‏ Leviticus 25

Долоодохи жэл

1Синай хадын оройдо Эзэн Моисейдэ үгүүлбэ:

2– Израильшуудта соносхон хэлэ: Минии үгэһэн газар дээрэ ерэхэдэтнай, газарай хүрьһэн Эзэнэй субботодо амарха ёһотой. 3Зургаан жэл соо таряа таригты, зургаан жэл соо үзэм жэмэсэй мүшэр хайшалагты, ургаһан юумыень суглуулагты. 4Долоодохи жэлдэ газарай хүрьһэн амарха ёһотой, амаралта субботын жэл болохо, энэ Эзэнэй суббото гээшэ. Таряаландаа таряа бү таригты, үзэм жэмэсэй модо бү хайшалагты. 5Өөрөө юун ургааб, таряалангай газар дээрэ, тэрэнээ бү хуряа, ургаһан үзэм жэмэс бү суглуула, газарай амарха жэл болог. 6Субботын жэлдэ амархадаа, газар таанадта – шамда, шинии богоолдо, шэбэгшэдэ, шинии байлгаһан ерүүл уладта, шинии хүлһэлжэ абаһан ажалшанда – эдеэ хоол үгэхэ. 7Шинии малда, шинии орон нютагай зэрлиг амитадта газарайтнай ургаса эдеэн болохо.

Табидахи жэл тухай

8Өөртөө субботын долоон жэл тооло, эдэ долоон жэлшни дүшэн юһэн жэл болог. 9Арюудхалгын үдэр, долоодохи һарын арбадахи үдэр улад зониие дуудажа, бүреэ бэшхүүрнүүдээр дуу гаргагты. 10Табидахи жэлээ арюудхагты, нютаг дээрэтнай ажаһууһан уладта эрхэ сүлөө соносхогты. Энэ хадаа ойнтнай баяр болохо. Хүн бүхэн өөрынгөө эзэмдэжэ байһан газартаа бусагты, өөрынгөө уг угсаатандаа бусагты. 11Табидахи жэл танай ойн баярай жэл болоно. Энэ жэл таряа бү таригты, бү хадагты, газарта ургаһан ургаса бү таһалагты, үрэ жэмэс бү суглуулагты. 12Энэ жэл танай ойн баяр, танай нангин жэл гээшэ. Газарһаа өөрөө ургаһан юумэ эдигты. 13Ойн баярайнгаа жэлдэ эзэлжэ байһан газартаа бусагты. 14Хэрбээ дүтынгөө хүндэ юумэ худалдаа һаа, үгышье һаа, дүтынгөө хүнһөө юумэ худалдажа абаа һаа, бэе бэеэ бү мэхэлэгты. 15Дүтын хүнһөө таряалан зөөри худалдажа абахадаа, ойн баярай һүүлээр үлэһэн жэлнүүдые тоолооройгты. Таряалан шамда худалдажа байгааша тэрэ хүн ойн баяр хүрэтэр энэ газарһаа хэды жэл ургаса хуряажа абамаар бэ гэжэ тоолог. 16Хэрбээ олон жэлнүүд үлөө һаань, сэнгээ дээшэнь үргөөрэйгты, хэрбээ үсөөн жэлнүүд үлөө һаань, сэнгээ доошонь буулгаарайгты. Хуряалгын жэлнүүдэй тоо тэрэ шамда худалдана бшуу. 17Бэе бэеэ бү мэхэлэгты. Өөрынгөө Бурханһаа айгты, юуб гэхэдэ Би Эзэн, танай Бурхан, гээшэб.

Долоодохи жэл юу эдихэб?

