Leviticus 2
Талхан үргэл
1Хэрбээ али нэгэн Эзэндэ талхан үргэл хэхэ гэбэл, шэниисын гурил асараг, тэрээндээ оливын тоһо адхаад, дээрэнь гүгэл хээд, 2Аһарооной санаарта хүбүүдтэ асараг лэ. Санаартан дүүрэн адха оливын тоһотой, гүгэлтэй гурил абаад, үргэлэй шэрээ дээрэ галдаг. Энэ хадаа үргэлэй тэмдэг хуби гээшэ, Эзэндэ таатай һайхан үргэл, хуншуу үнэр гээшэ. 3Талхан үргэлэй үлэгдэл хадаа Аһароондо ба тэрээнэй хүбүүдтэ хүртэхэ ёһотой. Энэ хадаа нангин, юуб гэхэдэ, Эзэндэ үргэһэн үргэлнүүдһээ абтаһан мүн. 4Хэрбээ үргэл болгон пеэшэн соо болгоһон хилээмэнһээ асараа һаа, эһээлтэгүй шэниисын гурилаар бариһан оливын тоһотой хилээмэ, оливын тоһоор тоһодоһон, эһээлтэгүй гурилаар бариһан лепёошхо асара. 5Хэрбээ талхан үргэлөө яла соо болгоһон байбал, тэрэнээ оливын тоһондо зуураһан, эһээлтэгүй шэниисын гурилаар бариһан байха ёһотойш. 6Лепёошхо хэсэг хэсэгээр хухалаад, дээрэһээнь оливын тоһо адха: энэ хадаа талхан үргэл гээшэ. 7Хэрбээ талхан үргэлэйшни хайруул дээрэ шарагдаха байбал, тэрэниие оливын тоһотой худхаһан шэниисын гурилаар бариха ёһотой. 8Иигэжэ бэлдэһэн үргэлөө Эзэндэ зорюулжа, санаартанда барюула, тэрэ үргэлыешни үргэлэй шэрээдэ абаашаха. 9Тэрэ үргэлһөөшни санаартан нэгэ хэдыень үргэлэй тэмдэг хуби гэжэ абаад, үргэлэй шэрээ дээрэ шатааха ёһотой: энэ хадаа Эзэндэ таатай һайхан үргэл, хуншуу үнэр гээшэ. 10Талхан үргэлэй үлэгдэл хадаа Аһароондо ба тэрэнэй хүбүүдтэ хүртэхэ ёһотой: энэ хадаа Эзэнэй үргэлнүүдһээ абтаһан нангинай нангиниинь гээшэ. 11Эзэндэ талхан үргэл бүтээхэдээ, эһээлтэтэй талхаар бү баригты, юундэб гэхэдэ эһээлтэтэй гү, али балатай юумэн үргэлэй шатаалганда орохо ёһогүй. 12Харин тэдэниие Эзэндэ зорюулһан ургасын дээжэ гээд асаржа болохо, зүгөөр Тэрээндэ таатай һайхан үнэр гэжэ үргэлэй шэрээ дээрэ галдажа болохогүй. 13Бүхы талхан үргэлөө дабһаар дабһала. Бурхантайтнай баталһан хэлсээнэй дабһан заабол үргэл соотнай байха ёһотой. Үргэл бүхэндөө дабһа хээрэй. 14Эзэндэ түрүүшын ургасаһаа талхан үргэл үргэхэдөө, түрүүшын ургасын орооһо гал дээрэ хатаагаад, нюдөөд, 15дээрэнь оливын тоһо нэмээд, гүгэл хэ: энэ хадаа таряа талханай үргэл гээшэ. 16Санаарта тэрэ үргэлэй тэмдэг хубиие – зарим таряаень тоһотойнь, гүгэлтэйнь галда шатааха: энэ хадаа Эзэндэ үргэл болоно гээшэ.
Copyright information for
BxrBBL2024