Lev 13 | BxrBBL2024 | STEP | Эзэн Моисей Аһароон хоёрто иимэ зарлиг буулгаба:

‏ Leviticus 13

Һэлхэ үбшэн тухай

1 Эзэн Моисей Аһароон хоёрто иимэ зарлиг буулгаба:

2 – Хэн нэгэнэй бэеынь арһанда хабдар гү, али элдин гү, али толбо, яра шарха гараа һаань, Аһароон санаартада, үгышье һаа, хүбүүдэйнь нэгэндэ харуулха ёһотой. 3 Санаарта бэеынь арһанда байһан яра хараад, хэрбээ яра шархын үһэн сайһан байгаа һаань, хэрбээ ярын бэеынь эдиһэн байгаа һаань, энэ һэлхэ үбшэнэй яра шарха гэжэ тодоруулха. Санаарта тэрэнииень үзөөд, тэрэ хүниие бузартай гэжэ тунхаглаха. 4 Хэрбээ хүнэй бэедэ сагаан толбо гараад, саашаа мяха руунь ороогүй һаань, үбшэн газарайнь үһэн сайгаагүй һаань, санаарта яратые долоон хоногто хааха ёһотой. 5 Долоодохи үдэртэ санаарта тэрээниие хараха ёһотой, шархань хубилаагүй һаань, саашаа һүжэрөөгүй һаань, тэрээниие санаарта үшөө долоон хоног соо хааха ёһотой. 6 Долоодохи үдэртөө санаарта тэрэ шархыень үзэхэ ёһотой, мүнөөхил зандаа байгаа һаань, тэрэ хүниие сэбэр гэжэ тоолохо, юундэб гэхэдэ, энэ элдин гээшэ, хубсаһаа угаагаад, сэбэр болохо ёһотой. 7 Хэрбээ санаартада ерээд, сэбэр гүүлэһэнэй һүүлээр, элдин саашаа бэедэнь тараа һаань, тэрэ хүн хоёрдохёо санаартада ерэхэ ёһотой. 8 Санаартын үзэхэдэ, элдин бэедэнь тараһан байбалнь, тэрээниие бузартай гэжэ тунхаглаха: энэ һэлхэ үбшэн гээшэ.

9 Хэрбээ хэн нэгэндэ һэлхэ үбшэнэй яра шарха бии болоо һаань, тэрэ хүниие санаартада асарха ёһотой. 10 Санаарта үзөөд, хэрбээ хабдарынь сагаан байгаа һаань, үһэниинь сайһан, хабдартань эдеэрлэһэн амиды мяхан байгаа һаань, 11 энэ хадаа арһанайнь үни болоһон һэлхэ үбшэн гээшэ; санаарта тэрэниие бузартай гэжэ тунхаглаад, хааха, юундэб гэхэдэ, тэрэ хүн бузартай болоно.

12 Хэрбээ һэлхэ үбшэн һүжэрөөд, санаартанай харахада, үбшэнтэниие толгойһоонь эхилээд, хүл хүрэтэрнь бүхы арһыень бүрхөөгөө һаань, 13 санаарта тэрэ үбшэн хүниие сэбэр гэжэ соносхохо, юундэб гэхэдэ, бүхы арһаниинь сагаан болоо: тиихэдээ сэбэр гэжэ тоологдохо. 14 Харин тэрэнь эдеэрлэһэн амиды мяхантай байгаа һаань, тэрэниие бузартай гэжэ тоолохо. 15 Санаарта тэрэ эдеэрлэһэн амиды мяха хараад, бузартай гэжэ тунхаглаха; амиды мяхан арюун бэшэ: энэ хадаа һэлхэ үбшэн гээшэ. 16 Хэрбээ амиды мяханиинь хубилжа, сагаан үнгэтэй болоо һаань, санаартада харуулхаа ерүүжэг. 17 Санаарта хараад, яра шархынь сагаан үнгэтэй болоо һаань, санаарта тэрэ үбшэнтэниие сэбэр гэжэ соносхохо; тэрэ арюун гээшэ.

18 Хэрбээ хэн нэгэнэй бэеын арһандань эдеэрэтэй хабдар гараад, эдэгээ һаань, 19 тиигээд эдеэрэтэй хабдарай һуурида сагаан хабдар бии болоо һаань, али сагаан толбо гү, али улаабтар толбо гараа һаань, тэрэ хүн санаартада ерэхэ ёһотой. 20 Санаарта һайса хараад, хэрбэеэ тэрэ толбо бэе руунь ороһон байгаа һаань, үһэнэйнь сайһан байгаа һаань, санаарта тэрэ хүниие бузартай гэжэ тунхаглаха. Юундэб гэхэдэ, энэ шархань эдеэрэтэй хабдар дээрэ бии болоһон һэлхэ үбшэнэй яра шарха гээшэ. 21 Хэрбээ санаартын харахада, үһэниинь сагаан бэшэ, шархань эли бэшэ байгаа һаань, тэрэ хүниие санаарта долоон хоногто хаалгада байлгаха ёһотой. 22 Хэрбээ үбшэнтэнэй арһанда яра шархань ехээр һүжэрөө һаань, санаарта тэрэ хүниие бузартай гэжэ тунхаглаха: энэ хадаа һэлхэ үбшэн гээшэ. 23 Хэрбээ тэрэ толбо саашаа һүжэрөөгүй һаань, энэ эдеэрэтэй хабдар гээшэ. Тиин санаартан тэрэ үбшэнтэниие арюун гэжэ тунхаглаха.

