‏ Leviticus 21

Санаартад тухай

1Эзэн Моисейдэ үгүүлбэ:

– Санаартада, Аһарооной хүбүүдтэ, тунхагла: Наһа бараһан түрэлэйнгөө хэн нэгэндэ ойро хүрөөд, өөрыгөө бү бузарлагты. 2Өөрынгөө дүтын түрэлэй наһа бараһан хүнэй ойро: эхэ эсэгынгээ, хүбүүнэйнгээ, басаганайнгаа, аха дүүгэйнгээ, 3эгэшэ, дүү басаганайнгаа, сугтаа ажаһууһан хадамда гараагүй басаганайнгаа ойро хүрэхэдэ болохо, тэдээндэ хүрөө һаа, бэеэ бузарлахагүй. 4Өөрынгөө арад зоной ямаршьеб даа бусад түрэлэйнгөө ойро хүрөөд, бэеэ бү бузарлагты.

5Тэдэ толгойнгоо үһэ бү хюһаг, һахалаа бү хиргаг, бэеэ бү хадхаг. 6Тэдэ өөрынгөө Бурханай үмэнэ нангин арюун сэбэр байха ёһотой, Бурханайнгаа нэрэ гутааха ёһогүй, юундэб гэхэдэ, Эзэндэ үргэл үргэнэ, Бурхандаа хилээмэ үргэнэ, иимын тула арюун нангин байха ёһотой.

7Тэдэ һалихай эхэнэртэй, нэрээ хухарһан эхэнэртэй ушарха ёһогүй, үбгэндөө голуулһан эхэнэрые һамга абаха ёһогүй, юуб гэхэдэ, тэдэ өөрынгөө Бурханай үмэнэ арюун нангин ха юм. 8Тэрэниие арюудха, юуб гэхэдэ, шинии Бурханда хилээмэ үргэнэ: нангин арюун байг лэ, юуб гэхэдэ, Би таниие арюудхадаг арюун нангин Эзэн гээшэб.

9Хэрбээ санаартын басаган эсэгынгээ нэрэ гутаажа, зайгуултажа, һалихайраа һаань, тэрэниие галдажа, үгы хэхэ ёһотой.

10Аха дүүнэрэй эгээл ахань, санаартан, толгой дээрээ санаартын тоһо адхуулжа арюудхагдаһан, арюун нангин хубсаһа үмдэхэ эрхэтэй, толгойгоо нюсэгэн байлгахагүй, хубсаһаа хахалха, удара татаха ёһогүй. 11Ямаршье үхэһэн хүндэ дүтэлхэ ёһогүй, ойронь хүрэхэгүй, наһа бараһан эсэгэ эхынгээшье ойро хүрэжэ, бэеэ бузарлаха ёһогүй. 12Нангин мүргэлэй газарһаа холодохо ёһогүй, Бурханайнгаа нангин ордониие бузарлахагүй, юуб гэхэдэ, Бурханай арюудхалгын тоһоор тэрэ арюудхагдаһан. Би Эзэн гээшэб.

13Тэрэ һамга абахадаа, басага абаха ёһотой. 14Бэлбэһэн эхэнэрые, үбгэнһөө һалаһан, зайгуул эхэнэрые һамган болгожо абаха ёһогүй, харин өөрынгөө яһатанай, хүнтэй унтаагүй басага һамган болгожо абаха ёһотой. 15Муу эхэнэртэй ушараад, өөрынгөө үрэ өөрынгөө арад зон соо муу болгохо ёһогүй, юуб гэхэдэ, Би тэдэниие арюудхагша Эзэн гээшэб.

16Эзэн Моисейдэ үгүүлбэ:

17– Аһароондо хэлэ: Шинии үри һадаһанай уг унги соо бэеын зэмдэг дутагдалтай хүн Бурханда эдеэнэй үргэл үргэхэ ёһогүй. 18Муу бэетэй: һохор, дохолон, һарюу хүн үргэл үргэхэ эрхэгүй. 19Гар хүлөө хухарһан хүн; 20бүхэтэр, хаташаһан гар хүлтэй, тарбаган хүн, нюдэндөө сагаасатай, яра шархатай, гэмтэһэн заһаатай хүн үргэл үргэхэ ёһогүй. 21Аһароон санаартын үри һадаһадһаа бэеын зэмдэг дутагдалтай хүн Эзэндэ үргэл үргэхэ ёһогүй, өөрынгөө Бурханда хилээмэн үргэл үргэхэ эрхэгүй. 22Өөрынгөө Бурханай хилээмэ, нангин болон хамагай нангин газарһаа хилээмэ эдихэдэнь болохо. 23Харин хүшэгэдэ, үргэл үргэдэг газарта тэрэ дүтэлхэ ёһогүй, юундэб гэхэдэ тэрэ дутуу бэетэй, эрэмдэг хүн. Минии арюун нангин оршониие бузарлаха ёһогүй. Би хадаа тэдэниие арюудхажа байдаг Эзэн гээшэб.

24Моисей Аһароондо, тэрэнэй хүбүүдтэ, бүхы израильшуудта зар тунхаг табиба.
Copyright information for BxrBBL2024