Lev 26 | BxrBBL2024 | STEP | Мүргэхэ шүтөөн, элдэб дүрсэ, шулуун баханануудые өөһэдтөө бү табигты. Мүргэжэ байхаяа зурагтай шулуу өөрынгөө газар дээрэ бү табигты. Би танай Эзэн Бурхан гээшэб.

‏ Leviticus 26

Бурханай үреэлнүүд

1 Мүргэхэ шүтөөн, элдэб дүрсэ, шулуун баханануудые өөһэдтөө бү табигты. Мүргэжэ байхаяа зурагтай шулуу өөрынгөө газар дээрэ бү табигты. Би танай Эзэн Бурхан гээшэб. 2 Минии субботонуудые сахигты, минии нангин байрада шүтэгты: Би Эзэн гээшэб. 3 Хэрбээ таанад Минии гаргаһан ёһо гуримаар, захяа заабаряар нарин нягтаар ябаа һаатнай, 4 Би таанадта саг соонь бороо оруулхаб, газар һайн ургаса үгэхэ, жэмэстэ модод һайнаар жэмэсээ үгэхэ. 5 Таряа ехээр хуряахат, үзэм жэмэс ехээр суглуулхат, өөрынгөө газар дээрэ ажана тэнюун, садхалан ажаһуухат. 6 Амгалан тайбан, хэншье таниие хүлгүүлхэгүй, һанаан сэдьхэл тэгшэ ажаһуухат. Аймшагтай зэрлиг амитадые газар дээрэһээтнай намнахаб. Һэлмэтэ дайсан газар дээгүүртнай ябахагүй. 7 Дайсадаа намнахат, тэдэ һэлмээр сабшуулжа, урдатнай унаха. 8 Таанадай табан хүн зуун дайсаниие зугадуулха, зуун хүн түмэн зониие намнаха, дайсадтнай һэлмээр сабшуулаад, урдатнай унаха. 9 Таанадые анхаржа байхаб. Тиихэдэм, үнэр баян ажаһуухат, олошорхот, таанадтай Хэлсээгээ сахин дүүргэхэб. 10 Үнгэрһэн жэлэйнгээ юумэ эдихэт, шэнэ юумэтэй болоходоо, хуушан юумэеэ хаяхат. 11 Таанадай дунда байраа табихаб. Минии сэдьхэл таанадаа голохогүй. 12 Таанадай дунда ябахаб, танай Бурхантнай болохоб, таанад Минии арад зон болохот. 13 Би Эзэнтнайб, таанадые богоол болоод, Египедэй газарта зобохогүйн түлөө хөөмэгшыетнай бута сохёоб, толгойетнай дээрэ үргүүлэн, таанадые дахуулжа, тэндэһээ гаргаа бэлэйб.

