‏ Leviticus 20

Элдэб юумэн тухай

1Эзэн Моисейдэ үгүүлбэ:

2– Израильшуудта хэлэ: Израильшуудай дундаһаа, тэдэнэй дунда байдаг ерүүл зоной дундаһаа хэн нэгэн өөрынгөө хүүгэдые Моолохто үгөө һаа, алуулагдаха. Арад зон тэрэниие шулуугаар шэдэжэ алаха. 3Би уурлан тэдээн руу эрьехэб, нюураараа тэрэ хүниие харахаб, тэрэниие хюдажа алахаб. Тэрэ хүн хадаа Моолохто үхибүүдһээнь үгэжэ, нангин байрыем бузарлаа, нангин нэрыемни гутаагаа. 4Хэрбээ арад зон Моолохто үхибүү үгэһэн хүндэ хандажа, тэрэниие үгы хээгүй һаань, 5би тэрэ хүниие, тэрэнэй түрэл түрсэдые, тэрээнтэй хамта Моолохто мүргэн, һальхай забхай ябадал хэжэ ябаһан улад зониие үгы хэхэб.

6Хэрбээ хэн нэгэнэй үхэһэн хүниие дуудадаг хүндэ, эльбэ шэжэ хэдэг хүндэ хандаа һаань, Би тэрээндэ уурлажа усадхахаб, арад зонойнгоо дундаһаа тэрэ үгы болохо.

7Өөрыгөө арюудхагты, арюун сэбэр байгты, юуб гэхэдэ, Би Эзэнби, Бурхантнайб. 8Минии тогтоол хуулинуудые сахигты, дүүргэгты, юуб гэхэдэ, Би таанадые арюудхадаг Эзэн гээшэб.

9Хэн эхэ эсэгэеэ муудхажа хэлэнэб, тэрэ алуулха. Эхэ эсэгэеэ муудхажа хэлэһэнһээ боложо, тэрэ гэм зэмэтэй болохо.

10Хэн хадамтай һамгантай унтанаб, хэн танилайнгаа һамгантай унтанаб, тэдэ урбагшад хоюулан алуулха ёһотой. 11Хэн эсэгынгээ һамгантай хэбтэбэб, тэрэ хүбүүн һамган хоёр алуулха ёһотой. Тэдэнэй шуһа урасхуулһанай гэм өөһэдэйнь гэм болохо. 12Хэн нэгэн өөрынгөө бэритэеэ унтаа һаа, тэдэ зэбүүрхэмэ муухай юумэ үйлэдэһэнһөө боложо, хоюулаа алуулха ёһотой.

13Эрэ хүн эрэ хүнтэй хурисал үйлэдөө һаа, зэбүүрхэмэ муухай юумэ хээ гээшэ. Тэдэ хоюулаа алуулха ёһотой.

14Хэн һамганайнгаа эхээр һамга хэнэб, тэдэ хуулида харша юумэ үйлэдөө, тэдэниие галдажа, үгы хэхэ ёһотой.

15Эрэ хүн үхэр малтай хурисалдабал, тэрэниие үгы хэхэ хэрэгтэй, үхэр малыень алагты. 16Хэрбээ эхэнэр хүнэй үхэр малтай хурисалдаа һаань, тэрэниие малтайнь алаха ёһотой.

17Хэн эгэшэ дүүтэеэ хурисал үйлэдөөб, эсэгынгээ басагантай гү, али эхынгээ басагантай хурисалдааб, тэдэ жэгшүүритэй муухай юумэ үйлэдөө, тэдэниие хүн зоной урда алаха ёһотой.

18Хэн һамганайнгаа һарын юумэнэй гаража байхада, унтанаб, тэдэниие үгы хэхэ ёһотой.

19Хэн нэгэн эхынгээ дүүтэй гү, али эсэгынгээ дүүтэй хурисал үйлэдөө һаа, ехэ нүгэл хэбэ гээшэ. 20Хэн нэгэн өөрынгөө абгайтай хурисал үйлэдөө һаа, ехэ нүгэл хэбэ гээшэ. Тэдэ үри хүүгэдгүй болоод үхэхэ. 21Хэн нэгэн өөрынгөө ахын гү, али дүүгэйнгөө һамгантай хурисалдаа һаа, ехэ жэгшүүритэй муухай юумэ үйлэдөө гээшэ. Тэдэ үри хүүгэдгүй байха.

22Минии ёһо гуримуудые, тогтоол хуулинуудые сахигты, дүүргэгты. Тиигэбэл, Минии таанадые хүтэлжэ абаашаха газарни таанадые абажа хаяхагүйл. 23Таанадһаа Минии намнаһан зоной ёһо гуримаар бү ябагты. Юундэб гэхэдэ, тэдэ бүхы муухай юумэ үйлэдөө, тиихэдэнь тэдэндэ ехээр дураа гутаһандаа намнаа һэм. 24«Үрэжэлтэй һайхан энэ газарые таанадай харьяата газар болохо,» – гэжэ найдуулаа һэм. Тиигээд мүнөө тэрэниие үгэнэб. Би танай Эзэн гээшэб, таанадые бусад арадуудһаа илган шэлээ һэм.

25Сээртэй, сээргүй мал, шубуудые таанад илгаруулдаг байха ёһотойт. Сээртэй ан амитадые, шубуудые бү эдигты. Би тэдэниие сээртэй, сээргүй гээд илгаа бэлэйб. 26Таанад арюун байжа, гансал Минии арад түмэн байха ёһотойт. Юуб гэбэл, Би Эзэн гээшэб, Би арюун нангин гээшэб, гансал Минии байхынтнай түлөө ондоо арадуудһаа таанадые илган абааб.

27Үхэһэн хүниие дуудажа, зүбшэжэ байһан, эльбэ жэльбэ хэрэглэһэн эхэнэр, эрэшье хүниие шулуугаар сохижо алаха хэрэгтэй. Өөһэдөө тэдэ зэмэтэй.