‏ Judges 4

Дэбоораа – эхэнэр ударидагша

1Эһуудай наһа бараһанай һүүлдэ израильшууд дахин Эзэнэй урда муу муухай үйлэ хэрэгүүдые хэжэ эхилбэ. 2Тиихэдэнь Эзэн израильшуудые засаглан бариха хүсэ шадал Ханаһаанай хаан Ябиинда үршөөбэ. Ябиин тэрэ үе сагта Хацоор хотодо засаг барижа байгаа. Хароошэт-Хагойиимдэ ажаһуудаг Сисэраа болбол тэрэ хаанай сэрэгэй ноён байһан юм. 3Юһэн зуун түмэр тэргэтэй Сисэраа израильшуудые хорин жэл соо дошхон хэрзэгыгээр дарлаба.

4Израильда ударидагшадай ажаһууһан тэрэ үе сагта Лаппидоотын һамган Дэбоораа Бурханай мэдээ асарагша эхэнэр байба. 5Тэрэ Эпрааимай хадалиг газар дээрэхи Рамаа ба Бэт-Ээл хотонуудай хоорондохи Дэбоораагай Далдуу модотын адагта ажаһуудаг байгаа. Нэгэтэ Израилиин уг удамай хүбүүд тэрэ эхэнэртэ ерэжэ, Сисэраае яаха хээхэ тухай һураба.

6Дэбоораа Напталиигай уг удамай ажаһуудаг Кээдэш хотоһоо Абиноһаамай хүбүүн Бараакые дуудажа ерүүлээд, тэрээндэ иигэжэ хэлэбэ:

– Эзэн, Израилиин Бурхан шамда иигэжэ зарлиглана: Напталиигай болон Зэбүлүүнэй уг удамуудта ошожо, арба мянган сэрэгшэдыень суглуулаад, тэдэниие дахуулжа, Табоор хада дээрэ гара. 7Би Ябиинай сэрэгүүдэйнь жанжан Сисэраае, тэрэнэй бүхы тэргэнүүдые, тэрэнэй үй түмэн сэрэгшэдые Кишоон мүрэнэй гол газарта дахуулжа асараад, шинии гарта тушаахаб. Тэндэ илалта туйлахадатнай, таанадта Би туһалхаб.

8Бараак тэрэ эхэнэртэ иигэжэ хэлэбэ:

– Хэрбэеэ намтай шинии ошолдоо һаа, би дайлалдахаяа ошохоб. Хэрбэеэ ошолдоогүй һаашни, би дайлалдахаяа ошохогүйб.

9Дэбоораа тэрээндэ иигэжэ хэлэбэ:

– Би шамтай ошолдохоб. Теэд байлдаанай энэ аян зам шамайе алдаршуулхагүй. Гэбэшье Эзэн Сисэраае эхэнэрэй гарта үгэнэ.

Дэбоораа Бараактай суг хамта Кээдэш хото ошобо. 10Тэндэ Бараак Напталиигай болон Зэбүлүүнэй уг удамуудһаа арба мянган сэрэгшэдые суглуулаад, тэдэнээ хойноо дахуулжа, дайлалдахаяа ошобо. Дэбоораа тэдэнтэй суг хамта ябалсаба.

11Тэрэ үе сагта өөрынгөө хээн уг удамуудһаа таһарһан Хээбэр гэжэ нэрэтэй хүн тэндэ ажаһууба. Хээн үндэһэ яһанай Хобаабай үри һадаһануудай нэгэн Моисейн хадам эсэгэ болохо юм. Кээдэшһээ холо бэшэ Цаананниимэй сарса модонуудай хажууда Хээбэр өөрынгөө майхан хүреэнүүдые татаба.

12Абиноһаамай хүбүүн Бараак Табоор хада дээрэ гараа гэжэ Сисэраада дуулдаба. 13Тиихэдэнь Сисэраа өөрынгөө юһэн зуун тэргэнүүдээ болон бүхы сэрэгүүдээ суглуулаад, Хароошэт-Хагойиим хотоһоо гаража, Кишоон мүрэндэ ошобо.

