Lev 7 | BxrBBL2024 | STEP | Энэ хадаа гарза харюулгын үргэлэй ёһо гурим гээшэ. Энэ болбол нангинай нангин зүйл мүн.

‏ Leviticus 7

Гарза харюулгын үргэл

1 Энэ хадаа гарза харюулгын үргэлэй ёһо гурим гээшэ. Энэ болбол нангинай нангин зүйл мүн. 2 Гарза харюулгын үргэлэй малые түгэс шатаалта үргэлэй малай ами таһалдаг газарта гаргаха ёһотой. Тиигээд шуһаарнь тахилай ендэр тойруулаад, сүршэхэ хэрэгтэй. 3 Үргэл хэгшэ бүхы дотор өөхэ, һэмжэ, һүүлыень абаха ёһотой. 4 Тиигээд хоёр бөөрынь өөхэтэйнь, гуяынь өөхэ, эльгэнэй өөхэ бөөрэтэй сугтань илгажа абаг. 5 Энээнииень санаарта Эзэндэ үргэл болгон, үргэлэй шэрээ дээрэ шатааха: энэ хадаа гарза харюулгын үргэл болоно гээшэ. 6 Бүхы санаарта эрэшүүл энээниие эдихэ эрхэтэй. Эдихэдээ, нангин газарта эдихэ ёһотой: энэ хадаа аргагүй ехэ нангин шүтөөн мүн. 7 Нүгэл сагааруулгын үргэл, мүн гарза харюулгын үргэл хоёр нэгэ ёһо гуримтай: үргэлэй юумэ үргэл бүтээһэн санаарта абаха эрхэтэй, юуб гэхэдэ, тэрэ арюудхана. 8 Баһа хэн нэгэнэй түгэс шатаалта үргэл бүтээхэдээ, шатаалта үргэлэй арһа үргэл хэгшэ санаарта абаха эрхэтэй. 9 Баһа пеэшэн соо болгоһон, хайруул гү, али яла дээрэ шараһан юумэн тэрэ үргэл бүтээһэн санаартын болохо. 10 Баһа тэрэ тоһотой холиһон гү, али хуурай талхан үргэлнүүдые Аһарооной бүхы хүбүүд илгаагүй абаха эрхэтэй.

Амгалан байдалай түлөө үргэл

11 Энэ бол Эзэндэ үргэхэ амгалан байдалай түлөө үргэлэй ёһо гурим мүн. 12 Хэрбэеэ али нэгэн баяр баясхалан хүргэхын тула үргэл үргэхэеэ һанаа һаа, оливын тоһо холёод, эһээнгүйгөөр бариһан хилээмэ асарха ёһотой, тоһо түрхиһэн эһээлтэгүй лепёошхо, тиигээд оливын тоһо шэнгээһэн, шэниисын талха болон оливын тоһотой худхаһан хилээмэ асарха ёһотой. 13 Лепёошхонуудһаа гадна баяр хүргэһэн амгалан байдалай түлөө үргэлдэ эһээһэн хилээмэ асараг. 14 Бүхы үргэһэн юумэнүүдһээн нэгыень абаад, Эзэндэ үргэл болгон үргэг: энэ амгалан байдалай түлөө үргэлэй шуһа сүршэгшэ санаартанай болохо юм. 15 Баяр хүргэһэн амгалан байдалай түлөө үргэлэй мяхан тэрэл үдэртөө эдигдэхэ ёһотой, үглөө болотор тэрээнһээ юумэн үлэхэ ёһогүй. 16 Хэрбэеэ хэн нэгэнэй тангаригаар гү, али өөрын дураар үргэл бүтээгээ һаань, үргэһэн юумыень тэрэ үдэртөө эдеэд, үлэһыень үглөөдэрынь эдижэ болохо. 17 Үргэлэй мяханһаа гурбадахи үдэр болотор юумэнэй үлөө һаань, тэрэниие галда шатааха хэрэгтэй. 18 Хэрбэеэ амгалан байдалай түлөө үргэлэй мяханһаа гурбадахи үдэртөө хүнэй эдеэ һаань, тэрэ үргэл үйлэдэһэн хүнэй үргэлынь тоогдохогүй, бузартаха, харин эдиһэн хүн гэмтэй болохо. 19 Баһа бузартай юумэндэ хүрэһэн мяхые эдижэ болохогүй, тэрээниие галдаха хэрэгтэй, зүгээр бүзаргүй мяха арюун сэбэр хүнэй эдихэдэ болохо. 20 Хэрбэеэ бузартай хүнэй Эзэнэй амгалан байдалай түлөө үргэлэй мяханһаа ама хүрөө һаань, тэрэ хүн арад түмэнэйнгөө тоодо тоологдохоёо болихо. 21 Хэрбэеэ али нэгэнэй бузартаад, хүнэй муухай юумэндэ хүрөөд, үгы һаа, малай бузарта гү, үгышье һаа бузартай хорхой шабхайда гар хүрөөд, Эзэнэй амгалан байдалай түлөө үргэлэй мяханһаа ама хүрөө һаань, тэрэ хүн арад түмэнэйнгөө тоодо тоологдохоёо болихо.

