‏ Lamentations 1

א Алээп 1Оо, гай даа!
Улад зоноор хүүен-хүнхинэн байгааша энэ хото
мүнөө яагаа гансаарданги гээшэб!
Үндэһэтэдые зонхилон байһан аад,
мүнөө тэрэ бэлбэһэн эхэнэртэ адли болоол!
Хото можонуудай хатан байһан тэрэ
мүнөө богоол болоо!

ב Бээт 2Бүхэли һүниндөө тэрэ сурхирса уйлана,
нёлбоһод хасар дээгүүрнь урдана.
Дуратай байһан зонойнь дунда тэрэниие һаатуулха хүн үгы,
нүхэдынь тэрээндэ урбажа, дайсадынь болонхой.

ג Гиимэл 3Иудын улад зон туугдан абаашагдана.
Гай гасалан, хүндэ богоолшолго тэдээндэ тохёолдоо,
хариин зоной дунда байрлаад, амар заяа үзэнэгүй.
Дайсад Иудые хойноһоонь намнажа хүсөө,
гай тодхор тэрэниие бахалуурдана!

ד Даалэт 4Сионой харгынууд шаналан байна:
һайндэртэ ошохо хүн байхагүй.
Иерусалимай бартаанууд хооһон,
санаартадынь ёолоно,
басагадынь зобон уйдана,
Сион өөрөөшье зобоно.

ה Һээ 5Дайсадынь диилээ, түрүүлээ,
баясажа байна.
Оло дахин нүгэл хэһэнэйнь түлөө
Эзэн энэ хотодо гай гасалан ушаруулаа.
Дайсад үхи хүүгэдыень туун абаашана.

ו Ваав 6Сионой басаган гоё һайханаа гээгээ.
Тайжанарынь бэлшээри олоогүй буганууд мэтэ,
хүсэ шадалгүй болотороо гүйгээ,
туугшань тэдэниие намнан хүсэжэ байна.

ז Заайин 7Гай тодхорто үдэрнүүдэй ерэхэдэ
Иерусалим урдандаа ямар үнэтэ зүйлые
эзэмдэн байдагаа һанан байна.
Теэд арад түмэниинь дайсанда диилдээ,
хэншье туһалнагүй.
Дайсад тэрээн руу хаража,
хүсэгүй байра байдалыень наадалан энеэлдэнэ.

ח Хээт 8Иерусалим ехэ нүгэл хээ,
тиимэһээ бузартай болоо.
Тэрээндэ соло үргэн байгаашад
мүнөө шоо үзэн хаража байна.
Өөрөө тэрэ уйлажа,
буруу хараад байна.

ט Тээт 9Хормойнь муухай юумэндэ зуурагданхай.
Тэрэ ерээдүй тухайгаа бодоогүй,
тиимэһээ гэнтэ доройтон унаа.
Хэншье тэрэниие һатааруулхагүй!
«Эзэн! Минии гай зоболон анхарыт!
Дайсадай угаа баярлажа байһые!»

י Ёд 10Эгээл үнэтэ бүхы зүйлдэнь
дайсан гараа һарбайгаад байна.
Суглаандань байхые өөрынь хоригшо үндэһэтэдэй
Нангин газар руунь орожо байхые тэрэ хаража байна.

כ Каап 11Бүхы арад түмэниинь эдеэ хоол бэдэржэ ёолоно,
ами наһаяа абархын тула
эдеэнэй түлөө юушье үгэхөөр бэлэн.
«Эзэн, минии доройтоһониие харыт!» гэжэ Иерусалим хэлэнэ.

ל Лаамэд 12Аянай зон, таанар хажуугаар үнгэрөөшье һаа,
харыта, анхарыта:
намтай тушаалдаһан зоболондол адли зоболон бии юм аал?
Уур хилэнгээр дүрэлзэһэн үдэртөө
Эзэн намда тэрэниие эльгээ!

מ Мээм 13Дээрэһээ Тэрэ гал дүлэн эльгээгээ,
тэрэнь яһым шатаана.
Хүлдэм урьха табяа, доошонь унагаагаа,
үдэр бүри айжа, угаа үбдэжэ байнам.

נ Нүүн 14Нүгэлөөрни Тэрэ хөөмэгшэ хэжэ,
гартаа уян баряа,
тэрэ хөөмэгшэ хүзүүем дарана,
тэрээн доро хүсэгүй бүдэрэн байнаб.
Мултархын аргагүй гарта намайе Эзэн дамжуулаа!

ס Саамэх 15Минии бүхы хүсэтэйшүүлые Эзэн доошонь унагаагаа,
залуу хүбүүдым хюдахын тула
дайсадые һайндэртэ мэтэ уряа.
Иерусалим тортоггүй сэбэрхэн залуу басаган мэтэ бэлэйл,
теэд тэрэниие даран шахадаг түхеэрэлгэдэ жэмэс дарадагтал
Эзэн няса гэшхэбэ!

ע Аайин 16Эдэ бүгэдэ тухай би уйланаб,
нюдэмни уһан болонхой.
Амиды мэндэ байлгадаг, һатааруулдаг нэгэн намһаа холо.
Дайсанай хүсэндөө ороһон ушарһаа үхи хүүгэдни хооһон хосорно.

פ Пээ 17Сион гараа һунгана,
тэрэниие һатааруулха хэншье байхагүй.
Эзэнэй захирхада дайсад Яковые бүһэлөө.
Тэдэнэй дунда Иерусалим бузарлагдаһан эхэнэр мэтэ болоо.

צ Цадээ 18Теэд Эзэн зүб шударга!
Юуб гэхэдэ, би үгыень дуулаагүйб.
Бүхы арад түмэн, шагнагты,
зоболонгым харагты:
залуу басагад, хүбүүдни баряанда туугдан ошожо байна.

ק Кооп 19Би амарагуудаа дуудааб, теэд тэдэ намда урбаа.
Санаартадни, үндэр наһатайшуулни хото соо хосоржо байна,
үхэлһөө зайлахын тула эдеэ хоол гуйраншалжа ябана.

ר Рээш 20Эзэн, харыт, би ехэ зобожо байнаб,
умаймни хабданхай,
зүрхэмни хүмэринхэй.
Эдэ бүгэдэ Танай урдаһаа минии эсэргүүсэһэнэй түлөө болоо.
Гудамжада һэлмэ үхибүүдым сабшана,
гэртэ үхэл амадан хүлеэнэ.

ש Шиин 21Дайсад минии ёолохые дуулаа,
хэншье намайе һатааруулхагүй.
Минии зоболон тушаа тэдэ соносожо,
Танай энээниие үйлэдэһэндэ баясаа.
Тэдэниие намтай адли болгохо үдэр тухай
Та тунхаглаһан ёһоороо асараарайт!

ת Таав 22Тэдэнэй бүхы хорото үйлэнүүд Танай урда ерэг.
Бүхы гэм зэмэйм түлөө намда хандаһандал
Та тэдээндэ мүн лэ тиимээр хандаарайт!
Ёолохомни олон, зүрхэмни үбдэжэ-һалажа байна!