Бурханай хэһээлтэнүүд

14 Хэрбээ Минии бүхы тогтоол захяануудыемни дүүргээгүй һаатнай, Минии үгэ дуулахаа болёо һаатнай, 15 хэрбээ Минии тогтоол хуулинуудые үзэн ядаа һаатнай, хэрбээ зүрхэ сэдьхэлтнай Минии гаргаһан хуулида дураа гутаа һаань, Минии захяа заабари дүүргэхэеэ болёо һаатнай, Намтай хэлсээгээ эбдээ һаатнай, 16 Би таанадта иигэжэ орохоб: таанадта аймшагтай юумэ, хаталга, халуун үбшэ эльгээхэб, тэдэнһээ боложо, нюдэнтнай шэргэхэ, зүрхэнтнай үбдэхэ. Үрэһэ дэмы тарихат, тэдэниие дайсантнай эдихэ. 17 Таанад руу эрьен, уур хилэн болохоб, дайсанайнгаа урда унахат. Дайсадтнай таанадые эзэрхэхэ. Таанад хүнэй намнаашьегүй һаа, һэегүй тэрьелхэт. 18 Хэрбээ иимэ юумэнэй болоходошье, Минии үгэ дуулаагүй һаатнай, нүгэл хэһэнэйтнай түлөө долоо дахин ехээр хэһээхэб. 19 Танай үсэд бардам зангыетнай хухалхаб, тэнгэрииетнай түмэр шэнги болгохоб, газарыетнай зэд шэнги болгохоб. 20 Дэмы хии талаар хүсэнтнай буураха, газартнай ургаса үгэхэгүй, мододтнай үрэ жэмэс үгэхэгүй. 21 Хэрбээ эдээнэйшье һүүлээр Намда эсэргүүсээ һаатнай, Минии үгэ дуулаха дурагүй һаатнай, нүгэлэйтнай түлөө сохилто долоо дахин нэмэхэб. 22 Таанадта хүдөө хээрын зэрлиг амитадые эльгээхэб. Тэдэ таанадые үри хүүгэдгүй болгохо, адуу малыетнай хюдаха, өөһэдыетнай үсөөрүүлхэ, тиигээд харгынуудтнай хооһорхо. 23 Хэрбээ энээнэйшье һүүлээр заһараагүй һаатнай, Намда эсэргүүсээ һаатнай, 24 Би сухал дундаа танай урдаһаа эсэргүүсэн орохоб. Танай хэһэн нүгэл шэбэлэй түлөө долоо дахин ехээр сохихоб. 25 Хэлсээ эбдэһэнэй түлөө таанадта үһөөгэй һэлмэ эльгээхэб. Өөһэдынгөө хото соо хоргодоо һаатнай, яра шарха эльгээхэб, дайсадай гарта үгэхэб. 26 Хилээмэгүй болгохоб. Нэгэ пеэшэн соо арбан һамгад танда хилээмэ бариха, хилээмэ таанадта шэгнээд үгэхэ, таанад тэрэ хилээмэ эдеэд, садахагүйт. 27 Хэрбээ иимэ юумэнэйшье һүүлээр Минии үгэ дуулаагүй һаатнай, Намда эсэргүүсэн ороо һаатнай, 28 Би сухал дундаа танда эсэргүүсэн орохоб, нүгэлэйтнай түлөө таанадые долоо дахин хэһээхэб. 29 Таанад хүбүүдэйнгөө, басагадайнгаа бэе эдихэ болохот. 30 Тахилай үндэр газарнуудыетнай һандаргаахаб, нангин баханануудыетнай эбдэхэб. Танай үхэһэн бэенүүдые бутархай һүлдэ хүрэг дээгүүртнай тараахаб. Үнэнхэ зүрхэнһөө Би таанадһаа жэрхэхэб. 31 Хото балгасыетнай хооһоруулхаб, мүргэлэйтнай орон хооһон болгохоб. Үргэһэн үргэлэйтнай хоншуу һайхан үнэрыень абахагүйб. 32 Танай газар хооһолхоб. Танай байһан газарта зөөжэ ерэһэн дайсадайтнай сошотор хооһолхоб. 33 Таанадые буса арад зоной дунда тараахаб, хойноһоотнай һэлмэ һугалхаб. Газартнай хооһорхо, хото балгасатнай һандаргагдаха. 34 Тэрэ сагта газартнай амарха. Дайсадай газарта байхадатнай газар хүрьһэнтнай амарха. 35 Хаягдаһан, орхигдоһон сагта газартнай амарха, танай байха үе сагта газартнай иигэжэ амараагүй. 36 Таанадһаа үлэһэн зоной дайсадай газарта байхадань, зүрхэ сэдьхэлдэнь аймхай зан оруулхаб. Набшаһанай һаршаганаан тэдэниие айлган намнаха. Хүнэй намнаагүй байхада, һэлмэһээ тэрьелһэн мэтээр гүйлдэн унаха. 37 Хүнэй намнаагүй байхада, һэлмэһээ тэрьедэһэндэл, тэдэ бэе бэеһээ торожо байжа гүйлдэхэ. Дайсантай тэмсэхэ хүсэншье танда байхагүй. 38 Буса арадуудай дунда хосорхот. Дайсадайтнай газар таанадые залгиха. 39 Таанадһаа үлэгшэд хуули гурим эбдэһэнэйнгээ, элинсэг эсэгын бурууһаа боложо, дайсанай орон нютагта һалаха, үхэхэ. 40 Харин өөрын гэмээ, эсэгынгээ гэм зэмые, Минии үмэнэ гэмтэ ябадал хэһэнээ, Намда эсэргүүсэһэнээ тэдэ мэдэрээ һаань, 41 юунэй түлөө Би сухал дундаа тэдэндэ эсэргүүсээбиб, тэдэниие дайсанайнь газар руу эльгээгээбиб, эмниг зүрхэниинь номгоржо, гэмээ сагааруулаа һаань, 42 Би Яковтай, Исаагтай, Абраһаамтай баталһан хэлсээгээ һанахаб, энэ газараа һанахаб даа. 43 Орхигдоһон газарынь хооһорхо. Минии гаргаһан хуули тогтоолдо дураа гутажа, үзэн ядаһандаа, хуулигүй болоһондоо тэдэ дайсадай газарта зобохо, тулиха. 44 Харин дайсадай газарта байхадань, Би тэдэнһээ арсахагүйб, тэдэниие орхихогүйб, хюдахагүйб, Хэлсээгээ эбдэхэгүйб. Юуб гэхэдэ, Би тэдэнэй Эзэн Бурханиинь гээшэб. 45 Би тэдэнэй элинсэг хулинсагтай хэһэн Хэлсээгээ һанан байхаб. Тэдэнэй Бурхан болохын тула буса арадуудай хараһаар байтар Би тэдэниие Египедэй газарһаа гаргаа бэлэйб. Би Эзэн гээшэб.

46 Иимэ хуули ёһо, тогтоол шиидхэбэри, һургаал заабари Эзэн Моисейгээр дамжуулан, Синай хада дээрэ Израилиин арад түмэндэ үгөө бэлэй.