18Минии хуулинуудые дүүргэгты. Минии тогтоолнуудые наринаар сахигты, тиигээ һаа, газар дээрээ амгалан тайбан ажаһуухат. 19Газартнай өөрынгөө үрэ жэмэс үгэхэ, садхалан, амгалан тайбан ажаһуухат. 20Хэрбээ: «Долоодохи жэлээ юугээ эдихэбибди: таряа хуряахагүй байнабди, үрэ жэмэс суглуулхагүй байнабди?» – гэжэ асуугаа һаатнай, 21зургаадахи жэлдэтнай би үршөөл эльгээхэб. Газартнай гурбан жэлдэ эдихэ таряа, жэмэс үгэхэ. 22Наймадахи жэлдэ таряа тарихат, зүгөөр юһэдэхи жэл болотор хуушан хуряаһан талха таряагаа, үрэ жэмэсээ эдихэт. Шэнэ тариһан таряан, жэмэсэйнгээ болотор хуушан таряа талха, жэмэсээ эдихэт.

Үмсын зөөри тушаа

23Газарые бусаалтагүй худалдажа болохогүй. Энэ Минии газар: таанад ерүүл улад гээшэт. Намда ажаһуунат. 24Өөрын угай газар худалдажа абан бусаха эрхэ өөрын бүхы газар нютагай дэбисхэр дээр олгуулха ёһотойт. 25Хэрбээ ахашни, дүүшни үгырһэн дээрэһээ газараа худалдаха болоо һаань, дүтынь түрэл хүнэй тэрэ газарыень худалдажа абахадань болохо. 26Газарыень худалдажа абаха хүнэй үгы, гэбэшье тэрэ өөрөө баяжаад, өөрөө аргаараа худалдажа абаха гэбэл, 27газараа худалдаһаар хэды жэл болооб, тэрэнээ тоолон гаргаад, үлэгшэ жэлнүүдэй түлөө түлбэри түлөөд, тиигээд газараа һөөргэнь абаад, эдлэхэдэнь болохо. 28Хэрбээ түлбэри түлэжэ шадахагүй һаа, худалдажа абаһан хүнэй гарта тэрэ зөөринь ойн баярай жэл хүрэтэр байха. Ойн баярай жэлдэ газарынь бусаагдажа, анханайнгаа эзэнэй болохо. 29Хэн нэгэн хотодо хүнэй байдаг, ханаар хүреэлэгдэһэн гэр худалдаа һаань, жэл үнгэрхэһөө урид һөөргэнь худалдажа абахада болохо. 30Хэрбээ жэлэй үнгэртэр гэр худалдагдаагүй һаа, тэрэ ханаар хүреэлэгдэһэн гэр худалдажа абаһан хүнэй гэр хододоо болохо, үри һадаһандань үлэхэ. Ойн баярай жэлдэ хуушан эзэндэнь үгтэхэгүй. 31Хүдөө һууринда байһан ханаар хүреэлэгдээгүй гэр хүдөө газартай адляар сэгнэгдэхэ. Хэдыдэшье энэ гэр худалдажа абахада болохо. Ойн баярай жэлдэ худалдаһан эзэндэнь үгтэхэ. 32Левидүүдэй балгасые, хотын гэрнүүдые левидүүдэй хододоо худалдажа абахадань болохо. 33Хэрбээ левидүүдэй хотодо худалдаха гэр абаагүй һаань, тэрэ гэр ойн баярай жэлдэ һөөргөө левидүүдтэ үгтэхэ ёһотой. Юундэб гэхэдэ, израильшуудай дунда левидүүдэй балгасын гэрнүүд левидүүдэй үмсын гэрнүүд болоно. 34Балгасые тойроһон газар худалдажа болохогүй, тэрэ хадаа левидүүдэй хэтэ мүнхэдөө эдлэхэ газарынь гээшэ.

Богоолнууд тухай

35Хэрбээ аха дүүнэршни үгырөөд, шамда ерээ һаань, туһа хүргэ, ондоо тээһээ ерэһэншье байг, хүдөө ажаһуудагшье байг, шамтай сугтаа байг. 36Тэрэнэй ургаһан юумэнһээ, ашаг олзобориһоонь бү аба, өөрынгөө Бурханһаа ай. Аха дүүнэршни шамтай хамта ажаһууг. 37Мүнгэеэ түрэсэтэйгөөр бү үгэ. Ашаг олзо олохо зорилготойгоор эдеэ бү үгэ. 38Би Эзэн Бурхантнай гээшэб. Би таанадые Египедэй газарһаа гаргааб, Ханаһаанай газар танда үгөөб, танай Бурхан болооб.

