‏ Judges 7

Эзэн Гидоондо туһалба

1Еруббаал гэжэ нэрэтэй болоһон Гидоон, мүн тэрээнтэй хамта ябагшад Хароод булагай эхиндэ байрлажа, майхан хүреэнээ татаба. Тэдэнэй байрлаһан газарай хойто зүгтэ Морээ уулын хаяагай хүнхэртэ мидианууд майхан хүреэгөө татаһан байба.

2Эзэн Гидоондо иигэжэ хэлэбэ:

– Шинии хүнүүд тэдээнһээ үлүү олон байна. Мидиануудые Би таанадай гарта үгэхэгүйб. Минии урда израильшууд «Магад өөһэдөө өөһэдыгөө абараабди» гэжэ болохо. 3Тиимэһээ хэд дайсадһаа айнаб, тэдэнэр Галаадай хадануудта байдаг түрэл арадтаа бусагты гэжэ соносхо.

Хорин хоёр мянган сэрэгшэд Гидоониие орхижо, гэр гэртээ бусаба. Тиихэдэнь арбан мянган сэрэгшэд үлэбэ.

4Гидоондо Эзэн иигэжэ хэлэбэ:

– Үшөөл олон сэрэгшэд үлөө байна. Үлэгшэдыень ши дахуулжа, урдажа байһан уһанда абааша. Тиихэдэш Би тэдээнһээ шамда шэлэхэб. «Шамтай ошолдогты» гэжэ Би хэлэхэб. Тиихэдэмни шамтай ошолдохо сэрэгшэд ошолдог. «Шамтай ошолдожо болохогүй» гэжэ Би хэлэхэб. Тиихэдэм шамтай ошолдохогүй сэрэгшэд үлэг.

5Гидоон сэрэгшэдые дахуулжа, урдажа байһан уһанда асарба. Гидоондо Эзэн иигэжэ айладаба:

– Нохой шэнгеэр хэлээрээ уһа долёогшодые нэгэ тээшэнь, үбдэглэн һуугаад, уһа уугшадые нүгөө тээшэнь хубаарила.

6Альгаараа уһа удхажа, тэрэнээ хэлээрээ долёожо уугшад гурбан зуун сэрэгшэд болобо. Бусадынь уһа уухын тула үбдэглэн һууба.

7Гидоондо Эзэн иигэжэ айладаба:

– Таанадые абархын тула Би таанадай гарта мидиануудые үгэхэб. Тиигэхын тула эдэ гурбан зуун сэрэгшэдые хэрэглэхэб. Таби бусадыень гэр гэртэнь.

8Гидоон тэдэниие гэр гэртэнь табяад, гурбан зуун сэрэгшэдые үлөөбэ. Гидоон тэдэниие гэртэнь табихынгаа урда тээ тэдээнһээ эдеэ хоолыень болон эбэр бүреэнүүдыень өөртөө үлөөбэ.

Тэдэнэй тогтон байрлаһан газарай тээ дорохи гол газарта мидиануудай майхан хүреэн байба. 9Тэрэ һүни Гидоондо Эзэн иигэжэ айладаба:

– Бодо, мидиануудай майхан хүреэндэ ошо. Би тэдэниие шинии гарта үгэнэб. 10Ошохоёо тэндэ айбал, ши өөрынгөө зараса Пураатай ошолсо. 11Тэдэнэй майхан хүреэндэ ошоод, тэдэнэй юун гэжэ хөөрэлдэхыень шагна. Тиигэбэл, ши тэдээндэ добтолхоһоо айхагүйш.

Гидоон ба тэрэнэй зараса Пураа хада руу буужа, ара үбэргүйгөөр зэбсэгжэһэн дайсадай сэрэгтэ ерэбэ. 12Мидианууд, амалээгүүд болон зүүн зүгтэ ажаһуугшад мүрэнэй тэрэ гол газарта байрлан тогтобо. Таршаа мэтэ олон тэдэниие, далайн эрьеын элһэн мэтэ олон тэмээнүүдыень тоолохын аргагүй үй түмэн байба.

13Гидоон дайсадай майхан хүреэндэ ерээд, тэдэнэй хөөрэлдөөе шагнажа эхилбэ. Нэгэ сэрэгшэ нүгөөдэдөө иигэжэ хэлэнэ:

– Ешмээнэй гурилаар бариһан түхэреэн томо хүбэриг бидэнэй тогтон байрлагша майхан хүреэн соогуур мухариба гэжэ би зүүдэлээб. Түхэреэн тэрэ хүбэриг зээрэмхэйтэн мухариһаар, майхан нэшэн мүргэбэ. Тэрэнэй хүсэнһөө майхан урбалдан һандарба.

