‏ Leviticus 19

Арюун сэбэр байха тухай

1Эзэн Моисейдэ үгүүлбэ:

2– Израилиин олониитэдэ тунхагла: Таанад арюун нангин байгты, юуб гэбэл, Би танай Эзэн Бурхантнай арюун нангин байнаб.

3Таанад өөһэдынгөө эхэ эсэгэһээ түбэгшөөгты. Минии субботонуудые сахигты. Би танай Эзэн Бурхантнай гээшэб.

4Онгондо бү хандагты, шудхамал бурхадые өөһэдтөө бү хэгты. Би танай Бурхан, Эзэн гээшэб.

5Өөртөө аша туһатай байхын түлөө Бурханда амгалан байдалай түлөө үргэл үргэгты. 6Таанад үргэл хэһэн үдэртөө, үглөөдэрынь үргэлһөө ама хүрэхэ ёһотойт, харин гурбадахи үдэртөө үргэлһөө үлэһыень шатаахат. 7Хэн нэгэн гурбадахи үдэртөө үлэһэн үргэлэй юумэнһээ ама хүрөө һаа, энэ бузар муухай гээшэ, һайн байхагүй даа. 8Хэн гурбадахи үдэрэй үргэлһөө эдижэ захалааб, тэрэ хүн нүгэлтэй, Эзэнэй нангин шүтөөн бузарлаба гээшэ, ами наһаяа хосороохонь гээшэ.

9Өөрынгөө газар дээрэ таряа хадахадаа, дууһан бү хуряагты, захадань үлөөгты. Хуряалгын һүүлдэ үлдөөсыень бү суглуулагты. 10Юушье үлөөнгүй үзэм жэмэсээ бү суглуулагты, унаһан жэмэсээ бү түүгты. Үгытэйшүүлдэ, ерүүл зондо үлөөгты. Би Эзэнби, танай Бурхантнайб.

11Хулгай бү хэгты, худалаар бү хэлэгты, бэе бэеэ бү мэхэлэгты.

12Намайе урдаа баряад, тангариг бү хэлэгты. Бурханайнгаа нэрэ бү гутаагты. Би Эзэн гээшэб.

13Хажуудахи хүнөө бү гомодхоо, юумэ бү тоно. Зараһан хүнэйнгөө түлбэри үглөөдэр болотор бү удааруула.

14Дүлии хүниие бү хараа, һохор хүнэй урда торожо унахынь түлөө юумэ бү таби. Өөрынгөө Бурханһаа һүрдэн ай. Би Эзэн гээшэб.

15Зарга шүүбэридэ ороходоо, худалаар бү хэлэгты. Үгытэй хүнэй нюур бү сахигты. Ехэ хүндэ бү һүгэдэгты. Хажуудахи хүнэйнгөө үйлэ хэрэг үнэн сэхээр шүүбэрилэгты.

16Улад зоной дунда элдэб юумэ бү тараагты, дүтынгөө хүнэй ами наһанда бү хүрэгты. Би Эзэн гээшэб.

17Аха дүүнэртэеэ эбээ бү таһарагты. Дүтынгөө хүнэй үйлэ хэрэгые зүб мүрөөр шиидхэгты, тэрэнэй түлөө нүгэл даажа абахагүйт.

18Өөрынгөө яһанай хүндэ бү үһөөрхэгты, бү сухалдагты. Дүтынгөө хүндэ өөртөөл адли дуратай байгты. Би Эзэн гээшэб.

19Минии тогтооһон ёһо гуримые сахигты, малаа ондоо үүлтэртэй малтай бү холигты, таряаландаа хоёр ондоо үрэһэ бү таригты, олон ондоо утаһаар, нооһон ба маалинга утаһаар оёһон хубсаһа бү үмдэгты.

20Хэн хадамтай һамгантай унтааб, тэрэниие хэһээхэ хэрэгтэй, харин үхэл хүрэтэрнь хэһээхэ хэрэггүй. 21Эзэндэ майхан һүмын үүдэндэ тэрэ хүн гарза харюулгын үргэл болгон хони асараг. 22Нүгэлыень арилгахын тула санаарта Эзэнэй үмэнэ хонёор гарза харюулгын үргэл үргэжэ, нүгэлыень арюудхаха, нүгэлыень сагааруулха ёһотой.

23Тэрэ газарта ерэхэдээ, жэмэстэ модонуудые һуулгагты. Гурбан жэл соо ургаһан үриень эдихэгүйт. 24Дүрбэдэхи жэлдэ бүхы гараһан жэмэсые Эзэндэ зорюулагдаһан һайндэрнүүдтэ зорюулжа, үргэхэ ёһотойт. 25Табадахи жэлдэ гараһан бүхы үрэ жэмэсые өөһэдөө эдихэдэтнай болохо. Би Эзэн, танай Бурхантнай гээшэб.

26Шуһатай юумэ бү эдигты, үзэл бү үзүүлэгты.

27Толгойгоо түхэреэлжэ үһөө бү хюһагты. Һахалайнгаа үзүүр бү гутаагты.

28Үхэһэн хүнэй түлөө бэеэ бү хадхагты. Бэедээ тэмдэгүүдые бү зурагты. Би Эзэн гээшэб.

29Басагаяа бү бузарлагты. Һальхай ябадалтай болохо. Байһан газартнай һальхай һамуу ябадалаар дүүрэхэ.

30Минии субботонуудые сахигты, нангин шүтөөндэмни шүтэгты. Би Эзэн гээшэб.

31Үхэһэн хүнүүдые уригшадта бү хандагты, эльбэ шэжэ хэдэг хүнүүдтэ бү харгылагты. Таанад тэдээнһээ бузартахат. Би Эзэн, танай Бурхантнайб.

32Буурал толгойтой үбгэд хүгшэдэй урда бү һуугты, үбгэн хүниие хүндэлжэ, бодогты. Өөрынгөө Бурханһаа һүрдэн айгты.

33Танай газарта ерэһэн уладые бү газаалагты. 34Танай нютагта байрлаһан ерүүл хүн танай газарай хүн болоно. Өөртөө дуратай байгшадал мэтэ, тэрээндэ дуратай бай. Таанадшье Египедэй газарта ерүүл зон байгаа ха юмта. Би Эзэн, танай Бурхантнай гээшэб.

35Үйлэ хэрэгүүдтээ үнэн сэхэ байгты, шэгнүүртэ, утын ба хүндын хэмжүүртэ үнэн сэхээр байгты. 36Танай хэмжүүр, шэгнүүр, гиири, эфаа, гиин зүбөөр харуулдаг байг.

Египедэй газарһаа таанадые гаргаһан Эзэн, танай Бурхантнай гээшэб.

37Минии гаргаһан ёһо гуримуудые, тогтоол хуулинуудые сахижа ябагты. Би Эзэн гээшэб.