Lev 1 | BxrBBL2024 | STEP | Эзэн майхан һүмэһөө Моисейе дуудажа, тэрээндэ иигэжэ хандаба:

‏ Leviticus 1

Түгэс шатаалта үргэл

1 Эзэн майхан һүмэһөө Моисейе дуудажа, тэрээндэ иигэжэ хандаба:

2 – Израильшуудта соносхон иигэжэ хэлээрэй: али нэгэнтнай Эзэндэ үргэл хэхэ гээ һаа, адуу малаар – эбэртэ бодо малаар, хони ямаагаар үргэл хэг. 3 Эбэртэ бодо малһаа түгэс шатаалта үргэл хэхээ һанаа бол, ямаршье дутагдалгүй буха шэлэн абаад, Эзэндэ һайшаагдахынь тула майхан һүмын үүдэндэ асараг. 4 Һайшаагдахынь тула, нүгэлөө сагааруулхын тула үргэл хэгшэ хүн тэрэ бухынгаа тархи дээрэ гараа табиг. 5 Тиигээд тэрэ Эзэнэй урда тус бухын амиинь таһалаг, санаарта Аһарооной хүбүүд шуһыень абаад, майхан һүмын үүдэндэ байһан үргэлэй шэрээгэй зүг бүхэниие сабдан сүршэхэ ёһотой. 6 Тиигээд түгэс шатаалта үргэл малай арһа үбшэжэ абаха, бэеынь үелэхэ хэрэгтэй. 7 Аһарооной уг удам болохо санаартад үргэлэй шэрээ дээрэ гал носоожо, түлеэ асараад, гал дээрэ табиг. 8 Тиигээд Аһарооной уг удам болохо тэдэ санаартад үргэлэй шэрээгэй гал дээрэ байгаа түлеэн дээрэ үргэһэн малай үенүүдые тархи болон дотор өөхэнтэйнь хамта дэлгэг. 9 Тагалсагуудыень, гэдэһэ доторыень уһаар угааха хэрэгтэй. Тиигээд санаартан эдэ бүгэдые үргэлэй шэрээ дээрэ шатаан үргэг. Энэ хадаа түгэс шатаалта үргэл гээшэ. Эзэндэ таатай һайхан үргэл, хуншуу үнэр гээшэ.

10 Хэрбээ хони ямаагаар түгэс шатаалта үргэл хэхэ гэбэл, зэмдэг дутагдалгүй хуса гү, али тэхэ асараг. 11 Тиигээд Эзэнэй урда, үргэлэй шэрээгэй хойто таладань асараад, амиинь таһалха ёһотой. Аһарооной санаартан үри һадаһад үргэлэй шэрээе шуһаарнь зүг бүхэнһөөнь сүршэг. 12 Үргэлые үелэн, хэдэн хуби болгоод, тархи болон дотор өөхэнтэйнь хамта үргэлэй шэрээ дээрэ носожо байһан түлеэн дээрэ дэлгээхэ ёһотой. 13 Гэдэһэ доторыень, тагалсагуудыень уһаар угааха хэрэгтэй. Санаартан үргэлэй шэрээ дээрэ бултыень дэлгээгээд, шатааг. Энэ хадаа түгэс шатаалта үргэл гээшэ. Эзэндэ таатай һайхан үргэл, хуншуу үнэр гээшэ.

14 Хэрбээ шубуу шонхорһоо Эзэндэ түгэс шатаалта үргэл хэхэ гэбэл, түүтэй шубуу гү, али залуу тагтаа шубуу асараг. 15 Санаартан тэрэниие үргэлэй шэрээдэ абаашаад, тархииень булга мушхаад, үргэлэй шэрээ дээрэ шатааг, харин шуһыень үргэлэй шэрээгэй хана руунь гоожуулаг. 16 Үдэ һодонгуудһаань баряад, шубуунай бэеһээ гэдэһэ доторынь илгажа таһалаад, үргэлэй шэрээгэй зүүн тала руу үнэһэн дээрэ хаяг. 17 Далинуудһаань баряад, бэеынь хэдэн хуби болгон хүсэд һалгангүй татажа, санаартан тэрэнииень үргэлэй шэрээ дээрэ галда шатааг. Энэ хадаа түгэс шатаалта үргэл гээшэ. Эзэндэ таатай һайхан үргэл, хуншуу үнэр гээшэ.