэгшэдтэй дайлалдахаяа тэдээндэ дүтэлбэд. 25Тэрэ үдэр Бэньямиинэй угай сэрэгшэд Гибааһаа добтолон гарабад. Тиихэдээ тэдэнэр энэ удаа израильшуудай элдэтэй арбан найма мянган сэрэгшэдые алабад.

26Тиихэдэнь израильшуудай бүхы сэрэг Бэт-Ээл хото ошобо. Тэдэнэр тэндэ үдэшэ болотор масаглажа, һүмын тахилай шэрээгэй урда уйлалдаад, Эзэндэ түгэс шатаалта болон амгалан байдалай түлөө үргэлнүүдые үргэбэд.

27Тиихэдэ Эзэнтэй баталһан хэлсээнэй ханза Бэт-Ээлдэ байба.

28Эгээл тэрэ һүмэ соо Эльазаарай хүбүүн Пинэһаас алба хэдэг байгаа. (Тэрэнэй эсэгэ Эльазаар Аһарооной хүбүүн юм.)

Израильшууд Пинэһаасаар дамжуулжа, Эзэнһээ иигэжэ һурабад:

– Бидэнэр өөһэдынгөө аха дүүнэр болохо Бэньямиинэй угай сэрэгшэдтэй дахин дайлалдахамнай гү, али үгы гү?

Эзэн иигэжэ айладаба:

– Урагшаа! Би үглөөгүүр тэдэниие таанадай гарта дамжуулан үгэхэб.

29Израильшууд Гибаа хотые хүреэлэн тойрожо, тэдэниие отон һуубад.

30Гурбадахи үдэр израильшууд Бэньямиинэй угай сэрэгшэдтэ добтолбод. Тиихэдээ тэдэнэр урдынхидаал адляар дайшалхы жагсаалаар жэрылдэжэ, Гибаада дүтэлбэд.

31Бэньямиинэй угай сэрэгшэд урдынхидаал адляар израильшуудые хюдажа, Бэт-Ээл Гибаа хоёрые холбоһон харгын ута руу намнабад. Тиихэдээ тэдэнэр гушаад израильшуудые алабад.

32Бэньямиинэй угай сэрэгшэд иигэжэ сэдьхэнэд: «Бидэнэр эдэниие урдынхи мэтээр алахабди».

Тиихэдэнь израильшууд тэрьедэн зугадааша боложо, дайсадтаа харгыгаар намнуулжа, хотоһоонь холо абаашаха гэжэ сэдьхэбэд.

33Бааһал-Тамаарта дайсадаа отон һууһан израильшууд хоргодоһон газарнуудһаа гаража, добтолгондо оробод. Мүн Гээбын баруун талада бэеэ нюужа хоргодоһон израильшууд дайсадтаяа тулалдахаяа нуугаһаа бодобод. 34Израильшуудай арба мянган шэлэгдэмэл сэрэгшэд Гибаа руу добтолон ошобод. Айхабтар шэрүүн тулалдаан болобо. Теэд Бэньямиинэй угай сэрэгшэд гай тодхорто орожо байһанаа ойлгобогүйд.

35Бэньямиинэй угай сэрэг үй бута сохюулаг гэжэ Эзэн үршөөл хайраяа израильшуудта заяаба. Тэрэ үдэр израильшууд дайшалхы һайн бэлэдхэлтэй Бэньямиинэй угайнь сэрэгшэдэй хорин таба мянга нэгэ зуун хүнииень алабад. 36Бэньямиинэй угай сэрэгшэд израильшуудта диилдэжэ байһанаа ойлгобод. Израильшууд Гибаа хотын хажууда бэеэ нюужа хоргодоһон сэрэгшэдэйнгээ гэнтэ добтолгондо найдажа, зорюута гэдэргээ сухариһан байба. Бэньямиинэй угай сэрэгшэд эзэлжэ абаһан газараа тэдээндэ алдабад. 37Нуугада хоргодоод һууһан израильшууд гэнтэ хүл дээрээ бодожо, эршэмтэйгээр добтолон, Гибаа хото соо орожо, һэлмээрээ тэндэхи бүхы зонииень алабад. 38Тиигээд тэдэнэр тэрэ хото соо утаа башхуулан огторгой өөдэ дэгдээжэ, зорюута сухариһан сэрэгшэдтээ добтолгондо дахин орохо дохёо тэмдэг үгэбэд.

39– 40– 41Бэньямиинэй угай сэрэгшэд израильшуудые намнажа, гушан сэрэгшэдыень алахадаа: «Түрүүшын тулалдаандал адляар эдэниие диилэжэ байнабди», – гэжэ сэдьхэбэд. Теэд өөһэдынгөө хото сооһоо баглагар хара утаанай огторгой өөдэ дэгдэхые, мүн хотынгоо гал дүлэн соо байхые Бэньямиинэй угай сэрэгшэд гэдэргээ эрьежэ хараба. Тиихэдэнь израильшууд сухарихаяа гэнтэ болижо, һөөргөө добтолон, тэдээнтэй тулалдаба. Бэньямиинэй угай сэрэгшэд ямар гай тодхорто орожо байһанаа харамсаараа, израильшуудта добтолхоёо зүрхэ алдашабад.

42Тэдэнэр израильшуудһаа тэрьедэн зугадажа, сүл губи руу гүйлдэшэбэд. Теэд тэдэнэр тулалдаанһаа тэрьедэжэ шадабагүй. Ушар юуб гэхэдэ, тэрэ хотоһоо гарагшад тэдэниие намнан хүсэжэ алабад.

43Израильшууд тэдэниие тойрон хүреэлбэд. Тиигээд тэдэниие Мэнүүхһээ Гибаагай зүүн тээхи тала хүрэтэр мүрдэн намнабад.

44Иигэжэ Бэньямиинэй угай арбан найма мянган сэрэгшэд алуулба. Тэдэнэр бултадаа хүсэ шадалтай, дайшалхы дүй дүршэлтэй эрэшүүл байгаа юм. 45Тэдэнэй амиды үлэгшэдынь гэдэргээ эрьежэ, сүл губи руу, Риммоон байса хабсагай тээшэ зугадабад. Израильшууд Бэньямиинэй угай таба мянган сэрэгшэдые харгыдань хүсэжэ алабад. Тиигээд израильшууд тэдэниие Гидоом хүрэтэр мүрдэн намнажа, үшөө хоёр мянган сэрэгшэдыень хюдабад.

46Тэрэ үдэр элдэеэ һугалжа шадаха Бэньямиинэй угай хорин таба мянган сэрэгшэд алуулба. Тэдэнэр бултадаа эрэлхэг зоригтой сэрэгшэд байһан юм. 47Гэбэшье Бэньямиинэй угай зургаан зуун сэрэгшэд сүл губи руу, Риммоон байса хабсагай тээшэ гүйлдэжэ, тэндэ дүрбэн һара соо хоргодон байбад.

48Израильшууд Бэньямиин эсэгын зоной ажаһуудаг орон нютагта һөөргөө тэхэрижэ, тэндэхи бүхы хүнүүдыень болон үхэр малнуудыень һэлмээрээ алаад, харгы замдань байһан бүхы хотонуудыень галдан шатаабад.