‏ Leviticus 18

Ташаяангы хурисал тухай

1Эзэн Моисейдэ зарлиг буулгаба:

2– Израильшуудта иигэжэ үгүүлэ: Би хадаа танай Эзэнби. 3Танай һуужа байһан Египет газарай ёһо заншалаар бү ябагты. Минии таанадые абаашажа ябаһан Ханаһаан газарай ёһо заншал бү баримталагты. Тэдэнэй тогтоолнуудаар бү ябагты. 4Минии хуулинуудые үйлэдэжэ, Минии тогтоолнуудые сахижа, Минии ёһо баримталан ябагты. Би хадаа танай Эзэн Бурханби. 5Минии тогтоол болон хуулинуудаар ябагты. Тэдэниие сахижа ябаһан хүн амиды ябаха. Би Эзэнби.

6Хэншье өөрынгөө ойрын түрэл хүнтэй ташаяангы хурисал үйлэдэхэ ёһогүй. Би хадаа Эзэнби.

7Эхэтэеэ ташаяангы хурисал үйлэдөөд, эсэгынгээ нэрэ бү гутаа. Өөрынгөө эхэтэеэ ташаяангы хурисал бү үйлэдэ. Шинии эхэ гээшэ.

8Эсэгынгээ һамгантай ташаяангы хурисал бү үйлэдэ, тиигэжэ ши эсэгынгээ нэрэ гутаанаш.

9Эсэгынгээ гү, али эхынгээ басагантай, гэртэшье түрэһэн, үгы һаа, гаднашье түрэһэн өөрынгөө эгэшэ дүүнэртэеэ ташаяан бү үйлэдэ.

10Өөрынгөө хүбүүнэй басагантай, үгы һаа, басаганайнгаа басагантай ташаяан бү үйлэдэ. Тэдэ шинии үри һадаһан болоно гээшэ.

11Түрэһэн эсэгыншни аад, хойто эхэһээ гараһан басагантай ташаяан бү үйлэдэ. Тэрэшни шинии эсэгээр түрэһэн дүүшни болоно. Таанад нэгэ эсэгэтэй түрэһэн аха дүүнэр болонот.

12Эсэгынгээ эгэшэ дүүнэртэй ташаяан бү үйлэдэ. Тэдэ шинии эсэгын ойрын түрэл болоно.

13Эхынгээ эгэшэ дүүнэртэй ташаяан бү үйлэдэ. Тэдэ шинии эхын ойрын түрэл болоно.

14Эсэгынгээ ахын һамганда ташаяан үйлэдэхын тула бү ойрто. Тэрэ шинии эгэшэ болоно.

15Өөрынгөө бэритэй ташаяан бү үйлэдэ. Тэрэшни шинии хүбүүнэй һамган болоно, тэрээнтэй ташаяан бү үйлэдэ.

16Өөрынгөө аха дүүнэрэй һамгадтай ташаяан бү үйлэдэ. Тиигэжэ ши аха дүүнэрэйнгээ нэрые гутаанаш.

17Эхэ басаган хоёртой ташаяан бү үйлэдэ. Һамганайнгаа хүбүүнэй басага, басаганайнь басагыешье бү аба. Тэдэнтэй ташаяан бү үйлэдэ. Тэдэшни шинии һамганай ойрын түрэл болоно. Үгы болбол, энэ һальхай һамуу ябадал гээшэ.

18Һамганайнгаа амиды мэндэ байхада тэрээнэй эгэшэ дүүень ташаяан үйлэдэхэеэ һамган болгожо бү аба.

19Һамганайнгаа һарынхиинь ерэхэдэ, ташаяан үйлэдэхэеэ бү ойрто.

20Ондоо хүнэй һамгантай ташаяан бү үйлэдэ, бузартахаш.

21Өөрынгөө үри хүүгэдээ Моолохто бү һүгэдүүлэ, өөрынгөө Бурханай нэрэ гутаахаш. Би хадаа Эзэнби.

22Һамгантай хэбтэһэн мэтээр эрэ хүнтэй бү хэбтэ, энэ жэгшүүритэй ябадал гээшэ.

23Ямаршье адуу малтай хэбтэжэ, бэеэ бү бузарла. Һамгадшье адуу малай урда бү хэбтэг. Энэ хадаа забхайрһан ябадал гээшэ.

24Таанад энэ мэтээр аашалаад, өөрыгөө бү бузарлагты, юундэб гэхэдэ, энэ мэтэ забхайралга үйлэдэһэн энэ нютагай хүн зониие Би эндэһээ орогүй үлдөөб. 25Тэрэ газарай бузарлагдахадань, тэрээниие нүгэл хилэнсынь түлөө хэһээгээб: тэрэ газар дээрэнь һуугшадые бөөлжөөд гаргажархибаб. 26Тиимын тула таанад Минии тогтоол болон һургаалнуудые сахижа ябагты, элдэб муухай жэгшүүринүүдые хэншье болбол, хари хүншье хадаа, ерүүлшье хүн хадаа бү үйлэдэгты. 27Эдэ элдэбын жэгшүүринүүдые танһаа урид энэ газарта һууһан арад зоной үйлэдэһэндэл адли таанадай тэрэ газарые бузарлаа һаатнай, 28тэрэ газар тэрэниие бузарлажа эхилхэдэтнай таанадһаа урид һууһан арад зониие бөөлжэн гаргаһан мэтээр таанадыешье гаргажа болохо.

29Али хэн нэгэн энэ мэтэ жэгшүүринүүдые үйлэдөө һаа, тэрэ хүн ами наһаяа хосороожо һалаха. 30Тиимын тула таанад Минии захиһан захиралтануудые сахигты, таанадһаа урид үйлэдэһэн жэгшэгүүринүүдые бү үйлэдэгты, тэдэнээр бэеэ бү бузарлагты. Би болбол танай Эзэнтнайб.