Neh 2 | BxrBBL2024 | STEP | Артагсээрэгс хаанай хоридохи жэлээ ударидажа байһан хабарай нисаан һарада энэ ушар болоһон юм. Хаанда үзэмэй дараһан архи асархадань, би аягалаад, тэрээндэ барибаб. Хүндэ бодолдо абтаад байхыем хаан урид үшөө үзөөдүй байгаа. Тиимэһээ мүнөө хараад,

‏ Nehemiah 2

Иерусалимые тойруулан шэнээр хана барихыень хаан Нэхэмьяада зүбшөөнэ

1 Артагсээрэгс хаанай хоридохи жэлээ ударидажа байһан хабарай нисаан һарада ^{▼▼ Нисаан һарада – март-апрель.} энэ ушар болоһон юм. Хаанда үзэмэй дараһан архи асархадань, би аягалаад, тэрээндэ барибаб. Хүндэ бодолдо абтаад байхыем хаан урид үшөө үзөөдүй байгаа. Тиимэһээ мүнөө хараад, 2 хаан иигэжэ намһаа асууба:

– Ши юундэ иимэ гунигтайбши? Ши үбдэнэ бэшэлши. Энэш элдэб бодолһоо бэшэ юм бэзэ?

Би айхабтар ехээр айһанһаа 3 хаанда иигэжэ хэлэбэб:

– Хаан хэтэ мүнхэдэ ажаһууг лэ! Минии элинсэгүүдэймни хүдөөлүүлэгдэһэн хотын һандаргагдаад, үүдэнүүдэйнь галдагдаад байхада муудангүй яахабиб?

4 Хаан иигэжэ хэлэбэ:

– Тиигээд юу эрихэеэ һананабши?

Огторгойн Бурханда зальбарһанай удаа 5 хаанда иигэжэ хэлэбэб:

– Хэрбэеэ хаан хайраа үршөөжэ, богоолойтнай танда хэрэгтэй байбалнь, элинсэгүүдэйм хүдөөлүүлэгдэһэн Иудын хото эльгээгыт, би энэ хотые шэнээр бодхоохолби.

6 Хаан намһаа иигэжэ асууба (хатаниинь хажуудань һуужа байгаа):

– Ши удаанаар ошохоёо һанана гүш? Хэзээ бусахабши?

Хаан намайе эльгээхэ зүбшөөл үгэжэрхибэ! Би бусаха болзороо хэлэн, 7 иигэжэ хэлэбэб:

– Хэрбэеэ хаан дэмжэбэл, Евфратһаа баруулжаа газарнуудай засаг баряашадта бэшэгүүдые эльгээжэ, Иудын орон нютаг ошохо зүбшөөл намда үгэг лэ; 8 хаанай ойн харуулшан Асаапта Һүмын хажуудахи хэрэм хана ба үүдэнүүдэй, хотын хэрэм ханын, минии байха гэрэй модо үгэхэ тухай бэшэг үгэг лэ.

Минии Бурхан намтай байжа, хаан эдэ бүгэдые үгэбэ.

9 Евфратһаа баруулжаа газарнуудай засаг баряашадта ерээд, хаанай бэшэгүүдые үгэбэб. Хаан намтай сэрэгэй нэгэ хэдэн даргануудые морин сэрэгтэй суг эльгээһэн байгаа.

10 Хороон нютагай Санбаллаат Аммоон нютагай Тобияа хоёр энээн тухай мэдээд, израильшуудай аша туһые хамгаалха хүн бии болобо гээд ехээр халаглабад.

11 Би Иерусалим ерээд, тэндэ гурбан хоног соо байбаб. 12 Һүни би гэрһээ гарабаб; намтай нэгэ хэдэн хүнүүд байгаа. Иерусалимай аша туһада иимэ хэрэг бэелүүлхыем минии Бурхан даалгаба гэжэ хэндэшье хэлээгүй байгааб. Би элжэгэ унаад, харин намайе үдэшэгшэд ябагаар ябаба. 13 Иерусалимай ханануудые шэнжэлэн, Нугын үүдэн гэдэг хаалгаар һүни гараад, би Луу могойн булаг, Шэбхэ шоройн үүдэн гэдэг хаалганууд руу шэглэн ошобоб. Ханануудынь һандаргагданхай, үүдэнүүдынь галдагданхай байба. 14 Минии Булагай үүдэн болон Хаанай сөөрэм хүрэхэдэ, унаагаар ябахын аргагүй байба. 15 Би һүни дахин хана шэнжэлэн, жалга үгсэн дээшэлбэб, һүүлээрнь Нугын үүдээр гэдэргээ хото бусабаб.

16 Минии хайшаа ошоһые, юу хэһые дарганар мэдэбэгүй. Эдэ бүхы хүдэлмэри бэелүүлхэ болоһон тухайнь нэгэ хэды сагай үнгэртэр иудейнүүдтэ, санаартадта, баяшуулда, даргануудта ба барилгашадта би юушье хэлээгүй байгааб.

17 Харин мүнөө би тэдэнэртэ иигэжэ хэлэбэб:

– Ямар гай тодхорто байһанаа таанад хаража байнат. Иерусалим һандаргагдаа, хаалга үүдэнүүдынь галда шатаагданхай. Иерусалимай хэрэм ханануудые бодхооёл, өөһэдһөө эшхэбтэр муухайе зайлуулаял!

18 Бурханаймни намайе үршөөһые, хаанай намда юу хэлэһые би тэдэнэртэ дуулгабаб.

– Бодхоохобди, барихабди! – гэжэ тэдэнэр хэлэбэд. Тиигээд дэмбэрэлтэй энэ хэрэгээ бэелүүлжэ эхилбэд.

19 Хороон нютагай Санбаллаат, Аммоон нютагай Тобияа, арааб яһанай Гээшэм энээн тухай мэдээд, маниие баһажа, доромжолжо эхилбэд.

Тэдэнэр иигэжэ хэлэбэд:

– Таанад юу хэжэ байнабта? Хаанай урдаһаа бодохотнай гээшэ гү?

20 Би тэдэнэртэ иигэжэ харюусабаб:

– Огторгойн Бурхан бидэндэ амжалта үршөөнэ. Бидэ, Тэрэнэй богоолнууд, барилга эхилхэмнай! Харин таанарта Иерусалимда өөрын хуби байхагүй, ямаршье эрхэгүйт, таанад тухай эндэ дурдалгашье байхагүй!