‏ Nehemiah 13

Израильшууд ондоо яһатаниие өөһэдэйнгөө дундаһаа тусгаарлан холодуулба

1Тэрэ үдэр арад зондо Моисейн ном уншагдаба. Аммооной ба моһаабай зон Бурханай арадтай хэзээшье хамтархагүй гээд тэндэ бэшэгдэнхэй байба. 2Юуб гэхэдэ, тэдэнэр израильшуудые эдеэ хоолоор, ууха ундаар угтаагүй, харин тэдэнэртэ хараал буулгаха хүсэлэнтэйгөөр Балаһаамые тухираа бшуу. Зүгөөр манай Бурхан хараалыень үреэл болгоо. 3Зон энэ хуулиин удхые мэдэһэнэй һүүлээр Израильһаа бүхы ондоо яһатаниие таһалба.

Нэхэмьяа ба Тобияа

4Манай Бурханай гэрэй таһалгануудые даагша, Тобияатай түрэлэй һабагшатай санаартан Элиашииб энээнэй урда тээ 5арбанай нэгэ хуби гэжэ левидүүдтэ, дуушадта, үүдэнэй харуулшадта үгтэдэг орооһо, үзэмэй дараһан архи, тоһо гэхэ мэтые, санаартадта бэлэгүүдые, талхан үргэлнүүдые, уталгануудые, амһартануудые хадагалдаг байһан ехэ таһалгые Тобияада үгэбэ. 6Харин тэрэ үедэ би Иерусалимда байгаагүйб: Вавилооной хаан Артагсээрэгсэй гушан хоёрдохи жэлээ хан шэрээдэ һууһан үедэнь хаанда ошоод байгааб. Нэгэ хэдэн сагай һүүлээр би хаанһаа зүбшөөл абаад, 7Иерусалим бусажа ерэбэб, Элиашиибай Тобияагай туһада ямар муу юумэ хэһэниие, Бурханай гэрэй хашаа соо таһалга үгэһые мэдэбэб! 8Би ехэ уурлаад, Тобияагай зөөри зөөшые энэ таһалгаһаа гаргажа хаябаб. 9Удаань таһалгануудые арюудхуулаад, Бурханай гэртэ хэрэгтэй юумэнүүдые, хилээмэн үргэлнүүдые, уталгануудые дахин хадагалуулдаг болобоб.

Нэхэмьяа левидүүдтэ тэдхэмжэ тогтооно

10Левидүүдтэ үгтэхэ хубиин үгтэхэеэ болиходо, алба бэелүүлдэг левидүүд дуушадтаяа хамта өөһэд өөһэдынгөө газар гүйлдэбэ гэжэ мэдэбэб. 11Би даргануудые зэмэлэн, иигэжэ хэлэбэб: «Юундэ Бурханай гэр хэрэгсээнгүй байха болобоб?» Ябагшадые би һөөргэнь бусаажа, албанайнь газарнуудта табибаб. 12Иудын бүхы үри һадаһад орооһоной, үзэмэй дараһан архиин, тоһоной арбанай нэгэ хубиие хадагаламжада оруулжа эхилбэд. 13Би хадагаламжануудые даагшадаар санаартан Шэлээмияае, Хуули заадаг багша Цадоогые, мүн левит Пэдаяае томилбоб, харин тэдэнэй туһалагшаар Маттаанияагай аша, Заххуурай хүбүүн Ханаһааные табибаб. Тэдэнэр ехэ найдамтай хүнүүд гээд тоологдодог һэн. Тэдэнэр өөһэдынгөө аха дүүнэрэй хоорондо бүхы юумэ хубаарилха уялгатайнууд байгаа.

14Бурханайнгаа гэрэй аша туһада, мүргэл ябуулхын тула бэелүүлһэн һайн хэрэгүүдыемни хадуужа абыт! Бурхамни, минии ашые һанан байгыт!

Нэхэмьяа израильшуудта субботын үдэр сахихыень захирна

15Субботын үдэр Иудада ажаһуугшад тусхай амһарта соо уһан үзэм низалан дарадаг, үзэмэй дараһан архи, уһан үзэм, алим жэмэсүүдые, элдэб ашаануудые элжэгээр зөөдэг байна гэжэ тэрэ үедэ мэдэжэ абабаб. Субботын үдэр энэ бүгэдые Иерусалим руу тэдэнэр асарна. Тэрэ үдэр тэдэнэрэй наймаагаа эрхилжэ байхадань, би энэ үдэрһөө хойшо иимэ ябадал хэхэ ёһогүйт гэжэ тэдэнэртэ хэлэбэб.

