‏ Leviticus 6

1Эзэн Моисейдэ иимэ зарлиг буулгаба:

2– Хэрбэеэ али нэгэн Эзэнэй үмэнэ гэм хэжэ, нүгэлтэй болоо һаа гү, али хадагалхыень, харюусалга доронь ямар нэгэн зүйлэй үгтэһые мэлзэжэ гү, али хулгайлһан юумэ нюуһан гү, хүнһөө юумэ буляаһан гү, 3али хүнэй гээһэн юумэ олоод, таһа арсаа һаань, зоной хэдэг нүгэлэй нэгые үйлэдэһэн, худалаар тангариглажа, гэмээ хүндэ болоһон болохо. 4Иимэ юумэ хэһэн, гэмтэй болоһон хүн хулгайлһан, буляаһан зүйлөө, хадагалхыень үгтэһэн юумэ бусаагаагүйгөө гү, али хэн нэгэнэй гээһэн юумэ олоһоноо бусааг. 5Хуурмагаар тангариглаһан хүн тэрэ юумэн дээрээ табанай нэгэ хубиие нэмээд, гарза харюулгын үргэл хэхэ үдэртэ эзэндэнь бусааха ёһотой. 6Гарза харюулгын үргэл гэжэ тэрэ Эзэндэ зэмдэг дутагдалгүй хуса асараг, үгышье һаа, хусын үнэ сэнгые санаартада мүнгөөр түлэг. 7Тиигээд санаарта Эзэнэй үмэнэ тэрэнэй нүгэл сагааруулаад, тэрэ хүнэй гэмынь хүлисэгдэхэ.

Түгэс шатаалта үргэл

8Тиигээд Эзэн Моисейдэ айладаба:

9– Аһароондо, тэрэнэй хүбүүдтэ иимэ заабари үгэ: түгэс шатаалта үргэлэй хуули гурим гэбэл, шатаалта үргэлэй юумэн үргэлэй шэрээ дээрэ, гал дээрэ бүхэли һүни соо үглөө болотор байг. Үргэлэй гал носожол байха ёһотой. 10Санаарта маалинга бүд хубсаһаа, доронь маалинга дотор самсаяа үмдэг, тиигээд түгэс шатаалта үргэлэй һүүлээр үлэгшэ үнэһэ үргэлэй шэрээ дээрэһээ абаад, үргэлэй шэрээгэй хажууда адхаг. 11Тиигээд хубсаһаа һэлгээд, тэрэ үнэһэ отог буусаһаа холо сэбэр арюун газарта абаашаг. 12Галынь үргэлэй шэрээ дээрэ унтарангүй носожо байха ёһотой, үглөө бүри санаарта тэрээндэнь түлеэ нэмэжэ, түгэс шатаалта үргэл табижа, мүн амгалан байдалай түлөө үргэлэй өөхэ шатааха ёһотой. 13Үргэлэй шэрээ дээрэ гал унтарангүй, хододоо носожо байха ёһотой.

Талхан үргэл

14Энэ бол талхан үргэлэй хуули гуримууд. Аһарооной хүбүүд тэрэ үргэһэн юумые Эзэндэ үргэлэй шэрээгэй урда асарха ёһотой. 15Тиигээд санаарта нэгэ адха шэниисын талха, оливын тоһо, байһан бүхы гүгэл абаад, үргэлэй шэрээ дээрэ шатааха. Энэ хадаа үргэлэй тэмдэг хуби гээшэ, Эзэндэ таатай һайхан үргэл, хуншуу үнэр гээшэ. 16Бусадыень Аһароон хүбүүдтэеэ эдихэ ёһотой. Хилээмэ эһээлтэгүйгөөр, нангин газарта эдихэ хэрэгтэй – майхан һүмын хашаа соо. 17Эһээлтэ хэрэглэн, тэрэниие барижа болохогүй. Өөрынгөө үргэлнүүдһээ тэдээнэй хубита болгон үгэнэ гээшэб. Энэ хадаа нангинай нангин зүйл гээшэ, нүгэл сагааруулгын үргэл болон гарза харюулгын үргэл мэтэ. 18Энээниие Аһарооной эрэ үри һадаһадай эдихэдэ болохо. Энэ хадаа тэдэндэ Эзэнэй үргэлнүүдһээ хэтэ мүнхын хубитань гээшэ. Юумэн бүхэн тэрээндэ хүрөө һаа, арюудхагдаха.

19Тиигээд Эзэн Моисейдэ иигэжэ айладаба:

20– Аһарооной хүбүүд тоһоор түрхюулһэн сагһаа хойшо Эзэндэ саг үргэлжэ иимэ үргэл үргэдэг байха: эфаагай арбанай нэгэ хуби шэниисын талха, хахадынь – үглөөгүүр, хахадынь – үдэшэ. 21Тиигээд яла соо оливын тоһондо болгохо хэрэгтэй. Танай асарһан хилээмэн һайса худхаһан гурилаар баригдаха ёһотой, тэрэниие бутаргагты, таатай һайхан хуншуу үнэр гарган, Эзэндэ үргэгты. 22Энэ үргэлые һахилда хүртэһэн санаартан Аһарооной үри бүхэн бүтээхэ ёһотой. Энэ Эзэнэй хэтэ мүнхын хуули ёһо, талхан үргэл дууһан шатаагдаха ёһотой. 23Санаартанай үргэһэн талхан үргэл бүхэн дууһан шатаагдаха ёһотой, тэрэниие эдижэ болохогүй.

Нүгэлөө сагааруулха тахил

24Эзэн Моисейдэ захирба:

25– Аһароондо, тэрэнэй хүбүүдтэ иигэжэ хэлэ: Энэ бол нүгэл сагааруулгын үргэлэй ёһо гурим гээшэ. Нүгэлөө сагааруулха тахилай мал Эзэнэй үмэнэ, түгэс шатаалта үргэлэй мал үүсэлдэг газарта гаргагдаха ёһотой. Энэ нангинай нангин зүйл гээшэ. 26Нүгэлөө сагааруулха тахил бүтээгшэ санаарта энээнһээ хүртэхэ ёһотой. Хүртэхэдөө, нангин арюун газарта эдихэ ёһотой – майхан һүмын хашаа соо. 27Юумэн бүхэн үргэлэй мяханда хүрөө һаа, арюудхагдаха. Хубсаһан дээрэ шуһанай сэсэрбэл, тэрэ сэсэрһэн хэһэгые нангин газарта зайлаад аба. 28Иимэ үргэлэй мяханай шанагдаһан шабар амһарта бута сохихо хэрэгтэй. Зэд амһарта соо шанаа һаа, тэрээниие ялайтарынь сэбэрлээд, уһаар зайлаха хэрэгтэй. 29Санаарта угтай бүхы эрэшүүл энээние эдихэ эрхэтэй: энэ хадаа нангинай нангин шүтөөн гээшэ. 30Харин нүгэл сагааруулгын үргэлэй малай шуһан майхан һүмэ руу арюудхалгын түлөө оруулагдаа һаань, иимэ үргэлэй мяха эдихэ ёһогүй, галда шатааха хэрэгтэй.