‏ Leviticus 12

Түрэхэ тухай

1Эзэн Моисейдэ иигэжэ айладхаба:

2– Израильшуудта хэлэ: Хэрбээ эхэнэрэй жэрмэһэн болоод, хүбүү түрөө һаань, тэрэ эхэнэр долоон хоногто бузартай байха; һарынгаа юумэ үзэһэн шэнги бузартай байха. 3Наймадахи хоногто үхибүүнэй бэлгын үзүүрэй арһа һэндэхэ ёһотойт. 4Тэрэ эхэнэр гушан гурбан хоногто арюун нангин юумэнэй ойро хүрэхэгүй, мүргэлэй газарташье ошохогүй, бэеынгээ арюун сэбэр болотор гэртээ һууха ёһотой. 5Хэрбээ тэрэ эхэнэрэй басага түрөө һаань, хоёр долоон хоногто бузартай байха. Тэрэ эхэнэр жаран зургаан үдэр бэеынгээ арюун сэбэр болотор гэртээ һууха ёһотой. 6Арюудхалгын хоног хүсөөгөөд, тэрэ эхэнэр хүбүүнэйнгээ гү, али басаганайнгаа түлөө хурьга түгэс шатаалта үргэл болгон, залуу тагтаа шубуу гү, али түүтэй шубуу нүгэл сагааруулгын үргэл болгон, майхан һүмын үүдэндэ санаартада асаржа үгэхэ ёһотой. 7Санаарта тэрээнииень Эзэндэ үргөөд, тэрэ эхэнэрые арюудхаха. Тэрэ үдэрһөө хойшо үхибүү түрэһэн эхэнэр арюун сэбэр гэжэ тоологдохо. Энэ хадаа нарайлалгын хуули болоно. 8Хэрбээ нарайлһан эхэнэр хурьга асарха шадалгүй байгаа һаа, хоёр залуу тагтаа шубуу гү, али хоёр түүтэй шубуу, нэгыень түгэс шатаалта үргэл болгон, нүгөөдыень нүгэл сагааруулгын үргэл болгон асараг. Санаартын арюудхалга хэхэдэнь, тэрэ үдэрһөө хойшо нарайлһан эхэнэр арюун сэбэр гэжэ тоологдохо.
Copyright information for BxrBBL2024