24 Хэрбээ хэн нэгэнэй бэедэ шатанхай шарха байгаад, эдэгэһэн һууридань улаабтар гү, али сагаан толбо байгаа һаань, 25 санаарта хараад, толбо дээрэхи үһэниинь сайһан, толбо арһа руунь ороһон байгаа һаа, энэ шатанхай шарха дээрэ бии болоһон һэлхэ үбшэн гээшэ. Санаарта тэрэ хүниие бузартай гэхэ. 26 Хэрбээ санаартын харахада, толбо дээрэхи үһэниинь сайгаагүй, шархань саашаа мяха уруунь ороогүй, хүнэй харахада, эли бэшэ байгаа һаань, санаарта тэрээниие долоон хоногто хаалтада байлгаха ёһотой. 27 Долоодохи хоногтоо санаартын тэрэниие харахадань, үбшэнэйнь һүжэржэ, арһан дээгүүрнь тарашаһан байгаа һаань, тэрэниие санаарта сэбэр бэшэ гэжэ тунхаглаха. Энэ хадаа һэлхэ үбшэнэй яра шарха гээшэ. 28 Хэрбээ арһан дээрэхи толбонь саашаа һүжэрөөгүй, хүнэй харахада, эли бэшэ байгаа һаань, энэ хабдар шатангирһаа хубилһан шарха гээшэ. Санаарта тэрээниие арюун гэжэ соносхохо, юундэб гэхэдэ, энэ хабдар шатангирһаа болоо.

29 Хэрбээ эрэ хүнэй гү, али эхэнэрэй толгойдо, үргэн дээрэ яра шарха гараа һаань, 30 санаартын тэрэ яра шархыень харахадань, мяха уруунь ороһон, үһэниинь шарабтар, нариихан болоһон байгаа һаань, санаарта тэдэниие бузартай гэжэ соносхохо. Энэ хамуу үбшэн гээшэ, хүнэй толгойдо гү, али үргэн дээрэ гараһан һэлхэ үбшэн гээшэ. 31 Хэрбээ санаартын харахада, хамуугай яра шарха саашаа һүжэржэ, мяха уруунь ороогүй, үһэ үсөөн, халсагар байгаа һаань, санаарта хамуутай хүниие долоон хоногто хаалгатай байлгаха. 32 Долоодохи хоногто санаарта яра шархыень хараха, хэрбээ шархань саашаа һүжэрөөгүй, шарабтар үһэгүй, хамуу арһа руунь ороогүй байгаа һаань, 33 хамуутай хүнэй үһыень хайшалха, харин элдин яра шархатай газартань хайшалхагүй. Санаарта хамуутай хүниие долоон хоногто хаалгатай байлгаха. 34 Долоодохи үдэртөө санаарта хамуугай яра хараха, хэрбээ элдин саашаа һүжэрөөгүй, арһа уруунь ороогүй байгаа һаань, санаарта тэрэниие сэбэр гэжэ соносхохо. Хубсаһаа заатагүй угааха ёһотой, тиигээд сэбэр арюун болохо. 35 Хэрбээ арюудхалгын һүүлээр арһандань хамуугай ехээр һүжэрөө һаань, 36 санаарта тэрэ хүнэй хамуунь ехээр һүжэрөө гэжэ харахадаа, шарабтар үһэ бү бэдэрэг, юундэб гэхэдэ, тэрэ хүн бузартай. 37 Хэрбээ хамуу тэрэл зандаа байгаа һаань, дээрэнь һайн үһэн ургажа эхилжэ байгаа һаань, элдин үбшэниинь арилаа гээшэ, тэрэ хүн сэбэр. Санаарта тэрэниие сэбэр гэжэ тунхаглаха.

38 Хэрбэеэ эрэ хүнэй гү, али эхэнэр хүнэй бэеынь арһанда сагаан толбонууд байгаа һаань, 39 Санаартын харахада, сагаан толбонууд бүүдэгэр болоод байгаа һаа, энэ арһандань тараһан хамуу гээшэ, тэрэ хүн сэбэр гэжэ тоологдохо. 40 Хүн иихэдээ арюун гэжэ тоологдохо.