Өөхэн ба шуһан

22 Тиигээд Эзэн Моисейдэ үгүүлбэ:

23 – Израильшуудта иигэжэ хэлээрэй: Ямаршье өөхэ (үхэрэйшье, хони ямаанайшье) бү эдигты. 24 Зоболонгой өөхэ, һэеын өөхэ элдэб ушарта хэрэглэжэ болохо, харин эдижэ болохогүй. 25 Эзэндэ үргэгдэжэ байгаа малай өөхэ эдиһэн хүн Бурханай арадай нэгэн гэжэ тоологдохоёо болихо. 26 Хаанашье, ямаршье нютагта ажамидаржа байхадаа, малай гү, али шубуунайшье шуһа бү эдигты. 27 Хэрбэеэ хэн нэгэн ямаршье шуһа эдидэг байгаа һаа, арад түмэнэйнгөө тоодо тоологдохоёо болихо.

Санаартын хуби

28 Тиигээд Эзэн Моисейдэ иигэжэ үгүүлбэ:

29 – Израильшуудта хэлээрэй: Али хэн нэгэн амгалан байдалай түлөө үргэл Эзэндэ үргөө һаа, тэрэ хүн үргэлэй нэгэ хубииень Эзэндэ зорюулха ёһотой. 30 Тэрэ хүн Эзэндэ үргэл болгон, өөхэ үбсүүтэйнь Эзэнэй үмэнэ өөрынгөө гараар дэен дэлгэн асарха ёһотой ^{▼▼ Дэен дэлгэхэ гээшэ Бурханда зорюулһан удхатай. Дэен дэлгэһэн мяхан санаартанай хүнэһэн болодог, гэбэшье үргэл бүтээ гэжэ тоологдодог.}. 31 Өөхыень санаарта үргэлэй шэрээ дээрэ шатааха, харин үбсүүниинь Аһароонтоной болохо ёһотой. 32 Амгалан байдалай түлөө өөрын үргэлнүүдһээ баруун гуяыень бэлэг болгон, санаартада үгэдэг байгты. 33 Хэн Аһарооной хүбүүдһээ амгалан байдалай түлөө үргэлэй шуһа болон өөхэ үргэнэб, тэрэ баруун гуяыень абаха ёһотой. 34 Юундэб гэхэдэ, Би израильшуудай амгалан байдалай түлөө үргэлнүүдһээ бэлэг болгон үргэгдэхэ үбсүү болон бэлэг болгон үргэгдэхэ гуя абаад, Аһароон санаартада, тэрээнэй хүбүүдтэнь хуби болгон, израильшуудай зүгһөө мүнхэ тогтоолоор баринаб.

35 Аһароон ба тэрэнэй удамынь Эзэнэй санаартан боложо, һахил хүртэһэн үдэрһөө хойшо Эзэндэ үргэһэн үргэлнүүдһээ иимэ хуби абадаг юм. 36 Оливын тоһо түрхижэ, һахилда хүртүүлһэн үдэрһөө хойшо тэдээндэ израильшууд хэтэ мүнхэдөө, үеһөө үе дамжан, иимэ хуби үгэдэг байха гэжэ Эзэн захирһан байна.

Үрэ дүн

37 Эдэ хадаа түгэс шатаалта, талхан, нүгэл сагааруулгын, гарза харюулгын, һахил хүртөөлгын, амгалан байдалай түлөө үргэлнүүдэй хуулинууд мүн. 38 Синай губида израильшуудта Эзэндээ үргэл үргэгты гэжэ захирхадаа, эдэ бүгэдые Эзэн Синай хада дээрэ Моисейдэ захиһан байна.