Neh 6 | BxrBBL2024 | STEP | Санбаллаат, Тобияа, арааб Гээшэм ба манай бусадшье дайсад үүдэнүүдэйнь, хаабаринуудайнь үшөө үлгэгдөөгүй байхада, намайе ханануудые бодхообо, нүхэнүүдые бүтүүлбэ гэжэ дуулаба,

‏ Nehemiah 6

Нэхэмьяагай эсрэг зохёогдоһон хэлсээн

1 Санбаллаат, Тобияа, арааб Гээшэм ба манай бусадшье дайсад үүдэнүүдэйнь, хаабаринуудайнь үшөө үлгэгдөөгүй байхада, намайе ханануудые бодхообо, нүхэнүүдые бүтүүлбэ гэжэ дуулаба, 2 Санбаллаат, Гээшэм гэгшэд намда иимэ удхатай захяа эльгээбэ:

– Оноо нугада Хахапириимдэ уулзая.

Тэдэнэр минии урдаһаа муу хэрэг хараалба. 3 Би тэдэнэртэ захяа хүргэгшөөр иимэ мэдээ дамжуулбаб:

– Би нэгэ ехэ ажал хэжэ байнаб, танда хүрэжэ ошохо тухагүйб. Би бултыень орхёод, ажалаа хаяжа, танда ошохо юм гүб?

4 Эдэнэр намайе дүрбэ дахин уриба, би урилга бүхэндэнь тэдэнэртэ тиимээр харюу эльгээбэб. 5 Санбаллаат өөрынгөө зарасые табадахияа намда эльгээбэ. Тэрэ задархай бэшэг асарба, 6 тэрээн соонь иигэжэ бэшээтэй байба:

– Зоной дунда, мүн Гээшэм соо иимэ һураг суу гарана, ши иудейнүүдтэй суг буһалгаа үүсхэхэ зорилготойш, ушар иимэһээ ханануудые һэльбэн бодхоонош. Ши тэдэнэрэй хаан болохо юм хаш гээд хэлсэнэ. 7 Иерусалимда шам тухай иигэжэ соносхожо байгаа лүндэншэдые ши томилнош: «Иудын орон нютагта хаан бии болобо!» Энээн тухай булта хаанда дуулгагдаха. Ерыш, зүбшэжэ үзэел.

8 Би иимэ харюу эльгээбэб: «Шинии хэлээшэш худал, юуншье байгаагүй. Ши бултыень һанаанһаа зохёогоош!»

9 Эдэ хүнүүд маанадые айлгаха гээд һэдэбэ, маанадые өөһэдынгөө ажал дүүргэнгүй орхихо гээд найдаһан байба. Харин би энэ хэрэгээ бүри эршэмтэйгээр эрхилбэб!

10 Би Мэһэтэбээлэй аша, Дэлайяагай хүбүүн Шэмаяада ерэхэдэмни, тэрэ гэртээ байба. Гэртэнь ороходомни, Шэмаяа үүдээ шэбхэдээд, намда иигэжэ хэлэбэ:

– Бурханай гэр соо уулзая. Һүмэ соо ороод, үүдэнүүдыень шэбхэдэебди. Шамайе алахаяа ерэхэ, һүниндөө ерэжэ шамайе алаха!

11 Би иигэжэ хэлэбэб:

– Нам шэнги хүн зугадаха болоно гү? Би өөрынгөө ами наһа абархын тула Һүмэ соо хорохо болоно гүб? Орохогүйб.

12 Энээниие Бурхан эльгээгээгүй гэжэ би ойлгобоб. Тобияа, Санбаллаат гэгшэд тэрэниие хүлһэлжэ, тэрэ нам тушаа лүндэн табижа байна ха. 13 Тэдэ намайе айһандаа нүгэл хэжэ болохо гэжэ найдаад, тэрээндэ мүнгэ түлөө байна, нүгэл хэһэнэйм удаа тэдэ нам тухай элдэб худал үгэ тараажа, муушалха байгаа.

14 Тобияа, Санбаллаат гэгшэдэй мүн намайе айлгахаар шиидэһэн Ноһаадьяа эхэнэрэй, бусадшье лүндэншэдэй эдэ бүхы ябадалнуудые, минии Бурхан, хадуун абыт!

Барилгын түгэсхэл

15 Табин хоёр үдэрэй туршада энэ хүдэлмэри эрхимээр ябуулагдажа, элүүл һарын ^{▼▼ Элүүл һара – август-сентябрь.} хорин табанай үдэр хотын хананууд һэргээгдэбэ.

16 Энээн тухай манда дурагүйшүүл бултыень мэдэбэ, мүн энэниие дүтэ шадарай хүн зон хараад, дээрэлхүү зангынь номгорбо; энэ хэрэг манай Бурханай үршөөлөөр бүтэбэ гээд тэдэнэр мэдэрбэд.

17 Эдэ үдэрнүүдтэ Иудын орон нютагай ноёд һайд Тобияада саг үргэлжэ бэшэгүүдые эльгээдэг, Тобияаһаа харюунууд ерэдэг байгаа. 18 Иудын орон нютагта олонхинь тэрээнтэй тангариг холбоо барисаатай байгаа, юуб гэхэдэ, тэрэ Араахай хүбүүн Шэханьяагай хүрьгэн һэн, харин тэрэнэй хүбүүн Ёханаан Бэрэхияагай хүбүүн Мэшуллаамай басагаар һамга хэһэн юм. 19 Тэдэнэр бултадаа намда Тобияае магтадаг, минии үгэнүүдые тэрээндэ дуулгадаг байгаа. Намайе айлгаха бэшэгүүдые Тобияа эльгээдэг һэн.