41 Хэрбээ али нэгэнэй толгойн үһэниинь урдаа унаад, халзан болоо һаань, тэрэ халзан малаан гээшэ: тэрэ сэбэр гэжэ тоологдохо. 42 Хэрбээ духын халзан дээрэ гү, али сохын халзан дээрэ сагаа улаан толбо бии болоо һаа, тэрэ газарта һэлхэ үбшэн бии болоо гэжэ тоологдохо. 43 Санаарта тэрэнииень хараад, халзан газартань сагаан гү, али улаабтар үнгэтэй хабдар байгаа һаань, арһанай һэлхэ үбшэндэ адли, 44 тэрэ һэлхэ үбшэнтэй бузартай хүн гээшэ. Санаарта тэрээниие бузартай гэжэ соносхохо.

45 Тэрэ яра шархатай һэлхэ үбшэнтэн хахарһан хангирһан хубсаһа үмдөөд, тархи нюсэгэн, аман хүрэтэрөө нюураа хаагаад: «Бузартайб! Бузартайб!» – гэжэ хашхарха ёһотой. 46 Тэрэ хүн бүхы үдэрнүүдтэ, шархынь байгаа сагта, арюун бэшэ гэжэ тоологдохо ёһотой, тэрэ хүн бузартай, тиимэһээ тэрэ хүн байраһаан холо, амяараа байрада байха ёһотой.

47 Хэрбээ һэлхэ үбшэнэй яра шарха нооһон гү, али маалинга хубсаһанда няалдаад, 48 үгышье һаа, маалинга гү, нооһон утаһанай утаашадань гү, хүндэлэндэнь гү, арһанда гү, али арһаар хэһэн юумэндэ няалдаад, 49 ногообтор гү, али улаабтар үнгэтэй байгаа һаань, арһандань, хубсаһандань, арһаар хэһэн юумэнүүдтэнь няалдаһан байгаа һаань – энэнь һэлхэ үбшэнэй яра шарха гээшэ. Тэрээниие санаартада харуулха хэрэгтэй. 50 Санаарта хараад, яра шарха халдаһан юумэнүүдыень долоон хоногто ондоо тээ байлгаха ёһотой. 51 Долоодохи үдэртөө санаарта тэрэ халдаһан юумэнүүдыень хараад, хэрбээ тэрэ шархын хубсаһанда гү, али утаашаа ба хүндэлэн утаһандань тараад байгаа һаань, тэрэ хоротой һэлхэ үбшэн, бузартай яра шарха гээшэ гэхэ. 52 Тэрэ хүн үмдэһэн бүхы хубсаһаяа шатааха ёһотой. Бүхы хубсаһаниинь нооһоншье, маалингашье, арһаншье байг, утаашаа болон хүндэлэн утаһанииньшье галда шатаагдаха ёһотой, юундэб гэхэдэ, хоротой һэлхэ үбшэнэй яра шарха халдаһан байна.

53 Хэрбээ санаартын харахада, яра шархань хубсаһандань, нэхэлгын утаашаа болон хүндэлэн утаһандань, арһан юумэндэнь ехээр тараагүй байгаа һаань, 54 санаарта яра шархатай юумэнүүдыень угаалгаад, долоон хоногто аминдань хадагалаад байлгаха. 55 Хэрбээ санаартын харахада муухай болоһон хубсаһа угааһанай һүүлээр яра шархань үшөө хубилаагүй, саашаа дэлгэрээшьегүй байгаа һаань, газаа, дотороошье эдигдэһэн байг, тэрэ юумэн бузартай, тэрээниие галда шатааха хэрэгтэй. 56 Хэрбээ санаартын харахада, угааһанай һүүлээр яра шархань эли бэшэ болоод байгаа һаань, санаарта тэрэ бүдэй, арһанай хуби, утаашаа гү, хүндэлэн гү утаһа таһалжа абаг. 57 Хэрбээ яра шархын толбо дахяад хубсаһанда гү, али утаашаа гү, хүндэлэн утаһанда гү, али арһан зүйлдэ бии болоо һаань, тэрэ һүжэрһэн яра шарха гээшэ: яра шархатай, юумые галдаха хэрэгтэй. 58 Хэрбээ хубсаһа гү, али утаашаа болон хүндэлэн утаһа гү, али арһан зүйл угааһанай һүүлээр, яра шархань һалаашье һаань, тэдэниие дахин угааха хэрэгтэй, тиихэдээ тэдэнь арюун бузаргүй болохо.

59 Энэ хадаа нооһон хубсаһанда гү, али маалинга хубсаһанда гү, али утаашаа болон хүндэлэн утаһанда гү, али нэгэ арһан зүйлдэ гараһан, һэлхэ үбшэнэй яра шарха тухай, ямар ёһоор тэдэ бузартай, бузаргүй гэжэ тунхаглагдаха ёһотой тухайнь хуули болоно.