Leviticus 3
Амгалан байдалай түлөө үргэл
1Хэрбээ амгалан байдалай түлөө үргэл үргэхөө һанабал, эрэ гү, али эмэ эбэртэ бодо малһаа зэмдэг дутагдалгүйень шэлээд, Эзэнэй урда асараад, 2тархи дээрэнь гараа табяад, майхан һүмын үүдэнэй хажууда амиинь таһалаг. Аһарооной санаарта хүбүүд үргэлэй шэрээе зүг бүхэнһөөнь шуһаар сабдан сүршэхэ. 3Амгалан байдалай түлөө үргэл үргэгшэ хүн Эзэндэ малай дотор һэмжэ, 4хоёр бөөрэ өөхэтэйнь, өөхэтэй эльгэ болон хүлэйнь өөхэ илгаад, үргэхэ. 5Аһарооной хүбүүд бүгэдыень үргэлэй шэрээ дээрэ абаашаад, носожо байгаа түлеэн дээрэхи түгэс шатаалта үргэлтэй хамта галдаха. Энэ хадаа Эзэндэ таатай һайхан үргэл, хуншуу үнэр гээшэ. 6Хэрбээ амгалан байдалай түлөө Эзэндэ жэжэ малһаа үргэл үргөө һаа, зэмдэг дутагдалгүй эрэ гү, али эмэ мал асараг. 7Хусаар үргэл хээ һаа, Эзэнэй үмэнэ асараад, 8тархи дээрэнь гараа табяад, майхан һүмын дэргэдэ амиинь таһалаг. Аһарооной хүбүүд шуһаарнь үргэлэй шэрээ зүг бүхэнһөөнь сабдан сүршэг. 9Амгалан байдалай түлөө үргэлэй өөхэ Эзэндэ үргэхэ хэрэгтэй: һүүлэй өөхэ нюрганай яһан хүрэтэр отолоод, мүн дотор өөхэ, гэдэһэ доторой һэмжэ, хото хошхоногойнь өөхэ, 10хоёр бөөрыень өөхэтэйнь, хүлэйнь өөхэ, эльгэнэй өөхэ бөөрэтэйнь илгаад, 11эдэ бүгэдые санаарта үргэлэй шэрээ дээрэ галдаха ёһотой. Энэ галай эдеэн – Эзэндэ үргэл мүн. 12Харин тэхэ ямаагаар үргэл бүтээхэ гээ һаа, тэрээнээ Эзэнэй үмэнэ асараад, 13гараа толгой дээрэнь табяад, майхан һүмын үүдэндэ амиинь таһалаг. Аһарооной хүбүүд шуһыень үргэлэй шэрээгэй зүг бүхэндэ сабдан сүршэхэ. 14Эзэндэ үргэл болгон, тэхын дотор өөхэ, гэдэһэ доторой һэмжэ, 15хоёр бөөрэ өөхэтэйнь, хойто хоёр хүлэй өөхэ, эльгэнэй өөхэ бөөрэтэйнь илгаха хэрэгтэй. 16Эдэ бүгэдые санаарта үргэлэй шэрээ дээрэ галдаха ёһотой. Энэ галай эдеэн – таатай һайхан хуншуу үнэр гээшэ; бүхы өөхэн Эзэндэ зорюулагдаха ёһотой. 17Ямаршье амитанай өөхэ, шуһые бү эдигты гэһэн хуулиие үеһөө үедэ, хаанашье ажаһуубал, хэтэ мүнхэдөө сахиха ёһотойт.
Copyright information for
BxrBBL2024