‏ Leviticus 23

Субботын һайндэр

1Эзэн Моисейдэ үгүүлбэ:

2– Израильшуудта Эзэнэй һайндэрнүүд тухай, нангин суглаагаа тэрэ үдэрнүүдтэ татаха тухай тунхагла. Энэ минии һайндэрнүүд гээшэ: 3Зургаан үдэртэ ажалаа хээд, долоодохи үдэртөө – субботодо амарха ёһотой, нангин суглаа хэхэ хэрэгтэй. Хаанашье ажаһуугаа хадаа таанад ямаршье юумэ хэхэгүйт, энэ суббото хадаа Эзэнэй.

Паасхын һайндэр

4Энэ Эзэнэй һайндэрнүүд гээшэ, нангин суглаануудые саг соонь үнгэргэхэ ёһотойт. 5Түрүүшэ һарын арбан дүрбэдэхи үдэр, үдэшэлэн Эзэнэй Паасха. 6Энэ һарын арбан табанай үдэр эһээгдээгүй хилээмэнэй һайндэр. Долоон үдэр соо эһээбэригүй талхаар болгоһон хилээмэ эдигты. 7Түрүүшын үдэр нангин суглаагаа үнгэргэгты, ямаршье ажал бү хэгты. 8Долоон үдэрэй турша соо Эзэндэ үргэл үргэгты. Харин долоодохи үдэртөө нангин суглаагаа үнгэргэжэ, ямаршье ажал бү хэгты.

Түрүүшын ургасын һайндэр

9Эзэн Бурхан Моисейдэ үгүүлбэ:

10– Израильшуудта соносхо: Минии үгэһэн газарта ерээд, таряа тарихадаа, өөрынгөө түрүүшын ургасын нэгэдэхи боолто таряае санаартада асаржа үгэхэт. 11Тэрэ боолто таряаетнай танай амгалан байдалай түлөө Эзэнэй үмэнэ үргэхэ. Һайндэрэй үглөөдэрынь тэрэ боолтотой таряае санаарта үргэхэ ёһотой.

12Боолтотой таряа үргэхэ тэрэл үдэртөө Эзэндэ түгэс шатаалта үргэл болгон ямаршье эрэмдэггүй жэлтэй хурьга үргэхэ ёһотойт. 13Арбанай хоёр хуби шэниисын гурил оливын тоһондо зууража бариһан хилээмэн үргэл Эзэндэ үргэхэ хэрэгтэй. Тэрэнэй һайхан үнэр Эзэндэ таатай. Мүн дүрбэнэй нэгэ хуби гиинэ үзэмэй дараһан архи үргэхэ хэрэгтэй. 14Бурхандаа үргэл үргэхэһөө урид хилээмэ, хатааһан таряа, шэнэ таряа бү эдигты. Энэ хадаа үеын үедэ бүхы гэр бүлэдэтнай сахиха мүнхэ тогтоол хуули гээшэ.

Долоон долооной һайндэр

15Һайндэрэй һүүлээр, нэгэдэхи үдэрһөө эхилээд, боолтотой таряае үргэхэ үдэр хүрэтэр, дүүрэн долоон долоон хоногуудые тоологты. 16Долоон долоон хоногуудай һүүлээр, табидахи үдэр шэнэ ургасын хилээмэн үргэл Эзэндэ үргэгты. 17Гэрнүүдһээ үргэхэ хоёр бүхэриг хилээмэ асарагты. Бүхэриг бүхэндэ эфаагай арбанай хоёр хубитай шэниисын гурил гаргашалагдаха ёһотой. Эһээһэн талхаар тэдэниие болгохо хэрэгтэй, энэ бол ургасын дээжэһээ Эзэндэ үргэл болоно. 18Ямаршье зэмдэггүй долоон түлгэн хурьга, нэгэ буруун буха, хоёр хуса Эзэндэ зорюулжа, хилээмэн үргэлтэй хамта үргэгты. Энэ хадаа Эзэндэ зорюулһан түгэс шатаалта үргэл мүн, хилээмэн үргэлтэй, үзэмэй дараһан архи үргэлтэй хамта. Эзэндэ аятай һайхан хэншүү үнэртэй үргэл байха. 19Һүрэг ямаадһаа нэгэ тэхэ нүгэл сагааруулгын үргэлдэ үргэгты, хоёр хурьгадые амгалан байдалай түлөө үргэгты. 20Санаарта эдэ хоёр хурьга түрүүшын ургасын таряагаар бариһан хилээмэнтэй хамта Эзэнэй урда үргэг. Тэдэ болбол Эзэнэй нангин зүйл, санаартын болохо юм. 21Энэ үдэр нангин үргэл, мүргэл хэгты, ямаршье ажал бү хэгты. Энэ хадаа таанадта бүхы үеын үедэ сахиха мүнхэ тогтоол хуули гээшэ.

