‏ Judges 5

Дэбоораагай дуун

1Сисэраае һамна бута сохиһон тэрэ үдэр Дэбоораа, Абиноһаамай хүбүүн Бараак хоёр иимэ үгэнүүдтэй дуу дуулаба:

2– Ударидагшадай Израилиин сэрэгые бодхооходонь, улад зоноо байлдаанда добтолон оруулхадань,
Эзэнээ магтагты!
3Хаашуул, шагнагты!
Хайхарагты, амбан һайд!
Би Эзэндэ дууланаб.
Би Израилиин Бурханда
магтаал дуугаа үргэнэб!
4Эзэн минии,
Танай Сэһиирһээ гарахада,
Эдоомой тала гаталхада,
Газар доһолоол,
огторгой бүрхэжэ,
олигой ехэ уһан үүлэнһээ адхараал.
5Эзэнэй, Синай хадын
Бурханай урда
Эзэнэй, Израилиин
Бурханай урда
хаданууд дорьбон хүдэлөөл.
6Анаадай хүбүүн Шамгаарай
засагаа барихада,
тэрэ үе сагта Яһээлэй ажаһуухада,
аяншад болон наймаашадай
тойруу харгыгаар ябахада,
урданайнь сэхэ харгынууд
унаагай жэнгүйһөө хооһоршоол!
7Тэндэ Дэбоораа, шинии ерэхэгүйдэш,
тэдэнэй эхэнь үшөө болохогүйдэш,
Израилиин тосхон һууринуудта
эрэлхэг ударишагшад үгы болошоол.
8Хуурмаг бурхадта шүтэхэдэнь,
хотын үүдэндэ дайн эхилээл.
Халхабша болон жадатай хүн
Израилиин дүшэ мянган сэрэгшэд
соо олдоогүйл.
9Элдэ жадаяа баряад дайнда ошодог
Израилиин сэрэгшэд,
Минии зүрхэн таанадтайл.
Эзэнээ магтагты!
10Сагаан элжэгэнүүдые унагшад,
хибэс дээрэ һуугшад,
харгыгаар ябагшад,
магтаал дуугаа дуулагты!
11Хонид болон малнуудай суглардаг
худагуудай хажууда
хүжэм дуута цимбалай
абяан соностоол.
Эзэнэй баатаршалга тухай,
Израилиин ударидагшадай
баатаршалга тухай,
хотын үүдэндэхи байлдаанай
илалта тухай
хүнүүд магтаал дуугаа дууланал!
12Һэрииш Дэбоораа, һэрииш даа,
һайхан дуугаа дуулыш!
Бараак, Абиноһаамай хүбүүн,
баряанда абагшадаа туугыш!
13Таанад, амиды үлэгшэд,
ударидагшадтаа ошогты.
Таанад, Эзэнэй арад,
Намда хүсэ асарагты.
14Амалээгэй орондо нютагжаһан
Эпрааимуудай сэрэгшэд ерээл!
Шинии хойноһоо Бэньямиинэй
сэрэгшэд ошолсоол!
Махиирай үенүүдһээ сэрэгэй
дарганар ошоол!
Зэбүлүүнэй үенүүдһээ гараһан сэрэгшэд
зузууртай һорьбоор хадхахадаа бэрхэл!
15Иссахаарай тайжанууд
Дэбоораатай хамтал!
Бараакта үнэн сэхэ Иссахаарай арад
тэдэнэй хойноһоо гол тээшэ ябгалаа.
Рэүбээнэй эсэгын зон
гүнзэгы бодолдо абтанхай!
16Түүдэгэй дундуур һуужа,
хонишоной жэмбүүр юугээ соносоо хүмши?
Рэүбээнэй эсэгын зон гүнзэгы
бодолдо абтанхай!
17Галаадай арад Иорданай саана
амгалан ажаһууна.
Даанай арад онгосонууд дээрэ
юундэ зөөгөө юм?
Далайн эрье дээрэ, мүн
далбагата онгосонуудай ерэдэг газарта
Ашээрэй эсэгын зон ажаһууна.
18Харин Напталиигай, Зэбүлүүнэй арадууд
хайран ами наһаяа гамнангүй,
хадалиг газарай түлөө тулалдана.
19Хаашуул тулалдаанда ерээл.
Ханаһаанай хаашуул
Мэгиддооной уһан шадархи
Таанаахта тэмсээл.
Харин тэдэнэртэ мүнгэн олзо
хүртөө үгыл.
20Тэнгэриһээ одо мүшэд туһалаа.
Тэндэһээ өөрынгөө замаар
Сисэраатай тулалдаа.
21Урданай гол, Кишоон гол
урадхалаараа дайсадые хаанаш!
Уур сухални дайсадай
хүсые бууруулыш!
22Тэргэтэй моридойнь гүйлдэхэдэ,
туруунуудайнь түбэрөөн дуулдана.
23Эзэнэй Эльгээмэл иигэжэ зарлиглана:
«Мэрооздо муу хараалым хүргэгты!
Тэндэхи зониие муугаар хараагты!
Тэдэнэр Эзэндэ туһалхаа бү ерэг!
Тэрээндэ сэрэгшэд туһалхаа бү ерэг!»
24Майхан соо ажаһуудаг
эхэнэрнүүдэй дундаһаа
хээн үндэһэ яһанай Хээбэрэй һамган
Яһээл үреэлдэмни хүртэг!
25Сисэраагай уһа эрихэдэнь,
Яһээл тэрээндэ һү аягалаа.
Сисэраагай аяга соонь
сүсэгы хэжэ, тэрээндэ үгөө!
26Газаа гарамсаараа тэрэ эхэнэр
гадаһыень майханһаа һугалаад,
баруун гартаа хүдэлмэришэдэй
алха баряал!
Тэрэнэй сабиргайда гадаһа тулгаад,
тэрэнээ толгой соогуурнь ходор шаагаал.
27Тэрэ Яһээлэй хүл доро һунаа.
Тиигэжэ тэрэ тэмсэлдэ унаа.
Тэрэнэй хүл доронь һунаһан шэгтээ
тэндэ Сисэраа үхөөд хэбтээ.
28Сонхоороо Сисэраагай эжы шагаагаад,
сорхирсо уйлан, иигэжэ асуугаа:
«Юундэ хүбүүнэйм тэргэнүүд удаашарнаб?
Юундэ моридойнь түбэрөөн дуулданагүйб?»
29Тэрээндэ һахюулайнь сэсэн
эхэнэрнүүд харюусабад.
Тэрэ өөрөө өөртөө иигэжэ хэлэбэ:
30«Хүхилдэнэ тэдэнэр мүнөө магадгүй.
Хоорондоо тэдэнэр олзоёо хубаанад.
Хоёр, нэгэ басагадые сэрэгшэд
өөртөө абанад.
Бүдэй хоёр талаһаа оёһон хубсаһа
байлдаанда илагша үмдэнэл.
Элдэб үнгэтэй хубсаһануудые
Эсэтэрээ Сисэраа олзо сооһоо бэдэрнэл».
31Эзэн Минии, элшэ хүсөөрөө
наранай мандаһан мэтээр,
Танай дайсад булта хосорог!
Танда дуратайшуул хүсэ орог!

Энэ газар дээрэ дүшэн жэл соо энхэ тайбан байба.