‏ Leviticus 10

Надааб Абиһуу хоёрой нүгэл үйлэдэлгэ, үхэлгэ

1Аһарооной Надааб Абиһуу хоёр хүбүүдынь өөр өөрынгөө согой амһарта абаад, тэрээн соо сог, уталга хээд, Эзэнэй хэжэ болохогүй гэһэн юумэ – нангин бэшэ гал Эзэндэ асарба. 2Эзэнһээ гал соробхилон, тэдэниие дүргөөжэрхибэ, тэдэнь Эзэнэй үмэнэ үхэшэбэ. 3Моисей Аһароондо үгүүлбэ:

– Эзэн энээниие айладаһан байгаал, иигэжэ үгүүлхэдээ: Намда дүтэ хүнүүд дээрэ Өөрын нангиниие харуулхаб; бүхы арад зоной үмэнэ Алдараа харуулхаб.

Аһароон абяа аниргүй байба. 4Моисей Аһарооной Үззиһээл абгын Мишаһээл ба Элцапаан хүбүүдые дуудаад, тэдээндэ хэлэбэ:

– Таанад ерээд, түрэл зонойнгоо бэенүүдые нангин газарһаа гаргаад, хотон хүреэнһөө холо абаашагты.

5Тэдэнь ерээд, Моисейн хэлэһээр тэдэниие хубсаһанһаань баряад, хотон хүреэнһөө холо абаашаба. 6Моисей Аһароон болон тэрээнэй Эльазаар Итамаар хоёр хүбүүдтэнь хэлэбэ:

– Үхэхэгүйн тула, уур хилэнгэйнь хамаг хүн зондо хүрэхэгүйн тула толгойгоо бү нюсэгэлэгты, хубсаһаа бү хахалагты, юрэдөө, гай гашуудалаа бү харуулагты. Зүгөөр Эзэнэй галаар дүргэгдэһэн тухай танай аха дүүнэр, бүхы израильшууд уйдхар гашуудалаа харуулхадань болохо. 7Харин таанад үхэхэгүйн тула майхан һүмэһөө бү гарагты, юуб гэхэдэ, Эзэнэй тоһолдог тоһон тан дээрэ байна бшуу.

Тиигээд тэдэ Моисейн хэлэһэн үгөөр болобо.

Санаартанай уялганууд

8Тиигээд Эзэн Аһароондо зарлиг буулгаба:

9– Ши болон шинии хүбүүд майхан һүмэ руу ороходоо, үзэмэй дараһан архи болон алибаа һогтохо унда бү уугты, үгы һаа, таанад үхэхэт. Энэ хадаа таанадта үеын үедэ мүнхэ хуули ёһо болоно. 10Таанад арюун ба бузарые, сэбэр ба сэбэр бэшые илгаха ёһотойт. 11Тиигээд Эзэнэй Моисейгээр дамжуулан үгэһэн хуулинуудта израильшуудые һургаха ёһотойт.

12Тиигээд Моисей Аһароондо, тэрээнэй үлэһэн Эльазаар Итамаар хоёр хүбүүдтэнь хэлэбэ:

– Эзэндэ үргэһэн үргэлһөө үлэһэн талхан үргэлыень абаад, эһээлтэгүй хилээмыень үргэлэй шэрээгэй хажууда эдигты. Энэ хадаа аргагүй ехэ нангинай нангин зүйл гээшэ. 13Энээниие арюун нангин газарта эдихэ ёһотойт. Энэ хадаа Эзэндэ үргэһэн үргэлэй шинии ба шинии хүбүүдэй нэрэтэ хуби гээшэ. Тиигэжэ намда захигдаһан юм. 14Тиигээд бэлэг гэжэ дэлгэгдэхэ үбсүүн ба бэлэг гэжэ үргэгдэхэ уусые ши өөрынгөө хүбүүд, басагадаараа хамта нэгэ сэбэр газарта эдеэрэй. Юуб гэхэдэ, энэ хадаа израильшуудай амгалан байдалай түлөө үргэһэн үргэлһөө шамда болон шинии хүбүүдтэ үгтэһэн нэрэтэ хуби гээшэ. 15Эзэнэй урда шинии үргэхын тула тэдэ үргэлэй өөхэнтэй хамта бэлэг гэжэ үргэгдэхэ ууса болон бэлэг гэжэ дэлгэн дэегдэхэ үбсүүе үгэхэ ёһотой. Энэ хадаа Эзэнэй захиралтаар шинии болон шинии хүбүүдэй хэтэ мүнхын нэрэтэ хуби болоно гээшэ.

16Нүгэл сагааруулгын үргэл болохо эшэгые Моисейн бэдэрхэдэнь, тэрэнь шатаагдашаһан байба. Энээниие мэдээд, Моисей Аһарооной үлэһэн Эльазаар Итамаар хоёр хүбүүдтэ уур сухалаа хүрөөд, иигэжэ хэлэбэ: ▼
▼ Нүгэл сагааруулгын үргэлэй мяхые санаартад эдидэг байгаа. Харин угаа ехээр бузарлагдаа гэжэ тоолоо һаа, тиимэ мяхые хотон хүреэнһөө гаргаад шатаадаг байгаа. Надааб Абиһуу хоёрой үхэл угаа ехээр майхан һүмые бузарлаа, нүгэлэйнь түлөө үргэгдэһэн мяхан хотон хүреэнһөө гадуур шатаагдаха ёһотой гэжэ Аһароон тоолоно. Моисей тэрэниие дэмжээ.

17– Таанад нүгэл сагааруулгын үргэлые арюун нангин газарта юундэ эдеэгүйбта? Энэ хадаа аргагүй ехэ нангинай нангин зүйл гээшэ. Тиигээд энэ арад зоной нүгэл даажа, тэрэ нүгэлыень Эзэнэй үмэнэ сагааруулхынтнай түлөө танда үгтэһэн гээшэ! 18Шуһанайнь нангин газарта асарагдаагүй байхадань, таанад тэрээниие арюун газарта эдихэ байгаат, иигэжэ намда захираа һэн.

19Аһароон Моисейдэ хэлэбэ:

– Мүнөөдэр тэдэ нүгэл сагааруулгын үргэл хээд, түгэс шатаалта үргэлөө Эзэнэй үмэнэ үргөөд байна. Энэ ушар намда тохёолдоһон байна. Хэрбэеэ нүгэл сагааруулгын үргэлые мүнөөдэр эдеэ һаамни, Эзэндэ таатай таарамжатай байха гээшэ гү?

20Энээнииень Моисей дуулаад, һайшааба.
Copyright information for BxrBBL2024