‏ Lamentations 3

א Алээп 1Бурханай уур сухалай баягһаа
гай зоболон үзэһэн хүн би мүн.
2Тэрэ намайе туужа,
шэб харанхы руу оруулаа.
3Иигээд Тэрэ намайе дахин дахин, үдэр бүри сохино.

ב Бээт 4Мяхан бэе, арһым Тэрэ таһа татаа,
яһым буталаа.
5Намайе баряанда абажа,
гашуудал, зоболонгоор хүреэлөө.
6Намайе харанхы руу оруулаа.
Би хадаа хүүр соо байгааша үхэһэн хүн мэтэб.

ג Гиимэл 7Гарахаар бэшээр намайе ханаар хүреэлөө,
хүндэ гэнжээр гэнжэлээ.
8Би хашхарнаб, бархирнаб,
теэд Тэрэ минии зальбарал дуулаха дурагүй.
9Минии зам дээрэ Тэрэ хана бодхоогоо,
харгыем хаагаа.

ד Даалэт 10Отожо байгааша баабгай шэнги,
олзоёо харууһалагша арсалан мэтэл!
11Тэрэ намайе төөрюулээ, харгыһаам хадууруулаа,
намайе гансаарым хаяа!
12Тэрэ һурша номоо татажа,
годлиёо нам руу шэглүүлээ.

ה Һээ 13Һаадагайнгаа годлинуудаар минии бөөрэ харбаа.
14Өөрын арад түмэнэй дунда би шоодбори нэгэн болооб,
тэдэ үдэр бүри нам тушаа хэлээ бүлюудэнэ.
15Тэрэ намайе бог үбһөөр хооллуулаа,
гашуун ундаар ундалуулаа.

ו Ваав 16Шүдыем шулуугаар түүрүүлээ,
амыем үнэһөөр дүүргээ.
17Амидарални бэлэгүй болоо,
баяр гээшые би мартааб.
18«Хүсэ шадални, Эзэндэ найдални һалаа!»
гэжэ би хэлээб.

ז Заайин 19Минии зобожо, тулижа байһые һаныт!
Бог шорой, гашуун һүлһэн – минии хубита.
20Энээниие зүрхэ сэдьхэлни бата хадуунхай,
зоригни мүхэнхэй.
21Харин зүрхэ сэдьхэлдээ харюумни,
найдални энэ:

ח Хээт 22«Эзэнэй хайра дууһаагүй,
энэрэл хайрань эсэслээгүй.
23Үглөө бүри тэдэ мандана!
Үнэнтнай агууехэ!»
24«Эзэн – минии хуби мүн,
тиимэһээ Тэрээндэ найданаб!» гэжэ
минии сэдьхэл хэлэнэ.

ט Тээт 25Өөртэнь найдадаг зондо,
Өөр руунь тэгүүлэгшэдтэ Эзэн һайнаар хандадаг.
26Эзэн абарха гэжэ
абяа шэмээгүй хүлеэжэ байгааша хүндэ һайн байха.
27Эдир наһанһаа эхилэн,
өөрын тээбэри өөрөө даагаад ябадаг хүндэ һайн.

י Ёд 28Тэрэ хүн гансаараа абяагүй һууна,
юуб гэхэдэ, тээбэринь Эзэнһээ сэхэ даалгагданхай.
29«Найдал үшөө бии аалам?» гэжэ
тэрэ амаа газарта шоройдон мүргэнэ,
30сохижо байгааша хүндэ хасараа табин үгэнэ,
угаа ехээр баһуулна даа!

כ Каап 31Үгы, Эзэн хэтэдээ орхёо бэшэ!
32Зоболон эльгээшье һаа,
агууехэ энэрэл хайраараа Тэрэ үршөөхэ.
33Юуб гэбэл, миин байхаһаа, ямаршье ушар шалтаггүй
зониие хэһээнэ, гашуудуулна бэшэл.

ל Лаамэд 34Харин дэлхэй дээр баряанда байгшадые
хүлөөрөө дэбһэн үдьхэлжэ байхые,
35Дээдэ Бурханай урда
хүниие буруу шүүбэрилжэ байхада,
36зарга шүүхэдэ хүниие мэхэлжэ байхада,
Эзэн энээниие харанагүй юм аал?!

מ Мээм 37«Эзэнэй захираашьегүй юумэн боложо магад» гэжэ
хэн хэлэхэб?
38Дээдэ Бурханай зарлигаар
гай гасалан, амар амгалан болодог бэшэ юм аал?
39Тиимэһээ нүгэл хэһэн аад,
зоной шууялдахань юуштэб?

נ Нүүн 40Замаа бэдэржэ туршая,
Эзэндэ эрьее!
41Тэнгэридэ оршодог Бурханда
зүрхэ сэдьхэлээ, гараа һунгая!
42Бидэ хадуураабди, һөөргэдөөбди,
Та маанадые хүлисөөгүйт.

ס Саамэх 43Уур сухалаар бушаганан, маанадые намнаат,
хайра гамгүй хюдаат.
44Зальбаралымнай дуулахагүйн тула
Та Өөрыгөө үүлээр халхалаат.
45Арадуудай дунда бидэниие
жэгшүүритэй шабартай худхаат.

פ Пээ 46Дайсаднай бултадаа маанадые залгихаар амаа ангайгаа.
47Һүрдэмэ аймшаг болон нүхэн,
үгытэлгэ болон һандарал – манай хуби.
48Нюдэнһөөм нёлбоһод горхон мэтэ урдана –
арад түмэнэйм басаган хосоржо байна!

ע Аайин 49Нюдэнһөөм урдажал-урдажал байна,
юуб гэбэл, һатааруулха юумэн үгы.
50Эзэнэй огторгойһоо харатар,
анхартар иигэжэл байха.
51Хотынгоо басагадые харахадаа,
зүрхэ сэдьхэлни үбдэнэ.

צ Цадээ 52Ямаршье гэмгүй шубуу барихаар забдаһандал
дайсадни минии хойноһоо агнажа байна.
53Амидыгаар намайе нүхэн руу хаяа,
шулуугаар дараа.
54Толгойем уһан хушаба,
«һалааб!» гэжэ би хашхарбаб.

ק Кооп 55Эзэн, Танай нэрые
гүнзэгы нүхэн сооһоо дуудан дурданаб.
56Намайе соносыт,
зальбаралдам, ёолоондом шэхээ бүглөөд бү байгыт!
57Дуудахадам, Та дүтэлөөт,
«Бү ай» гэжэ айладаат.

ר Рээш 58Та намайе абараат, ами наһым аршалаат.
59Эзэн, минии гомдол харанат,
хэрэгым шүүбэрилэн шиидхыт!
60Дайсадайм угаа хэрзэгые,
намтай юу хэхэеэ һанаһыень Та мэдэнэт.

ש Шиин 61Намайе шоо үзэжэ байхыень,
намтай юу хэхэеэ һанаһыень Та харанат.
62Дайсад намайе үдэр бүри хараажа, баһажа байна.
63Харыт: тэдэ һуужа байна гү, зогсожо байна гү, –
хамаагүй, бултадаа намайе наада барижа байна.

ת Таав 64Эзэн, хэһэн хэмээрнь тэдээндэ харюулыт!
65Ухааень төөрюулыт, хараалаа тэдээндэ шэнгүүлыт!
66Эзэн, уур сухалаар бушаганан, тэдэниие мүрдыт,
огторгой дороһоо үгы хыт!