16Тиирһээ уг гарбалтай хүнүүд элдэб ашаа, загаһа субботын үдэр Иудада, Иерусалимда ажаһуугшадта худалдадаг байгаа.

17Би Иудын ноёд һайдые зэмэлбэб. Тиигээд би тэдэнэртэ иигэжэ хэлэбэб:

– Таанад яахадаа иимэ муу ябадал гаргажа, субботын үдэрые бузарланабта? 18Танай үбгэ эсэгэнэрэй иимэ ябадалайнь түлөө манай Бурхан маанадта, энэ хотодо бэрхэшээлнүүдые эльгээгээ бэлэй. Субботые бузарлаһанайнгаа түлөө таанар Израильда үшөө ехэ гай тодхор ушаруулхатнай.

19Суббото эхилхын урда, Иерусалимай үүдэндэ боро хараанай эхилхэдэ, би үүдэнүүдыень хааха, субботын үнгэртэр нээхэгүй гээд захирбаб. Субботын үдэр хото руу ямаршье юумэ оруулхагүйн тула би үүдэнүүдэй хажууда өөрынгөө зарамалнуудые табибаб.

20Элдэб бараатай худалдаашад, наймаашад Иерусалимай ханын саана хэдэн һүниеэ дахин дахин үнгэргэхэ баатай болобод, 21зүгөөр би тэдэнэртэ уридшалан мэдээсээд, иигэжэ дуулгааб:

– Таанар хотын ханын дэргэдэ яахадаа хононобта? Хэрбэеэ үшөө дахин дабтабалтнай, таанарта хүсэ хэрэглэхэб.

Тэрэ гэһэн сагһаа хойшо субботын үдэрнүүдтэ тэдэнэр үзэгдэхэеэ болёо һэн.

22Субботын нангиниие тахихын тула би левидүүдтэ арюудхалга хээд, үүдэнэй харуулда зогсохо гэһэн захиралта үгэбэб.

Өөрынгөө агуу хайраар, минии Бурхан, намайе үршөөгыт, минии аша туһада энэниие хадуужа абыт.

Нэхэмьяа бусад яһанай хүнтэй гэрлэлгые буруушаана

23Зарим иудейнүүд Ашдоодой, Аммооной, Моһаабай эхэнэрнүүдые һамга абанхай гэжэ тэдэ үдэрнүүдтэ харабаб. 24Тэдэнэй үхибүүдэй хахадынь ашдоодой, үгышье һаа, ондоо арадуудай хэлэн дээрэ хэлэнэ, тэдэнэр еврей хэлэ мэдэнэгүй.

25Би эдэ хүнүүдые хараажа, хараал шэнгээжэ эхилээд, харин нэгэ хэдыень сохёод, үһыень зулгаабаб. Би тэдэнэртэ Бурханай урда тангариг абхуулаад, иигэжэ хэлэбэб:

– Өөһэдынгөө басагадые тэдэнэй хүбүүдэй һамган болгуулхагүй, тэдэнэй басагадаар бэри хэхэгүй, өөһэдтөөшье абахагүйбди гээд тангариглагты! 26Израилиин хаан Соломоон иимэ нүгэл хэһэн юм. Олон арадуудай дунда тэрээндэл адли бэлигтэй хаан байгаагүйл, тэрэ хадаа Бурханаар үршөөгдэһэн, тэрэниие Бурхан бүхы Израилиин хаан болгоо, зүгөөр ондоо яһатанай һамгадынь тэрэнииешье нүгэлдэ оруулаал. 27Ондоо яһанай басагадаар һамга хэжэ, өөрынгөө Бурханда урбажа, энэ ехэ нүгэл таанадые хэжэ байна гэжэ бидэ дуулажа байха болоно гүбди?!

28Ахамад санаартан Элиашиибай хүбүүн Ёядаагай хүбүүдэй нэгэн Хороон нютагай Санбаллаадай хүрьгэн байгаа; би тэрэниие өөрһөө үлдэбэб.

29Нангин нэрэ зэргэеэ, Тантай баталһан хэлсээгээ, левидүүд, санаартад таанад, гутаабат гэжэ тэдэнэртэ һануулыт, минии Бурхан.

30Ондоо яһатанһаа хүн зоноо арюудхан сэбэрлээд, санаартадта, левидүүдтэ тэдэнэй бэелүүлхэ уялгануудыень тус бүридэнь заажа үгэбэб, 31хараалагдаһан болзортонь түлеэ асарха, түрүүшын ургасаһаа үргэл үргэхэ хэрэгүүдтэнь һаналыень хандуулбаб.

Минии Бурхан, нам тухай һанажа байгыт, ашыем харюулыт!