‏ Nehemiah 12

Иерусалимда түрүүн бусажа ерэһэн левидүүд ба санаартадай нэрын жагсаал

1Иисүүстэй ба Шалтиээлэй хүбүүн Зэрубабээлтэй хамта бусажа ерэһэн левидүүд ба санаартад эдэ болоно:

Сэраяа, Ерэмияа, Эзраа, 2Амарияа, Маллуух, Хаттууш, 3Шэханьяа, Рэхүүм, Мэрэмоот, 4Иддоо, Гиннэтой, Абияа, 5Миямиин, Маадьяа, Билгаа, 6Шэмаяа, Ёярииб, Едаяа, 7Саллуу, Амоог, Хилкияа ба Едаяа. Иисүүсэй үеын санаартадай ба тэдэнэй түрэлнүүдэй толгойлогшод эдэ болоно.

8Тиигээд левидүүд: Иисүүс, Биннуй, Кадмиһээл, Шэрээбияа, Иуда, Маттаанияа. Маттаанияа өөрынгөө түрэл гаралнуудтай хамта баяр баясхалангай дуунуудые эмхидхээ. 9Тэдэнэй албаяа бэелүүлжэ байхадань Бахбуугьяа, Уннии гэгшэд түрэлнүүдтэеэ хамта урдань зогсожо, мүн лэ дууладаг һэн.

Ахамад санаарта Иисүүсэй үри һадаһад

10Ёяхиимай эсэгэ Иисүүс, Ёяхиим Элиашиибай эсэгэ, Элиашииб Ёядаагай эсэгэ, 11Ёядаа Ёнатаанай, харин Ёнатаан Яддууһагай эсэгэ.

Ахамад санаарта Ёяхиимай үеын санаартадай нэрын жагсаал

12Ёяхиимай үеын санаартадай угуудай гулбаанууд эдэ: Мэраяа Сэраяагай угта, Ханаанияа – Ерэмияагай угта, 13Мэшуллаам – Эзраагай угта, Ёханаан – Амарияагай угта, 14Ёнатаан – Маллуухай угта, Иосиф Шэбааньяагай угта, 15Аднаа – Хариимай угта, Хэлхай – Мэрайһоодой угта, 16Захарияа – Иддоогой угта, Мэшуллаам – Гиннэтооной угта, 17Зихрии – Абияагай угта, Пилтай – Миньямиинай, Моадияагай угуудта, 18Шаммууһа – Билгаагай угта, Ёнатаан – Шэмаяагай угта, 19Маттэнай – Ёяриибай угта, Үззии – Едаяагай угта, 20Каллай – Саллуугай угта, Ээбэр – Амоогой угта, 21Хашаабияа Хилкияагай угта, Нэтанээл – Едаяагай угта.

22Персиин Даариин хан шэрээгэй урда Яддууһагай, Ёханаанай, Ёядаагай, Элиашиибай үенүүдтэ левидүүдэй, санаартадай толгойлогшонорой тоо бэшэг ябуулагдаһан байна.

23Элиашиибай хүбүүн Ёханаанай үе саг хүрэтэр левидүүдэй угуудай гулбаанууд угай бэшэгтэ бэшэгдээ.

24Левидүүдэй гулбаанууд: Хашаабияа, Шэрээбияа ба Кадмиһээлэй хүбүүн Иисүүс, баһа тэдэнэй түрэлнүүд шанха урдань зогсодог байгаа; Бурханай хүн Давидай захиһанай ёһоор нэгэ бүлэгынь нүгөөдынгөө шанха урдаһаа баяр баясхалангай магтаал бэелүүлдэг байгаа. 25Маттаанияа, Бахбуугьяа, Обадияа, Мэшуллаам, Талмоон, Аххууб гэгшэд үүдэнүүдэй харуулшад байгаа: тэдэнэр үүдэнүүдэй дэргэдэхи хадагаламжын газарнуудые харууһалдаг һэн.

26Хуули заадаг багша, санаартан Эзраагай, засаг баригша Нэхэмьяагай үедэ Ёцадаагай аша, Иисүүсэй хүбүүн Ёяхиимай үедэ эдэ зон ажаһуугаа.

Иерусалимай хана арюудхалгын ёһолол

27Иерусалимай ханые баярай оршондо арюудхахын тула Иерусалимда хэсэ хэнгэрэгээр болон ятагаар наадаха, дуу дуулаха, баярай мүргэл бэелүүлхэ левидүүд нютаг бүхэнһөө суглуулагдаба. 28Иерусалимай оршон тойронһоо дуушад суглуулагдаба: Нэтопаадай тосхонуудһаа, 29Бэт-ха-Гилгаалһаа, Гээбэ ба Азмаавэт тойрогуудһаа (дуушад Иерусалим тойруулаад тосхонуудые барибад). 30Санаартад болон левидүүд өөһэдыгөө арюудхажа, удаань арад зониие, хана, үүдэнүүдые арюудхаха ёһолол хэбэ.

