Lev 11 | BxrBBL2024 | STEP | Эзэн Моисей Аһароон хоёрто иимэ зарлиг буулгаба:

‏ Leviticus 11

Амитад тухай

1 Эзэн Моисей Аһароон хоёрто иимэ зарлиг буулгаба:

2 – Израильшуудта хэлэгты: Бүхы дэлхэй дээрэхи байгша амитанһаа танай эдижэ болохо амитад эдэ болоно: 3 малһаа асатаһан туруутай, хибэдэһэ хибэдэг мал эдижэ болохо.

4 Харин хибэдэһэ хибэдэг малһаа тэмээе бү эдигты, юундэб гэхэдэ, хибэдэһэ хибэдэгшье һаа, харин аса туруугүй, тиимэһээ танда бузартай болоно. 5 Баһа алаг дааган хибэдэһэ хибэдэгшье һаа, харин аса туруугүйн тула танда бузартай байха. 6 Баһа туулай хибэдэһэ хибэдэгшье һаа, харин аса туруугүйн тула танда бузартай байха. 7 Тиигээд гахай аса туруутай байбашье, харин хибэдэһэ хибэдэггүй, тиимэһээ танда бузартай байха. 8 Тэдэнэй мяханһаа бү эдигты, һэедэньшье гар бү хүрэгты; танда бузартай байха.

9 Уһанай амитадһаа һэрбээтэй болон хашарһатай далайн ба голой амитадые таанадай эдихэдэ болохо. 10 Зүгөөр һэрбээгүй, хашарһагүй далайн ба голой уһан соо ажамидардаг амитад танда бузартай байха. 11 Тэдэ танда бузар буртаг болохо. Тэдэнэй мяхыень бү эдигты, үхэһэн бэеһээньшье жэрхэн холуур ябагты. 12 Бүхы уһанай һэрбээгүй, хашарһагүй амитад танда бузар буртагтай.

13 Шубуудһаа бүргэд, шара шубуун ба харсагые эдихэеэ тэбшэгты. 14 Элеэ болон элдэб янза түрэлэй нашан эдижэ болохогүй. 15 Баһа элдэб янза түрэлэй хирээ бү эдигты. 16 Тэмээн шубуун, шара шубуун, хайлгана, элдэб янза түрэлэй харсага баһа эдихэ хэрэггүй; 17 тиигээд уули, тэмээн хяруул ба хара галуун; 18 хун шубуун, сахали ба хүхэ дэглээ шубуудһаа сээрлэгты. 19 Хилэн шубуун, суусагаалжан, бүбөөлжэн, һарьһан баабгай шубуудһаа баһа сээрлэгты.

20 Ямаршье дүрбэн хүлтэ амитад, жэгүүртэн, мүлхигшэд танда сээртэй юм. 21 Тиимэ болобошье, дүрбэн хүлтэ, жэгүүртэн, мүлхигшэдһөө гансал харайдагуудыень эдихэдэтнай болохо. 22 Харин тэжэн голёогой зүйл, тэжэгэр голёогой зүйл, хара голёогой зүйл, таршаагай зүйлнүүдые эдихэдэтнай болохо. 23 Бүхы бэшэ дүрбэн хүлтэй, ниидэдэг, мүлхигшэд танда сээртэй.

24 Тэдээнһээ таанад бузартахат. Али нэгэн тэдээнэй үхэһэн бэедэнь хүрөө һаа, тэрэ хүн үдэшэ болотор бузартай байха. 25 Али нэгэн тэдээнэй һэеые үргөө һаа, тэрэ хүн хубсаһаа угааха ёһотой, харин үдэшэ болотор бузартай байха.

26 Ямаршье мал аса туруутай болобошье, турууниинь хахалбаригүй, хибэдэһэ хибэдэггүй байбал, тэрэ мал бузартай байха. Али нэгэн тэдээнэй ойро хүрөө һаа, тэрэ хүн үдэшэ болотор бузартай байха. 27 Баһа алибаа дүрбэн хүлтэ амитадһаа һабараараа ябадагуудыень танда бузартай юм. Али нэгэн тэдээнэй үхэһэн бэедэнь хүрөө һаа, тэрэ хүн үдэшэ болотор бузартай байха. 28 Али нэгэн тэдээнэй үхэһэн бэедэнь хүрөө һаа, тэрэ хүн хубсаһаа угааха ёһотой, тиигээд үдэшэ болотор бузартай байха, юундэб гэхэдэ тэдэ танда сээртэй юм.

