Lev 8 | BxrBBL2024 | STEP | Эзэн Моисейдэ иимэ зарлиг буулгаба:

‏ Leviticus 8

Аһароон болон хүбүүдэйнь һахил хүртэлгэ

1 Эзэн Моисейдэ иимэ зарлиг буулгаба:

2 – Аһароон болон тэрээнэй хүбүүдые абаад, хубсаһа хунар, тоһолхо тоһо, нүгэл сагааруулгын үргэл болохо нэгэ буха, хоёр хуса, нэгэ түрсүүг эһээлтэгүй хилээмэ асара. 3 Суглаанай майхан һүмын үүдэнэй дэргэдэ бүхы бүлгэм зониие суглуула.

4 Моисей Эзэнэй зарлигаар үйлэдэжэ, майхан һүмын дэргэдэ арад зониие суглуулба. 5 Тиигээд Моисей арад зондоо хэлэбэ:

– Энэ хадаа Эзэнэй юу үйлэдэхын тухай буулгаһан зарлиг мүн.

6 Тиигээд Моисей Аһароониие хүбүүдтэйнь ерүүлээд, уһаар угаалга хэбэ. 7 Аһароондо самса үмдэхүүлжэ, бүһөөр бүһэлүүлээд, дээрэһээнь гадар самса үмдэхүүлбэ. Дээрэһээнь эфод үмдүүлээд, эфодой угалзата бүһөөр бүһэлбэ. 8 Тиигээд сээжэбшэ-уута үмдэхүүлээд, досоонь урим ба туммим хэбэ. 9 Эзэнэй захиһан үгөөр, толгой дээрэнь боолто малгай үмдэхүүлбэ, тэрэ малгайдань урдаа алтан хабтаһатай нангин шүтөөнэй титим һуулгажа барюулба.

10 Тиигээд Моисей оливын тоһоор майхан һүмые, тэндэ байһан бүхы юумэнүүдые тоһолоод, арюудхаба. 11 Үргэлэй шэрээе долоо дахин сүршэжэ, шэрээ болон тэрээнэй хамаг хэрэгсэлнүүдые, угаалга хэдэг амһарта, тэрээнэй хаяа тоһолбо. 12 Тиигээд тэрэ тоһолхо тоһонһоо Аһарооной толгой дээрэнь адхан, тэрэниие тоһолон арюудхаба. 13 Моисей Аһарооной хүбүүдые ерүүлээд, Эзэнэй захиралтаар тэдээндэ самса үмдэхүүлээд, бүһөөр бүһэлөөд, толгойдонь боолтонуудые бообо.

14 Тиигээд тэрэ нүгэл сагааруулгын үргэл болохо нэгэ буха асарба; Аһароон хүбүүдтэеэ нүгэлэй түлөө үргэл болохо бухын тархида гараа табиба. 15 Тэрэниие үүсэлһэнэй хойно Моисей шуһанһаань хургаараа абаад, үргэлэй шэрээгэй эбэрнүүдтэ түрхеэд, үргэлэй шэрээе арюудхаба. Үлэһэн шуһыень үргэлэй шэрээгэй доогуур адхаба, иигэжэ тэрэ үргэлэй шэрээ арюудхаба. 16 Тиигээд Моисей бүхы дотор өөхыень, эльгэнэй өөхыень, хоёр бөөрэ өөхэтэйнь абаад, үргэлэй шэрээ дээрэ шатааба. 17 Тиигээд Эзэнэй захиралтаар тэрэ бухын арһа ба мяхыень, шабааһатайнь абаад, хотон хүреэнһөө гадагшань гаргажа галдаба.

18 Түгэс шатаалта үргэлэй хуса асараад, Аһароон хүбүүдтэеэ дээрэнь гараа табиба. 19 Тэрээниие үүсэлһэнэй удаа Моисей шуһанһаань абажа, үргэлэй шэрээе тойруулан сүршэбэ. 20 Тиигээд хусын бэе хэдэн хуби болгон хэсэглээд, Моисей тархи, хэсэгүүдыень, өөхыень галда шатааба. 21 Доторыень, хүлнүүдынь уһаар угааба. Тиигээд Моисей хусые бултыень үргэлэй шэрээ дээрэ шатааба. Энэ хадаа түгэс шатаалта үргэл, Эзэндэ аятай анхилал, Эзэнэй Моисейдэ захирһанай ёһоор, Тэрээндэ бэлэг болоно.