31Би Иудын обогой удамаршадые ханада асаржа, тиигээд баяр баясхалангай ябаган дуушадай хоёр ехэ жагсаал эмхидхэн байгуулбаб. Тэрэнэй нэгэниинь ханын баруун талаһаа Бог шоройн үүдэн тээшэ ошобо. 32Хойноһоонь Иудын обогой удамаршадай хахадынь, тиигээд Һошаяа ябаба, 33тэдэнэрэй удаа Азаарияа, Эзраа, Мэшуллаам, 34Иуда, Бэньямиин, Шэмаяа болон Ерэмияа, 35тиигээд бүреэнүүдтэй санаартад, баһа тиигээд Ёнатаанай хүбүүн Захарияа (Ёнатаан Шэмаяагай хүбүүн, Шэмаяа Маттаанияагай, Маттаанияа Михайяагай, Михайяа Заххуурай, Заххуур Асаапай хүбүүн бэлэй), 36тиигээд тэрэнэй түрэлнүүд Шэмаяа, Азарээл, Милалай, Гилалай, Маһай, Нэтанээл, Иуда болон Ханаани Бурханай хүн Давидай хүгжэмэй хэрэгсэлнүүдтэй ябабад. Урдань Хуули заадаг багша Эзраа ябаба. 37Булагай үүдэ үнгэрөөд, Давидай Хотын табсангуудаар тэдэнэр дээшэлээд, хана үгсэн Давидай гэрэй хажуугаар зүүлжээ Уһашанай үүдэн хүрэтэр.

38Дуушадай хоёрдохи жагсаал зүүн гар тээшэ шэглэбэ, би тэдэнэй хойноһоо хүн зонойнь хахадтай хамта хана зубшан, Пеэшэншэнэй хэрэм үнгэрөөд, Үргэн хана хүрэтэр, 39Эпрааимай үүдэ үнгэрөөд, Хуушан үүдэ, Загаһанай үүдэ, Хананээлэй хэрэм, тиигээд Зуунай хэрэмһээ Хониной үүдэн хүрэтэр. Жагсаал Харуулшанай үүдэндэ зогсобо.

40Һүүлээрнь хоёр жагсаал Бурханай гэрэй хажууда зогсобод. Тэндэ би байбаб, намтай хамта даргануудай хахадынь, 41санаартад Элиакиим, Маашэяа, Миньямиин, Михайяа, Эльйоэнай, Захарияа, Ханаанияа – бүреэнүүдтэй, 42харин тиигээд Маашэяа, Шэмаяа, Эльазаар, Үззии, Ёханаан, Малхияа, Элаам болон Ээзэр. Дуушад аһан шадалаараа шангаар дууланад, тэдэниие ударидагша Израахия байба. 43Тэрэ үдэр арад зон аргагүй ехэ үргэл бүтээбэ, удаань аргагүй ехээр баярлабад – Бурхан тэдэнэртэ агуу баяр үршөөбэ. Эхэнэрнүүд, үхибүүдшье хүхилдэбэд. Иерусалимай баярай хүхилгэ аяар холоһоо дуулдажа байгаа!

Һүмые тэдхэхэ үргэлнүүдые суглуулагшад томилогдоо

44Тэрэ үдэр хадагаламжануудые даагшанар томилогдобо, тэдэнэр эндэ оруулагдаһан хүнэһэ болон элдэб зүйлнүүдые, хото бүхэнэй мэдэлэй газарһаа суглуулагдаһан ургасын арбанай нэгэ хубиие, түрүүшын ургасын дээжэ үргэлнүүдые бүридхэн абаха, санаартадта, левидүүдтэ Хуулиин ёһоор үгтэхэ хубинуудые тодорхойлхо зэргэтэй. Зогсон албаяа хэжэ байгааша санаартад, левидүүд – Иудын улад зондо баяр хүхилдөөн бшуу. 45Давидай, тэрэнэй хүбүүн Соломооной заабариин ёһоор тэдэнэр өөрынгөө Бурханда мүргэл, мүн арюудхалгын ёһолол бэелүүлээ, тэдээнтэй хамта дуушад, үүдэнүүдэй харуулшад байлсаа. 46Юуб гэхэдэ, Давидай, мүн Асаапай эртэ урдын үедэ дуушадай дарганууд томилогдонхой, Бурханда магтаалай дуунууд, баяр баясхалангай дуунууд тодоруулагданхай байгаа. 47Харин Зэрубабээлэй, мүн Нэхэмьяагай үенүүдтэ бүхы израильшууд дуушадта, мүн үүдэнүүдэй харуулшадай үдэр бүриин аша туһада хубитые оруулдаг, тэрээнһээ гадна левидүүдэй хубиие таһалдаг, левидүүд Аһарооной үри һадаһадай хубиие таһалжа үгэдэг һэн.