14Нүгөөдэнь тэрэнэй зүүдыень иигэжэ тайлбарилна:

– Энэшни Израиль үндэһэнэй Ёһаашай хүбүүн Гидооной һэлмэ болоно ха юм. Эзэн тэдэнэй гарта мидиануудые болон майхан хүреэнэй бүхы сэрэгшэдые үгэбэ гээшэл.

15Тэрэ зүүдэн, тэрэнэй тайлбари тухай Гидоон шагнаад, Эзэндэ зальбаржа, доро дохимсоороо израильшуудай майхан хүреэндэ бусаад, иигэжэ сэрэгшэдтэ хэлэбэ:

– Бодогты! Мидиануудай сэрэгшэдые бута сохилгондо Эзэн бидэндэ туһалха.

16Гурбан зуун сэрэгшэдээ гурбан бүлэг болгожо хубаагаад, Гидоон сэрэгшэ бүхэндэ эбэр бүреэ болон хооһон домбо үгэбэ. Домбо бүхэн соо бамбар дэн бадараагдаба.

17Тиигээд Гидоон сэрэгшэдтээ иигэжэ хэлэбэ:

– Таанад намайе хараад, минии хэһэн юумэ хэгты. Би дайсадай майхан хүреэндэ ошоод, юу хэнэбиб, таанад тэрэниием хэхэт. 18Тэдэнэй майхан хүреэнииень хүреэлэгты. Минии эбэр бүреэгээ үлеэхэдэ, тэдэнэй майхан хүреэнииень хүреэлһэн таанад эбэр бүреэнүүдээ үлеэжэ: «Эзэнэй түлөө! Гидооной түлөө!» – гэжэ хашхаралдагты.

19Һүниин тэндэ харуулшадые халан һэлгэлгын һүүлээр Гидоон зуун сэрэгшэдтэеэ хамта хада уруу буужа, дайсадай майхан хүреэндэ дүтэлбэ. Тэдэнэр эбэр бүреэнүүдээ үлеэбэд, домбонуудаа бута сохибод. Сэрэгшэд бүхэн зүүн гартаа бамбар дэн, баруун гартаа эбэр бүреэ бариба. 20Тэдэ гурбан бүлэгэй сэрэгшэд эбэр бүреэгээ үлеэжэ байжа, иигэжэ хашхаралдабад:

– Эзэнэй түлөө һэлмээрээ сабша! Гидооной түлөө һэлмээрээ сабша!

21Гидооной сэрэгшэд дайсадай майхан хүреэнэйнь газаа талаһаа хүреэлэн зогсобод. Мидиануудай майхан хүреэнһөө оог хашхаралдаан соностоод, тэдэнэр хүл хөөрсэг табилдажа, тэрьедэн зугадаха газар бэдэршэбэд.

22Гидооной гурбан зуун сэрэгшэд эбэр бүреэнүүдээ үлеэбэ. Эзэн майхан хүреэн соогоо байһан мидианай сэрэгшэдые бэе бэетэеэ тэмсэхэ эсэргүүсэлгэндэ абаашаба. Тэдэнэр һэлмээрээ бэе бэеэ хадхажа алабад. Тэдэнэй амиды үлэһэн сэрэгшэд Цэрэраа тээхи зүгэй мүрэнэй эрьедэхи Бэт-Шитаа болон Таббаат хотын хажуудахи Абээл-Мэхолаагай хилэ хүрэтэр тэрьедэн зугадаба. 23Тиихэдэнь дуудан ерүүлэгдэһэн Напталиигай, Ашээрэй болон Мэнашшээгэй обогуудай бүхы сэрэгшэд мидиануудые намнан мүрдэбэ.

24– Хадаһаа буужа, мидиануудай урдаһаа добтологты, Бэт-Барааһаа Иордан мүрэн хүрэтэрхи тэдэнэй бүхы гарсануудыень эзэмдэгты, – гэһэн захяатайгаар Гидоон элшэдээ хадалиг газарта ажаһуудаг Эпрааимай обогой бүхы зондо эльгээбэ.

Эпрааимай обогойхин булта сугларжа, харгы замдаа Бэт-Барааһаа Иордан хүрэтэрхи мүрэн гаталдаг гарсануудые эзэмдэбэ. 25Тэдэнэр Хирээ болон Шоно гэжэ нэрэтэй мидиан тайжануудые барижа, Хирээе Хирээгэй шулуун дээрэ, Шоные Шонын уһан жэмэс дарадаг даруулгын газарта алаад, толгойнуудыень Иорданай саана байһан Гидоондо асаржа үгэбэ.