‏ Leviticus 27

Тангариг болон арбанай нэгэ хуби тухай

1Эзэн Моисейдэ үгүүлбэ:

2– Израильшуудта соносхо: Хэрбээ хэн нэгэн Эзэндэ шахаа тангариг үргөөд, удаань тэрээнһээ сүлөө болохо гэбэл, иимэ мүнгэ түлэжэ сүлөөрхэ. 3Шинии сэнгээр эрэ хүн хорин наһанһаа жара наһан хүрэтэр – табин мүнгэн шээкэл, нангин үргөөгэй тогтооһон үнэ сэнгэй ёһоор. 4Хэрбээ эхэнэр һаа, шинии сэнгээр гушан шээкэл байха. 5Табан наһанһаа хорин наһан хүрэтэр шинии сэнгээр эрэ хүн хорин шээкэл, эхэнэр хүн арбан шээкэл. 6Нэгэ һараһаа таба наһан хүрэтэр хүбүүн шинии сэнгээр табан мүнгэн шээкэл, басаган хүндэ шинии сэнгээр гурбан мүнгэн шээкэл. 7Жара наһанһаа дээшэ эрэ хүндэ шинии сэнгээр арбан табан мүнгэн шээкэл. Эхэнэр хүндэ арбан шээкэл. 8Хэрбээ шинии сэнгээр үгэхэ шадалгүй, үгытэй байгаа һаань, тэрэ хүниие санаартада абааша, санаарта өөрөө сэн үгэхэ бэзэ. Тангариг үгэһэн хүнэй шадал зэргэ санаарта харалсана бэзэ.

9Хэрбээ Эзэндэ үргэл гэжэ бодо мал үргөө һаань, Эзэндэ үргэһэн юумэн арюун нангин болодог. 10Тэрэниие һайн һаань, муу малаар, муу мал һаань, һайн малаар һэлгүүлжэ болохогүй. Гэбэшье малые ондоо малаар хэн нэгэн һэлгэбэ гэел даа, тиибэл, тэрэ хоёр мал хоюулаа нангин арюун болохо.

11Хэрбээ Эзэндэ үргэжэ болохогүй, ямар бэ даа сээртэй мал үгөө һаань, санаартада асаржа харуулха ёһотой. 12Санаарта һайн гү, али муу гү гэжэ хэлэхэ, тэрэнэй хэлэһэн сэнгээр болохо. 13Хэрбээ хэн нэгэн худалдажа абахаа һанаа һаа, шинии сэн дээрэ табанай нэгэ хубиие нэмүүжэн.

14Хэрбээ хэн нэгэн өөрынгөө гэр Эзэндэ зорюулаа һаань, санаарта гэрэй һайн, мууе сэгнэхэ. Санаарта ямараар сэгнэнэб, тэрээгээрнь болохо. 15Хэрбээ үргэһэн гэрээ һөөргэнь худалдажа абахаа һанаа һаань, шинии сэн дээрэ табанай нэгэ хуби тэрэ нэмэг, тиигээд гэрынь дахин тэрэнэй болохо.

16Хэрбээ хэн нэгэн өөрын угай газар Эзэндэ зорюулаа һаань, ямар үнэ сэнтэйб гэжэ сэгнэхэ гэбэл, тэрэ таряалан дээрэ хэды орооһо тарижа боломоор бэ, нэгэ хоомэр ешмээн орооһоной түлөө табин шээкэл мүнгэ түлэхэ гэһэн шугамаар багсаан, сэнгынь тодорхойлогдохо. 17Хэрбээ хэн нэгэн ойн баярай жэл газараа Эзэндэ зорюулаа һаань, таряалангынь дүүрэн сэнгээр сэгнэгдэхэ. 18Хэрбээ хэн нэгэн ойн баярай жэлэй һүүлээр өөрынгөө газар зорюулаа һаань, санаарта ерэхэ ойн баярай урда тээхи жэлнүүдынь тооложо, үнэ сэнгынь тодорхойлхо. 19Хэрбээ хэн нэгэн зорюулһан таряалангаа һөөргэнь худалдажа абахаа һанаа һаа, үнэ сэн дээрэнь табанай нэгэ хуби нэмэжэ түлэхэ. Тиигээд тэрэ газар тэрэнэй болохо. 20Хэрбээ тэрэ зорюулһан газараа худалдажа абангүй, тэрэ таряалангынь ондоо хүндэ худалдагдаад байгаа һаань, тэрэ хүн газараа һөөргэнь абажа шадахагүй. 21Ойн баярай жэлдэ таряалан эзэндээ бусадаг. Харин иимэ таряалан ойн баярай жэлдэ нангин болохо, юуб гэхэдэ, тэрэ Эзэнэй зөөри болохо, санаартанай эдлэл болохо.

22Хэрбээ хэн нэгэн худалдажа абаһан таряалангаа Эзэндэ зорюулаа һаань, 23ойн баярай жэл болотор хэды жэл үлөөб, энээнһээ дулдыдан таряалан ямар үнэ сэнтэйб гэжэ санаартан тоолохо. Тиигээд тэрэ хүн тэрэл үдэртөө таряалангай үнэ санаартада түлэхэ. Энэ бол Эзэнэй нангин зүйл гээшэ. 24Ойн баярай жэлдэ тэрэ таряалан худалдагдажа абтаһан эзэндээ бусаха. Тэрэ угайнь зөөри мүн.

25Ямаршье юумэнэй үнэ сэн шээкэлээр тоологдохо. Шээкэл нангин газараар тодорхойлогдоһон, шээкэл соо хорин гер.

26Малайнгаа түрүүшын түл Эзэнэй хадань зорюулжа болохогүй. Тугалшье байг, хурьганшье байг, тэдэ Эзэнэй ха юм. 27Хэрбээ сээртэй малай түрүүшын түл һаань, һөөргэнь худалдажа абахада болохо. Тэрэнэй үнэ сэн дээрэ табанай нэгэ хуби нэмэжэ үгэхэ. Хэрбээ худалдажа абаагүй һаань, тэрэ мал тогтомол сэнгээр худалдагдаха.

28Эзэндэ тангариглан зорюулһан малаа, газараа, хүниие хэншье һөөргэнь худалдан абажа шадахагүй, худалдажа шадахагүй. Тэдэ дууһан Эзэнэй байха. 29Бүхы тангаригтай юумэн, хүншье тангаригтай һаа, һөөргөө худалдагдажа абагдахагүй, тангаригтай юумэн үгы хэгдэхэ ёһотой.

30Газарай ургасын, модоной жэмэсэй арбанай нэгэ хуби – Эзэнэй. Энэ бол Эзэнэй нангин зөөри мүн. 31Өөрынгөө арбанай нэгэ хубиие хэн нэгэн худалдажа абаха гэбэл, үнэ сэн дээрэнь табанай нэгэ хуби нэмэхэ ёһотой. 32Бодо, жэжэ малай арбанай нэгэ хуби, юрэдөө, малшанай модоор заажа тоолоһон малай арбанай нэгэ хубинь Эзэнэй нангин зөөри гээшэ. 33Тэдэниие муу һайн гэжэ илгажа болохогүй, тэдэниие һэлгэжэ болохогүй. Хэрбээ һэлгээ һаань, тэдэ мал хоюулаа нангин зөөри болохо, һөөргэнь худалдан абажа болохогүй.

34Эдэ захяануудые Эзэн израильшуудта зорюулжа, Синай хадын оройдо Моисейдэ захираа бэлэй.