39Хэрбээ танай яһатанай али нэгэ хүн үгырөөд, шамда худалдагдаа һаань, богоол шэнгеэр тэрэнээ бү зара. 40Тэрэ шинии хүлһэншэн гү, али нүүжэ ерэһэн хүн шэнги байг. Ойн баярай жэл хүрэтэр шамда ажал хэг. 41Тиигээд тэрэ шамһаа зайлуужаг. Үри хүүгэдтэеэ өөрынгөө уг гарбалдаа бусуужаг, эсэгынгээ эдлэжэ байһан газарые эдлэг. 42Юундэб гэхэдэ, тэдэ – Минии богоолнууд, тэдэниие Би Египедэй газарһаа гаргаа бэлэйб. Тэдэ юрын богоолнууд мэтэ худалдагдаха ёһогүй. 43Хэрзэгы хатуугаар эзэрхэн тэдээндэ бү ханда, өөрынгөө Бурханһаа ай. 44Эрэ, эхэнэр богоолнуудтай байхаа һанаа һаа, тойроод байһан буса арадһаа худалдажа абагты. 45Нүүжэ ерэһэн уладай үхибүүдые богоол болгожо, худалдан абахадатнай болохо. Тэдэнэй уг изагууртай үхибүүдые худалдажа абахадатнай болохо, юундэб гэхэдэ, танай дэбисхэр дээрэ түрөө ха юм, тиихэдээ тэдэ танай үмсын болохо ёһотой. 46Тэдэниие уг залгамжалан дамжуулагдаха болгогты, үхибүүдтээ дамжуулан үгэхэдэтнай болохо. Үеын үедэ тэдэниие богоол болгогты. Харин израильшуудта, аха дүүнэртээ эзэрхэг хатуугаар бү хандагты. 47Хэрбэеэ ерүүл хүн, тэрэнэй уг гарбалай хүн баяжаад, үгырһэн аха дүүешни худалдажа абаа һаань, 48тэрэниие һөөргэнь худалдан абажа болохо. Аха дүүнэрэйнь нэгэн заабол тэрэнииень бусаажа, худалдан абаха ёһотой. 49Хэн нэгэн өөһэдын түрэл сооһоо ондоо ерэһэн уладта худалдагдаһан хүнөө бусаан худалдан абаха ёһотой. Өөрөө баяжабал, тэрэ өөрынгөө түлөө мүнгэ үгэжэ сүлөө болохо. 50Тэрэ заабол худалдажа абаһан хүнтэеэ тоосохо ёһотой: өөрыгөө худалдаһан жэлһээ эхилээд, ойн баярай жэл хүрэтэр хэды жэл болооб, абаһан мүнгэеэ жэлэй тоогоор үгэхэ ёһотой. Тэрэ хүндөө саг зуура хүлһэншөөр ажаллаа гэжэ тоологдохо ёһотой. 51Хэрбээ үшөө олон жэл үлөө һаань, хэмжээ соонь, өөрынгөө түлөө абаһан мүнгэ үгэхэ ёһотой. 52Хэрбээ ойн баярай жэл хүрэтэр үсөөн жэл үлөө һаань, хэды жэл болооб гэжэ тоолон гаргаад, жэлэй тоогоор өөрынгөө түлөө худалдаанай сэн үгэхэ ёһотой. 53Бэеэ худалдаһан хүн хадаа худалдажа абаһан хүндөө саг зуурын хүлһэншэн мэтэ бүхы жэлнүүд соо хүдэлхэ. Тэрэ хүн хүлһэншэ болоһон хүндэ хатуу хэрзэгыгээр эзэрхэн хандаха ёһогүй. 54Хэрбээ бэеэ худалдаһан хүниие мүнгэ түлэжэ абаагүй һаань, ойн баярай жэлдэ тэрэ үхибүүдтэеэ хамта сүлөө болохо. 55Юундэб гэхэдэ, израильшууд Минии богоолнууд, Египедэй газарһаа гаргаһан Минии богоолнууд гээшэ. Би Эзэн, танай Бурхан гээшэб.