22Таряагаа хадахадаа, таряалангай захада бү хүрэгты, үлэһэн хоолос бү абагты, үлөөгты. Үгытэй, ерүүл улад тэдэниие суглуулжа абаг. Би Эзэн, танай Бурхан гээшэб.

Бүреэнүүдэй һайндэр

23Эзэн Моисейдэ үгүүлбэ:

24– Израильшуудта хэлэ: Долоодохи һарын түрүүшын үдэр таанадта амгалан тэнюун оршоной, нангин үдэр болохо. Бүреэнүүдэй абяан тэрээн тухай тунхаглан зэдэлэг. 25Ямаршье ажал бү хэгты. Эзэндэ үргэл үргэгты.

Арюудхалгын һайндэр

26Тиигээд Эзэн Моисейдэ үгүүлбэ:

27– Баһа долоодохи һарын арбадахи үдэр арюудхалгын үдэр гээшэ, үргэл мүргэл болохо, масаг баригты, Намда, Эзэндэ, үргэл үргэгты. 28Энэ үдэр ямаршье ажал бү хэгты, энэ үдэртнай арюудхалгын үдэр болоно. Минии, Эзэн Бурханайтнай, үмэнэ таанадые арюудхахын тула. 29Энэ үдэр хүн бүхэн масаг бариха зэргэтэй, үгы һаа, арад зонһоо тусгаарлагдан һүнөөгдэхэ. 30Хэрбээ хэн нэгэнэй энэ үдэр ажал хээ һаань, тэрэниие үгы хэхэб. Тэрэ уг зонһоо үгы хэгдэхэ. 31Ямаршье ажал бү хэгты – энэ мүнхэ тогтоол хуули үеын үедэ гэр бүлэдэтнай сахигдаха ёһотой. 32Субботодо масаг баригты. Энэ һарын юһэдэхи үдэрэй үдэшэһөө эхилээд, нүгөө үдэшэ болотор амарагты.

Майхангуудай һайндэр

33Эзэн Моисейдэ үгүүлбэ:

34– Израильшуудта хэлэ: Долоодохи һарын арбан табанай үдэртэ бургааһаар хэһэн майхангуудай һайндэр гээшэ, долоон үдэрэй Эзэнэй һайндэр. 35Түрүүшын үдэр – нангин, ямаршье ажал хэхэгүйт. 36Долоон хоног соо Эзэндэ үргэл үргэхэт. Наймадахи үдэр – нангин. Эзэндэ үргэл үргэгты. Энэ һайндэрэй һүүлшын үдэр, ямаршье ажал бү хэгты.

37Эдэ Эзэнэй томилһон нангин һайндэрнүүд гээшэ. Эзэндэ түгэс шатаалта үргэл, талхан үргэл, малай үргэл, сэржэм үргэлнүүд үргэгдэхэ ёһотой. 38Эзэнэй субботонуудһаа гадна, үргэһэн бэлэгүүдһээтнай гадна, шахаа тангаригай үргэлһөө гадна, өөрын һанаагаар Эзэндэ үргэһэн үргэлһөө гадна эдэ бүгэдэ мүн. 39Газарай үршөөһэн ургаса хуряаһанай удаа, долоодохи һарын арбан табанай үдэр Эзэнэй долоон хоногой һайндэрые үнгэргэгты. Түрүүшын үдэрынь амарагты, наймадахи үдэрынь амарагты. 40Түрүүшын үдэр һайхан модоной жэмэс суглуулагты, дал модоной набша, үдхэн набшаһатай модоной мүшэр, голой бургааһанай мүшэр суглуулагты. Тиигээд Эзэнэй, өөрын Бурханайнгаа урда долоон үдэр хүхилдэн сэнгэн байгты. 41Иимэ Эзэнэй һайндэрые жэлдээ долоон хоног соо һайндэрлэгты. Танай үеын үедэ сахиха мүнхэ тогтоол хуули энэ мүн. Долоодохи һарада энэ һайндэр тэмдэглэгты. 42Долоон хоног соо бургааһаар, модоной набшаһаар хэһэн отог соо байрлагты. Израилиин ерүүл зон иимэ отог соо баһа байха ёһотой. 43Танай уг удамууд мэдэхэ ёһотой: Би израильшуудые Египедэй газарһаа гаргахадаа, бургааһаар, үбһөөр хэһэн майхан соо байрлуулаа бэлэйб. Би Эзэн Бурхантнай гээшэб.

44Тиигээд Моисей израильшуудта Эзэнэй һайндэрнүүд тухай зар тунхаг тарааба.