‏ Numbers 10

Мүнгэн бүреэнүүд

1Эзэн Моисейдэ иигэжэ айладаба:

2– Ши өөртөө хоёр мүнгэн бүреэ хэбтэ шудхан хүүлэ. Тэдэш улад зоноо ерүүлхэдэшни, хотон хүреэнүүдээ хуряажа, аянда гарахадашни туһалха. 3Хоёр бүреэгээрээ утаар татан үлеэхэдэшни, майхан һүмын үүдэндэ ниитэ бүхы уладшни сугларха. 4Нэгэ бүреэгээ утаар үлеэхэдэшни, Израилиин арбан хоёр обогой ударидагшад, мянгатын дарганар шамда ерэхэ. 5Бүреэгээ таһалдуулан байжа түргэ түргөөр хэдэ дахин үлеэхэдээ аян замда гарая гэжэ зүүн зүгтэ оршоһон сэрэгтээ дохёо үгэнэш. 6Бүреэнүүдээрээ таһалдуулан байжа, хоёрдохиёо түргэ түргөөр үлеэхэдээ, майхан һүмын үүдэнэй урда талада тогтон байрлаһан обог омогой хотон хүреэнүүд майхануудаа задалжа, холын харгыда гарагты гэһэн дохёо үгэнэш. 7Хэрбэеэ арад зоноо суглуулха гэбэл, түргэ түргөөр бэшэ, харин утаар татажа бүреэнүүдээ үлеэ. 8Санаарта Аһарооной уг удам бүреэ үлеэхэ ёһотой. Энэ хуули хэтын хэтэдэ таанадта болон таанадай уг гарбалнуудта үгтэнэ.

9Өөрынгөө газар дээрэ дайсадтай тулалдахын урда тээ шангаар аад, түргэ түргөөр бүреэнүүдээ үлеэ. Тиихэдэшни Эзэн, шинии Бурхан, дохёоешни дуулаад, таанадые дайсадһаа абарха.

10Суглаа зарлахадаа, мүн шэнэ һарын эхин үдэрнүүдтэ, һайндэрнүүдэй болоходонь, бүреэнүүдээ үлеэгты. Израильшуудай түгэс шатаалта ба амгалан байдалай үргэлнүүдые асархадань, бүреэнүүдээ үлеэгты. Энэ ёһолол Эзэндэ, шинии Бурханда, шам тухай һануулга болоно. Би шамда эдэниие бэелүүлхыешни захирнаб. Би Эзэн, шинии Бурхан гээшэб!

Израильшууд аян замда гараба

11Хоёрдохи жэлэй, хоёрдохи һарын хоридохи үдэр майхан һүмэһөө үүлэн дэгдэбэ. 12Тиихэдэнь израильшууд аян замаа үргэлжэлүүлхэеэ Синайн сүл губиһаа гараба. Үүлэн тамаран саашалжа, Параанай сүл губи дээрэ тогтобо.

13Тиигэжэ тэдэнэр Эзэнэй Моисейдэ захирһые эхин түрүүшынхиеэ дүүргэжэ, аян замда гараа бэлэй.

14Иудын хотон хүреэнэй туг үргэгдэжэ, тэдэнэй сэрэг тогтон байрлаһан газарһаа эгээн түрүүн хүдэлбэд. Иудын обогой хэдэн бүлэг сэрэгые Амминадаабай хүбүүн Нахшоон ударидажа, бүхы сэрэгэйнгээ урда ябаа. 15Тэрэнэй хойноһоо Иссахаарай обогой хэдэн бүлэг сэрэгые Цуһаарай хүбүүн Нэтанээл ударидажа, бүхы сэрэгшэдэйнгээ урдань ябаа. 16Тэрэнэй хойноһоо Хэлооной хүбүүн Элиаабай ударидалга доро Зэбүлүүнэй обогой хэдэн бүлэг сэрэгшэд ошобо.

17Майхан һүмэ задалан хуряагдажа, Гэршооной болон Мэрариин үенүүдэй эрэшүүл тэрэнээ үргэлөөд, аян замда гарабад.