22 Тиигээд тэрэ һахил хүртөөлгын үргэлэй хоёрдохи хусаяа асарба. Аһароон хүбүүдтэеэ тархи дээрэнь гараа табиба. 23 Тэрэниие гаргаһанай хойно Моисей шуһанһаань абаад, Аһарооной баруун шэхэнэй омогто, тиигээд баруун гарайнь эрхыдэ ба баруун хүлэйнь эрхыдэ түрхибэ. 24 Моисей Аһарооной хүбүүдые ерүүлээд, тэдэнэй баруун шэхэнэй омогто, тиигээд баруун гарайнь эрхыдэ ба баруун хүлэйнь эрхыдэ шуһанһаа түрхеэд, үлэһэн шуһыень үргэлэй шэрээ дээрэ тойруулан сүршэбэ. 25 Тиигээд тэрэ өөхэ – тарган һүүлыень, хамаг дотор өөхэ һэмжыень, эльгэнэйнь өөхэ, хоёр бөөрэ өөхэтэйнь, хусын баруун гуя абаба. 26 Эзэнэй урда табяатай эһээлтэгүйгөөр бариһан хилээмэнтэй түрсүүгһээ Моисей эһээлтэгүй нэгэ хилээмэ, оливын тоһотой бообо, нэгэ бообо абаад, хусын өөхэн болон баруун гуя дээрэ табиба. 27 Бултыень Аһароон ба хүбүүдэйнь гар дээрэ табяад, дэен дэлгэгдэхэ үргэл болгон Эзэнэй үмэнэ дэен дэлгүүлбэ. 28 Тиигээд Моисей тэдээнэй гарһаа эдэ бүгэдые абаад, түгэс шатаалта үргэлтэй хамта үргэлэй шэрээ дээрэ галдаба, энэ хадаа Эзэндэ аятай һайхан хуншуу үнэртэй һахил хүртөөлгын үргэл болобо. 29 Тиигээд Моисей һахилай үргэл болохо хусын үбсүүень абаад, Эзэнэй үмэнэ дэен дэлгэбэ. Эзэнэй Моисейдэ захирһаар, энэ хадаа һахил хүртөөлгын үргэлһөө Моисейн хуби байгаа.

30 Тиигээд Моисей тоһолхо тоһонһоо болон үргэлэй шэрээ дээрэ байгша шуһанһаа абаад, Аһароон дээрэ, тэрэнэй хубсаһа, хүбүүдыень, хүбүүдэйнь хубсаһые бүгэдыень арюудхаба.

31 Моисей Аһароон болон хүбүүдтэнь хэлэбэ:

– Таанад майхан һүмын үүдэндэ энэ мяхаа шанаад, һахил хүртөөлгын үргэлэй түрсүүг соо байһан бооботой хамта эдигты, иигэжэ намда захигдаһан гээшэ: «Аһароон болон тэрээнэй хүбүүдынь энээниие эдихэ ёһотой». 32 Үлэһэн мяха, хилээмыень галдагты. 33 Таанад долоон үдэр соо майхан һүмын үүдэнһээ холо бү ошогты, юундэб гэхэдэ, һахил хүртөөлгын ёһололтнай долоон үдэр соо үргэлжэлхэ. 34 Эзэн таанадые арюудхахын тула иигэжэ хэхэ гээд айладаһан байна, тэрэнь мүнөөдэр хэгдэбэ. 35 Таанад майхан һүмын үүдэндэ үдэр-һүнигүй долоон үдэрэй турша соо байгты, үгы һаа, таанад хосорхот. Иигэжэ Эзэнһээ намда захигдаһан юм.

36 Иигэжэ Аһароон болон хүбүүдынь Эзэнэй Моисейгээр дамжуулан захирһые бултыень бүтээбэ.