‏ Leviticus 22

Үргэл үргэхэ тухай

1Эзэн Моисейдэ үгүүлбэ:

2– Аһароондо, тэрэнэй хүбүүдтэ хэлэ: Израильшуудай мүргэлэй нангин зүйлнүүдтэ арюун нангинаар хандагты, Минии нангин нэрые бү гутаагты, Намда зорюулха юумые наринаар сахигты. Би Эзэн гээшэб. 3Тэдээндэ хэлэ: хэрбээ хэн нэгэн танай угһаа бузартай байгаад, израильшуудай Эзэндэ зорюулһан нангин зүйлнүүдтэ дүтэлөө һаань, Минии үмэнэһөө ами наһаниинь хосорхо. Би Эзэн гээшэб.

4Хэн Аһарооной үри һадаһанһаа һэлхэ үбшэнтэйб, али бэеһээнь эдеэрэ гаража ябадаг бэ, тэрэ арюун нангин мүргэлэй эдеэ бэеынгээ арюун болотор эдихэ ёһогүй. Хэн нэгэнэй үхэһэн бузартай юумэндэ хүрөө һаань гү, али үрэһэнэйнь ехээр гараа һаань гү; 5али ямар нэгэ могой хорхойдо хүрэжэ, бузартаа һаань гү, үгы һаа, нэгэ хүндэ хүрөөд, бузартаа һаань, 6тэрэ муухай юумэндэ хүрэһэн хүн гээшэ, тиигээд үдэшэ болотор бузартай байха, бэеэ уһаар угаангүйгөөр арюун эдеэ эдихэ ёһогүй. 7Наранай ороһон хойно, бэеэ арюун болгоод, арюун нангин эдеэ эдихэдэнь болохо, юуб гэхэдэ энэ өөрынь эдеэн ха юм. 8Һэе, арьяатанай зобооһон малай мяха эдихэгүй, эдеэ һаа, бузартаха. Би Эзэн гээшэб.

9Нүгэл абаад, тэрээнһээ боложо үхэхэгүйн тула Минии захиргаа тэдэ дүүргэг, сахижа ябаг. Тэдэниие арюудхагша Би Эзэн гээшэб.

10Буса ондоо хүн арюун нангин эдеэ эдижэ болохогүй. Санаартын гэртэ байдаг һуулгамаршан хүн тэрэ нангин арюун эдеэ эдихэ ёһогүй. 11Хэрбээ санаарта хүниие мүнгөөр худалдажа абаа һаа, тэрэ хүниинь нангин эдеэ эдижэ болохо. Гэртэхинэйнь хилээмыень эдихэдэ болохо. 12Санаартын басаган санаарта бэшэ ондоо обогой хүндэ хадамда гараа һаа, үргэлэй арюун нангин эдеэ эдихэ баһа эрхэгүй. 13Хэрбээ санаартын басаган бэлбэһэн болоод, али нүхэрһөө һалаад, үхибүүгүй байгаа һаань, эсэгэдээ бусажа ерээ һаань, залуу байхадаа, яажа байгаа һэн бэ, тэрээгээрээл ажаһууха, эсэгынгээ хилээмэнһээ эдилсэхэдэнь болохо, буса ондоо хүнһөө хэншье хилээмыень эдихэ ёһогүй.

14Хэн нэгэн эндүүржэ арюун нангин эдеэнһээ хүртөө һаа, тэрэ хүн арюун нангин эдеэ санаартада үгэхэ ёһотой, дээрэнь табанай нэгэ хуби үгэлсэхэ ёһотой. 15Израильшуудай Эзэндэ үргэһэн нангин үргэлые муушалха ёһогүй. 16Нангин эдеэ бү эдиг, өөртөө муу юумэ татажа, зүгнэжэ болохогүй, юуб гэхэдэ, тэдэниие арюудхагша Эзэн гээшэб.

Үргэлэй мал тухай

17Эзэн Моисейдэ үгүүлбэ:

18– Аһароондо, тэрэнэй хүбүүдтэ, израильшуудта тунхагла: Хэрбээ израильшуудай дундаһаа гү, али ерүүл зоной дундаһаа шахаа тангаригһаа боложо, үгышье һаа, өөрөө оролдожо, түгэс шатаалта үргэл Эзэндэ үргөө һаань, 19Бурханһаа үршөөл абахын түлөө үргэлэй мал зэмдэггүй эрэ бодо малһаа, хони ямаадһаа үргэгдэхэ ёһотой. 20Эзэндэ тулюур, муу, туранхай, үбшэн мал бү үргэгты. Муу мал үргэхэдэтнай, танда үршөөл хайрлагдахагүй. 21Хэн нэгэн өөрынгөө тангариг хүсэлдүүлжэ, оролдолго гаргажа, томо бодо мал, үгышье һаа, жэжэ мал амгалан байдалай түлөө үргэхэдөө, һайн мал, тобир тарган, зэмдэггүй мал Эзэндээ үргэхэ ёһотой. 22Һохор, дохолон, гэмтэһэн, бэедээ эдеэрэтэй, һэлхэнтэй мал Бурханда бү үргэгты. 23Тугалай, хурьганай заһааниинь ехэ уташье байг, богонишье байг, һайн дуранай үргэл гэжэ үргэхэдэ болохо. Тангаригай үргэлдэ энэ таарахагүй. 24Малай заһааниинь биса һүрэһэн, бутархай, таһархай, отологдоһон байгаа һаань, Эзэндэ бү үргэгты. Өөрын газар нютагта энээниие бү үйлэдэгты. 25Хари газарай зонһоо гэмтэһэн мал Бурханда бү үргэгты, юундэб гэхэдэ, тэрэ зэмдэгтэй: танда үршөөл хайрлагдахагүй, туһа болохогүй.

26Эзэн Моисейдэ үгүүлбэ:

27– Хэрбээ тугалай, хурьганай, эшэгэнэй гарахада, долоон хоног соо эхыень хүхүүлхэ, наймадахи үдэрһөө хойшо Эзэндэ үргэгдэжэ болохо. 28Үнеэ, хони, ямаа түлтэйнь хамта нэгэ үдэр гаргажа болохогүй.

29Хэрбээ Эзэндэ баярай үргэл үргөө һаа, өөһэдтэтнай туһатай байхын тула оролдогты. 30Тэрэнээ тэрэл үдэртөө эдихэ ёһотойт, үглөөгүүр болотор тэрэнээ үлөөхэгүйт, Би Эзэн гээшэб.

31Минии гаргаһан захяа заабари сахигты, дүүргэгты. Би Эзэн гээшэб. 32Минии нангин нэрэ бү гутаагты. Израильшуудай дунда арюун нангин байха ёһотойб. Би таанадые арюудхагша Эзэн гээшэб. 33Таанадые Египедэй газарһаа гаргаһан, танай Бурхан болохо Эзэн гээшэб.