18Тэдэнэй һүүлдэ Рэүбээнэй хотон хүреэнэй туг хиидхэн үргэгдэжэ, тэдэнэй хэдэн бүлэг сэрэг тогтон байрлаһан газарһаа гарабад. Тэдэниие Шэдэһүүрэй хүбүүн Элицүүр захиран ябаа. 19Цуришаддайн хүбүүн Шэлүмиһээл Симеоной обогой сэрэгые ударидан, тэдэнэй хойноһоо ошобо. 20Дэүһээлэй хүбүүн Элиасаап Гаадай хэдэн бүлэг сэрэгые ударидан, тэдэнэй хойноһоо ябаба.

21Тэдэнэй хойноһоо нангин шүтөөнөө үргэлһэн Кэһаадай обогойхид ошобо. Тэдэнэй ерэтэр нангин һүмэ баригдажа үрдихэ ёһотой байгаа.

22Тэдэнэй һүүлээр Эпрааимай хотон хүреэнэй туг хиидхэн үргэгдэжэ, сэрэгынь тогтон байрлаһан газарһаа хүдэлбэ. Аммиһүүдэй хүбүүн Элишамаа тэдэ сэрэгые ударидан толгойлоо. 23Пэдэцүүрэй хүбүүн Гамалиһээл Мэнашшээгэй обогой бүлэг сэрэгые толгойлон ударидаба. 24Гидеоной хүбүүн Абидаан Бэньямиинэй бүлэг сэрэгые толгойлжо гараба.

25Бултанай һүүлдэ Даанай хотон хүреэнэй туг хиидхэн үргэгдэбэ. Аммишаддайн хүбүүн Ахиээзэр тэдэ бүлэг сэрэгые толгойлон ударидажа гараа. 26Тэдэнэй һүүлдэ Охраанай хүбүүн Пагиил Ашээрэй бүлэг сэрэгые толгойлбо. 27Энаанай хүбүүн Ахираа Напталиигай бүлэг сэрэгые толгойлжо, тэдэнэй хойноһоо ошобо.

28Тогтоһон газарһаа хүдэлэн гарахадаа, иимэ жагсаалаар израильшууд аян замда гараха ёһотой байгаа юм.

Моисей ба Хобааб

29Моисей мидиан үндэһэ яһанай болохо хадам эсэгэ Рэүһээлэй хүбүүн Хобаабта иигэжэ айладаба:

– Бидэндэ үгэхэб гэжэ үбгэ эсэгэнэртэмнай үгэеэ үгэһэн Эзэнэй газар тээшэ бидэнэр ошожо ябанабди. Ши бидэнтэй ябалса, ушар юуб гэхэдэ, Эзэн израильшуудта олон һайн юумэ найдуулаа, шамдашье һайн юумэн хүртэхэ.

30Теэд Хобааб тэрээндэ иигэжэ хэлэбэ:

– Би таанадтай ошохогүйб. Би өөрынгөө эхэ орондо, өөрынгөө арадта бусахамни.

31Моисей тэрээндэ иигэжэ хэлэбэ:

– Шамайе гуйнаб. Сүл губида тогтохо газар ши бидэнһээ һайнаар мэдэнэш. Ши бидэнэй харгышан болыш даа. 32Хэрбэеэ бидэнтэй ошолсоо һааш, Эзэнэй бидэндэ үршөөн хүртөөһэн бүхы һайн юумэнүүдһээ шамда хубаалдахабди.

33Тэдэнэр аян замаа Эзэнэй хадаһаа эхилжэ, гурбан хоногой зайе гаталбад. Хотон хүреэнээ табин зохёохо газар оложо үгэхэ зорилготойгоор Эзэнтэй хэлсээ баталһан ханза урдань тээгдэн ябажа байгаа. 34Үдэртөө Эзэнэй үүлэн дээгүүрнь дэгдэжэ, тэдэ аян замда гарадаг байгаа.

35Тогтон байрлаһан газарһаа арад зонойнгоо аян замда гарахаяа түхеэржэ, ханза үргэхэдэнь, Моисей ходол иигэжэ хэлэдэг байгаа:

– Бодыт, Эзэн! Дайсадтнай тараха болтогой! Таниие үзэн ядагшад Танһаа тэрьедэн арилха болтогой!

36Нангин ханзаяа тогтон байрлаһан газартаа тодхон табихадань, Моисей иигэжэ хэлэдэг байба:

– Бусыт даа, Эзэн, түмэн сая израильшуудтаа!