14Дэбоораа Бараакта иигэжэ хэлэбэ:

– Урагшаа! Мүнөөдэр Сисэраагай сэрэгүүдые һамна бута сохиходошни, Эзэн шамда туһалха. Харгы замыешни сүлөөлжэ, шинии урда Эзэн ябаха.

Бараак арбан мянган сэрэгшэдээ дахуулжа, Табоор хада руу бууба. 15Дайшалхы тэмсэлэй үедэ Эзэн Сисэраае, тэрэнэй бүхы тэргэнүүдые болон тэрэнэй бүхы сэрэгые бахардалганда оруулба. Тиихэдэнь тэдэнэр юу хэхэеэ мэдэхэеэ болишоод, хүл хөөрсэг табилдаба. Сисэраа өөрынгөө тэргэһээ һүрэжэ буугаад, ябагаар тэрьелбэ. 16Бараак болон тэрэнэй сэрэгшэд Сисэраагай тэргэнүүдые болон сэрэгшэдые Хароошэт-Хагойиим хото хүрэтэр намнан мүрдэжэ, һэлмэнүүдээрээ сабшан, нэгэшье хүнииень амиды үлөөбэгүй.

17Сисэраа Хээбэрэй һамган Яһээлэй байдаг майхан тээшэ гүйжэ ерэбэ. Хээн үндэһэ яһанай Хээбэр Хацоорой хаан Ябиинтай эбтэй эетэй ажаһуудаг байгаа.

18Яһээл дүтэлжэ ябаһан Сисэраае харамсаараа, тэрэниие угтахаяа майханһаа гараад:

– Хүндэтэ минии эзэн, майхандамни орыт! Орогты бү айгты! – гэжэ уриба.

Сисэраа тэрэнэй майханда оробо. Яһээл хибэсээрээ тэрэниие хушаба.

19Сисэраа хибэсээ сэлеэд, Яһээлдэ иигэжэ хэлэбэ:

– Би ундаа хүрөөб. Намда ууха уһа үгыш.

Яһээл һү хэнхэй арһан хүхүүрэйнгөө амһарые нээжэ, тэрэнэй ундыень харяагаад, тэрэниие хибэсээр дахин хушаба.

20Сисэраа хибэс дороһоо Яһээлдэ иигэжэ хэлэбэ:

– Ошоод, майханайнгаа үүдэндэ зогсо. Хэрбэеэ хэн нэгэнэй ерээд, «Эндэ хүн бии гү?» гэжэ шамһаа һураа һаань, «Хэншье үгы» гэжэ харюусаарай.

21Сисэраа ехээр эсэһэн тула тэрэ дары унташаба. Теэд Хээбэрэй Яһээл һамган газарһаа һугалжа майханайнгаа гадаһыень абаба. Тиигээд тэрэ эхэнэр нүгөөдэ гартаа алха барижа, маряаһаар Сисэраада ерээд, гадаһанайнгаа үзүүрыень тэрэнэй сабиргайда тулган шэглүүлэмсээрээ, узуурыень алхаар сохибо. Тэрэ гадаһан Сисэраагай сабиргай соогуур һэтэ гараад, газар руу шаагдашаба. Сисэраа үхэбэ.

22Эгээл энэ үедэ Сисэраае мүрдэн бэдэржэ байһан Балаак Яһээлэй майханда хүрэжэ ерэбэ. Яһээл тэрэниие угтажа урдаһаань ошоод, тэрээндэ иигэжэ хэлэбэ:

– Майхан соом орыш даа, мүрдэн бэдэржэ ябаһан хүнииешни би шамда харуулхаб.

Майхан соо ороходоо, Бараак сабиргай руугаа гадаһа шаалгуулжа үхэһэн Сисэраагай хүүр бэеын газарта хэбтэхыень хараба.

23Тиигэжэ тэрэ үдэр Эзэн израильшуудай урда Ханаһаанай хаан Ябиинай хан түрые номгоруулба. 24Ханаһаанай хаан Ябиинай сэрэгые Тэрэнэй дууһан хюдатар, израильшуудай сэрэг үдэр бүхэндэ хүсэтэй ба улам олон боложо байба.