‏ Lamentations 4

א Алээп 1Оо, гай даа!
Алтан ямараар харлаа,
шэжэр алтан хэды ехэ бүрүүл болоо гээшэб!
Нангин үргөөгэй үнэтэ шулуун
харгын уулзуураар хаягданхай.

ב Бээт 2Шэжэр алтантай адляар үнэлэгдэхэ
Сионой эрхим хүбүүд
шабарша дарханай бүтээл болохо
шабар амһарта мэтэ болобо.

ג Гиимэл 3Сүүбэн шононуудшье хүрэтэрөө
хүхөө үгэжэ, бэлтэргэнүүдээ тэжээдэг.
Харин минии арад түмэнэй басаган
сүл губидахи тэмээн хяруул мэтэ хархис болобо.

ד Даалэт 4Ангажа, нарай нялха хүүгэнэй хэлэн
тангалайдаа няалдана.
Багашуул эдеэ хоол гуйна,
харин хэншье тэдээндэ үгэхэгүй юм.

ה Һээ 5Амтатай эдеэ хоол эдидэг байһан зон
мүнөө гудамжануудаар гэдэһээ үлдэжэ үхэжэ байна.
Шад улаан һайхан хубсаһа үмдэдэг байһан зон
мүнөө хаядаһанай амһартаар эдеэ хоол бэдэрнэ.

ו Ваав 6Минии арад түмэн!
Шинии хэһээлтэ Содомой хэһээлтэһээ хүндэ.
Содом агшам зуура саг соо хүмэреэ бэлэй,
хүнэй гарһаа бэшэ.

ז Заайин 7Удамаршадшни саһанһаа сэбэр, һүнһөө сагаан байгаа.
Тэдэ бэеэрээ шүрэһөө улаан,
элүүр шамбай, үнэтэ шулуун мэтэ толоржо байгаа бэлэй.

ח Хээт 8Мүнөө тэдэнэй шарай хөөһөө хара,
гудамжада уулзабал, танихаар бэшэ,
арһаниинь яһандаа няалдаа, модон мэтэ хатаа.

ט Тээт 9Гэдэһээ үлдэжэ үхэһэнһөө
һэлмээр сабшуулагдажа үхэһэниинь дээрэ.
Юуб гэхэдэ, таряалангай ургасын хомордоходо,
зон зобожо амяа алдадаг шуу.

י Ёд 10Зөөлэн зантай эхэнүүд
эдихэеэ хүүгэдээ шанажа байна,
үхибүүдынь эдеэ хоолынь болоо, –
арад түмэмни хосоржо байна!

כ Каап 11Эзэн уур сухалаар дүүрэжэ,
уур сухалаа адхаба,
Сиондо гал түймэр носообо,
дууһан шатааба!

ל Лаамэд 12Хархис дайсан Иерусалимай бартаануудаар
орохо гэжэ дэлхэйн хаашуул,
дэлхэйн арад зоной хэнииньшье һанахагүй байгаа.

מ Мээм 13Иерусалим дотор үнэн шударга зоной шуһа урасхуулһан
нүгэлтэ лүндэншэдэйнь, гэмтэ санаартадайнь үйлэ хэрэгэй түлөө
энэ болоо.

נ Нүүн 14Һохор мэтэ тэдэ үйлсөөр тэнэнэ.
Хубсаһа хунартань хэнэйшье хүрэмөөр бэшэ болтороо
тэдэ шуһанда зууралданхай.

ס Саамэх 15«Зайлагты! Бузартайт! Холодогты, бү хүрэгты!» гэжэ
тэдээндэ зон хашхарна.
«Тэнээшэд! Тэдэ бэшэ амидарахагүй!» гэжэ
тэдээн тушаа үндэһэтэд хэлсэнэ.

פ Пээ 16Эзэн Өөрөө тэдэниие тараан тэнүүлээ,
бэшэ ойшоожо харахагүй.
Санаартад мүнөө хүндэлэгдэнэгүй,
аха захатан хайрлагданагүй.

ע Аайин 17Харин бидэ туһаламжа хүлеэн,
дэмы нюдэеэ эсээгээбди.
Маанадые абаржа шадахагүй арадые хараашалан,
харуулай самхагһаа шэртэн хүлеэгөөбди.

צ Цадээ 18Тэдэ алхам бүхэнииемнай отожо байгаа,
гэрһээ гарахаа айнабди!
Үхэл дүтэлжэ байна, үдэрнүүднай дууһаа!
Үхэлнай ерээ!

ק Кооп 19Маанадые мүрдэн намнаашад
тэнгэриин бүргэдһээ хурдан байгаа,
хойноһоомнай хада уулаар намнаа,
сүл губидашье отоо.

ר Рээш 20«Тэрэнэй хамгаалалта доро бидэ
үндэһэтэдэй дунда амидархабди» гэжэ
маанадай хэлэжэ байһан,
амисхалнай болохо, Эзэнэй шэлэһэн нэгэн
тэдэнэй нүхэндэ орожо баригдаа.

ש Шиин 21Ууц нютагта һуугша Эдоомой басаган,
баясан, баярлан бай!
Аяга шам руушье тойрон ерэхэ!
Һогтожо, өөрыгөө нюсэгэлхэш!

ת Таав 22Сионой басаган! Хэһээлтэшни дүүрэхэ,
Тэрэ сүлөөлгэдэ эсэс табиха!
Эдоомой басаган! Тэрэ шамайе нүгэлэйш түлөө хэһээхэ,
гэм зэмыш эли болгохо!