29 Газар дээрэ мүлхигшэдһөө танда сээртэйнүүдынь мана һохор, хулгана, гүрбэлэй зүйлнүүд болоно. 30 Тиигээд хүлтэ могой, гүрбэл, сүл газарай гүрбэл, эреэн гүрбэл болон зурма баһа танда сээртэй юм. 31 Эдэ бүгэдэ бүхы мүлхигшэдэй дундаһаа танда бузартай болоно. Али нэгэн тэдээнэй үхэһэн бэедэнь хүрэбэл, тэрэ үдэшэ болотор бузартай байха. 32 Баһа тэдээнэй үхэһэн бэень али нэгэн модон һаба гү, али хубсаһан гү, али аяга шанага гү, бэшэшье хэрэглэдэг юумэн дээрэ унабал, тэрэнь бузартай болохо. Тэрэниие уһанда хээд, үдэшэ болотор байлгаад, арюудхаха хэрэгтэй. 33 Харин хэрбээ үхэһэн бэень шабар һаба руу унаа һаань, һаба соо байгша юумэниинь бузартай болохо. Тэрэ һабыеньшье эбдэгты. 34 Алибаа эдихэ эдеэн дээрэ тиимэ һабаһаа уһан адхараа һаань, тэрэнь бузартай болохо. Алибаа ууха ундан тиимэ бузартаһан һаба соо байгаа һаа, тэрэ бузартай гээшэ. 35 Баһа тэдэнэй үхэһэн бэеһээнь юушье һаа, нэгэ юумэн дээрэ унаа һаань, тэрэ юумэниинь бузартай болохо. Пеэшэн ба шабар пеэшэн дээрэ унаа һаань, тэрэ эбдэгдэхэ ёһотой. 36 Зүгөөр булагууд болон уһатай худагууд бузарлагдангүй арюун зандаа үлэхэ. Харин тэдэнэй үхэһэн бэедэнь хүрэгшэ хүн бузартаха. 37 Хэрбээ үхэһэн амитан тариха таряан дээрэ унабал, тэрэ таряан бузартахагүй. 38 Зүгөөр тэрэ үхэһэн амитанай бэе уһаар норгоогдоһон үрэһэн дээрэ унаа һаань, тэрэнь танда бузартай байха.

39 Хэрбээ танай хоолдо ородог ямар нэгэн малай үхэхэдэ, тэрэнэй һэедэ хүрэһэн хүн үдэшэ болотор бузартай байха. 40 Хэн нэгэн малай һэе эдеэ һаа, хубсаһаа угааха ёһотой, тэрэ хүн үдэшэ болотор бузартай байха.

41 Газар дээгүүр мүлхидэг элдэб амитадые эдижэ болохогүй, тэдэ танда бузартай. 42 Олон хүлтэйшье, дүрбэн хүлтэйшье, гүзээн дээгүүрээ мүлхидэг, газар дээгүүршье мүлхидэг олон янзын амитадые бү эдигты, бузартахат. 43 Өөрынгөө бэе мүлхидэг амитадаар бү бузарлагты. Тэдээнһээ боложо, өөрыгөө бү бузарлагты, бэеэ бү муухай болгогты. 44 Юундэб гэхэдэ, Би танай Эзэнтнайб: бэеэ арюудхагты, арюун сэбэр бологты, юундэб гэхэдэ, Би танай Эзэн гэгээнби; газар дээгүүр мүлхидэг амитадаар һүр һүлдэеэ бү бузарлагты. 45 Танай Бурхантнай болохын түлөө Египедэй газарһаа таанадые гаргаһан Ззэн Бурхантнай гээшэб. Арюун сэбэр байгты, юундэб гэхэдэ Би – гэгээнби.

46 Энэ хуули адууһа мал, шубууд тухай, бүхы уһан соо ажамидардаг амитад тухай, бүхы мүлхидэг амитад тухай. 47 Энэ хуули бол бузартай бузаргүйень илгахын тухай, ямар амитадые эдижэ болохоб, ямарнуудыень эдижэ болохогүйб гэһэн тухай хуули болоно.