Neh 5 | BxrBBL2024 | STEP | Зоной нэгэ хэдынь, мүн тэдэнэй һамгад өөһэдынгөө яһатан иудейнүүдтэ ехээр гомдожо гэмэрэлдэбэд.

‏ Nehemiah 5

Нэхэмьяа үри шэритэй обогойнгоо зониие хүлисэхыень иудейнүүдые баадхана

1 Зоной нэгэ хэдынь, мүн тэдэнэй һамгад өөһэдынгөө яһатан иудейнүүдтэ ехээр гомдожо гэмэрэлдэбэд. 2 Тэдэнэй заримань иигэжэ хэлэбэ:

– Бидэ өөһэдөө, басагад, хүбүүднайшье ехэ олон. Тиимэһээ бэеэ тэжээхын тула маанадта ехэ талха таряан хэрэгтэй болоно.

3 Нүгөөдүүлынь иигэжэ нэмэбэ:

– Үлэсхэлэн байдалай үедэ орооһо таряагаар гэр байраяа, сэсэрлиг таряалангуудаа барисаанда үгэхэ баатай болонобди.

4 Гурбадахинь баһа иигэжэ хэлэбэ:

– Бидэ хаанда алба татабари түлэхын тула таряанайнгаа газар, уһан үзэмэй талбай барисаанда үгэжэ, мүнгэ зээлеэр абаха баатай болонобди. 5 Бидэ нэгэ яһатан, нэгэ мяха шуһатайлди, манай үхибүүд тэдэнэйхи мэтэл. Зүгөөр бидэ хүбүүд болон басагадаа богоол болгохо болонобди, манай басагадай зариманиинь хүсөөр зарагдажа байна. Манай таряалан, сэсэрлиг ондоо зоной мэдэлдэ, бидэ ямаршье шадалгүйбди.

6 Би тэдэнэй иимэ гэмэрэлдээе дуулаад, аргагүй ехээр сухалдабаб. 7 Би бодожо үзөөд, ноёд һайдуудые, баяшуулые, даргануудые зэмэлбэб. Тиигээд би тэдэнэртэ иигэжэ хэлэбэб:

– Таанар юундэ аха дүүнэртээ алта мүнгэ ехэ түрэсэтэйгээр зээллэжэ, баяжажа байнат?!

Би энэ ушараар суглаа зарлабаб, 8 ноёд һайдта иигэжэ хэлэбэб:

– Бидэ ондоо шажантанда худалдагдаһан аха дүү иудейнүүдээ арга шадалаараа бусаажа абахые оролдонобди. Харин тиихэдэ таанар өөһэдынгөө аха дүүнэрые наймаалжа байхат! Дахин бидэ тэдэниие худалдажа абаха болоно гүбди?!

Тэдэнэр шэмээгүй, юушье хэлэхэ аргагүй байбад.

9 Тиигээд би үргэлжэлүүлбэб:

– Таанар аргагүй муухай үйлэ хэрэгүүдые үүсхэжэ байнат. Нэн түрүүн өөһэдынгөө Бурханһаа айха ёһотой байгаат! Таанар манай дайсад, буруу номнолтоной наада энеэдэн болохо гэжэ байнат. 10 Би өөрөө, мүн минии түрэл гаралнууд, зарамалнууд бултадаа мүнгэ, орооһо таряа зээлеэр үгэнэбди. Зүгөөр иимэ ябадалаар баяжахаяа болиёл! 11 Тэдэнэртэ зээлеэр үгэһэн мүнгэнэй түрэсэ, мүн орооһо таряа, үзэмэй дараһан архи, ургамалай тоһоной түлөө барисаанда абаһан таряалан, үзэм жэмэсэй сэсэрлигүүдыень, оливын һөөгүүдыень, гэр байрануудыень энэ үдэрһөө гэдэргэнь бусаагты.

12 Тэдэнэр иигэжэ харюусабад:

– Бусаахабди, тэдэнһээ юушье эрихэеэ болёобди! Танай хэлэһээр хэхэбди.

Би санаартадые дуудабаб, эндэ байгшадһаа тангариг абабаб, тэдэнэр хэлэһэнээ бэелүүлхээр найдуулба. 13 Би хормойгоо һэжэрэн иигэжэ хэлэбэб:

– Хэлэһэн үгэеэ дүүргэдэггүй хүнүүдые Бурхан гэр байраһаань, зөөри баялигуудһаань холодуулаг лэ. Иимэ хүн үгырэн хооһорог!

Бүхы суглаан дэмжэбэ:

– Болтогой!

Удаань Бурхандаа магтаал үргэбэ.

Тиигээд булта хэлэһэнээ дүүргээ бэлэй.

Нэхэмьяа ямаршье тэдхэмжэ салин абангүй Иудын орон нютагые зонхилно

14 Арбан хоёр жэлэй туршада, Артагсээрэгсэй хааншалгын хоридохи жэлһээ гушан хоёрдохи жэл болоторынь би Иудын орон нютаг зонхилон байгааб. Энэ үедэ би түрэл гаралнуудтаяа засаглагшада үгтэхэ тэдхэмжэ хэрэглээгүйб. 15 Минии урдахид арад зондо хүндэ хүшэр ашаан мэтэ һэн, засаг баряашад дүшэн шээкэл мүнгэнһөө гадуур өөһэдтөө амтан эдеэ хоолоор, жэмэсэй архяар тэдхэмжэ эридэг байгаа. Тэдэнэй зарамалнууд хүн зониие зобоодог һэн. Би Бурханаа ехээр хүндэлдэг ушарһаа иимэ ааша гаргаагүйб.

16 Би хотын ханын заһабарилга эрхилээб. Бидэ өөһэдтөө таряалангуудые худалдажа абаагүйбди, минии бүхы зарамалнууд хамтаран, ханануудые һэргээн бодхоолгодо хабаадаа.

17 Минии хүндын шэрээдэ иудейнүүд, тэдэнэй дарганар дүн хамта зуун табин хүн, мүн тиихэдэ оршон тойрон һууһан яһатануудай дундаһаа зон байдаг һэн. 18 Нэгэ үдэрэй туршада нэгэ сар, шэлэмэл зургаан эрье хонин эдеэ хоолдо хэрэглэгдэдэг бэлэй. Энээнһээ гадна элдэб шубууд эдеэндэ ородог һэн. Арба арбан хоног бүри элдэб янзын үзэмэй дараһан архи элбэгээр асарагдадаг һэн. Би мужын засаглагшада хэрэгтэй элдэб янзын амтан эдеэ хоол эрижэ байгаагүйб, ушарынь гэбэл, арад зон энээнһээ гадна хүндэ ажалда дарагданги байгаа.

19 Энэ арадай түлөө минии оролдоһые, минии Бурхан, хадуун абыт, намда аша туһынь харюулыт!