Num 11 | BxrBBL2024 | STEP | Израильшууд гашуудал зоболон тухайгаа шангаар гэмэрэлдэн гэмшэлдэжэ эхилбэ. Эзэн тэдэнэй гэмэрэлдээ гэмшэлдээе шагнахадаа, сухалдаад, соробхилһон гал эльгээжэ, хотон хүреэнэй захые шатаажа эхилбэ.

‏ Numbers 11

Табэраа

1 Израильшууд гашуудал зоболон тухайгаа шангаар гэмэрэлдэн гэмшэлдэжэ эхилбэ. Эзэн тэдэнэй гэмэрэлдээ гэмшэлдээе шагнахадаа, сухалдаад, соробхилһон гал эльгээжэ, хотон хүреэнэй захые шатаажа эхилбэ. 2 Израильшууд Моисейһээ туһа эрин хашхаралдажа эхилбэ. Моисей Эзэндэ зальбаран мүргэжэ, галые номгоруулан намдуулба. 3 Тэрэ газарые Табэраа ^{▼▼11:3 Энэ үгэ удхаараа «шатаха» гэжэ үгэдэ адли.} гэжэ тэдэ нэрлэбэ. Ушар юуб гэхэдэ, Эзэнэй гал тэндэ, тэдэнэй дунда носоо бшуу.

Далан аха захатан

4 Тэдэнэй дунда ябаһан хари зон эдеэ хоолой дуталдаһые элирүүлбэ. Тэдэниие һажаалдан, израильшуудшье суг хамта һуугаад, бархиралдан байжа, шангаар иигэжэ гэмэрэлдэшэбэд:

– Бидэнэр мяха эдихэеэ һанашообди! 5 Египедтэ байхадаа түлбэригүй загаһа эдидэгээ һананабди, үгэрсэ, тарвас, мангир, һонгино, гоогол! 6 Харин мүнөө бидэнэр шадал тэнхээгүй болошообди! Үдэр бүхэндэ үнөөхил шүүдэр будааһаа бэшэ ондоо юушье харанагүйбди!

7 Тэрэ шүүдэр будаа мөөгэ ургамалай үрэһэндэ адли, дүрсэ түхэлөөрөө хангал һөөгэй дабирхай шэнги байгаа. 8 Арад зон шүүдэр будаа суглуулжа, тэрэнээ шулуун тээрмээр гү, али уур соо нюдэжэ, тогоон соо шанадаг гү, али нимгэхэн шаанги болгодог, тэрэнь оливын тоһотой лепёошходо адлишуу амтатай байгаа. 9 Һүни бүхэндэ шүүдэртэй хамта хотон хүреэндэнь шүүдэр будаа унадаг байба.

10 Майханайнгаа үүдэндэ зоной, гэр бүлэ бүхэнэй бархиралдахые Моисей дуулан байгаа. Эзэнэй тэдээндэ хэмгүй ехээр сухалдаһанда Моисей гомдожо, 11 Эзэндэ иигэжэ хэлэбэ:

– Танай зараса болохо намда Та юундэ муу юумэ хэнэбта? Бүхы арадай түлөө харюусалга нам дээрэ Та юундэ ашабат, ямар гэм хэһэндэмни? 12 Энэ бүхы арад зоной эхэ юм гүб? Тэдэниие би түрөө юм гүб? Үхибүү харууһалдаг эхэнэр мэтэ эдэнэрые үргөөд яба гэжэ Та намайе юундэ бааланабта? Үбгэ эсэгэнэртэтнай үгэхэб гэжэ тангариглан найдуулһан газартам эдэниие дахуулан абааша гэжэ Та намайе юундэ албаданабта? 13 «Маанадта мяха үгэ» гэжэ уйлан гуйхадань, хамаг бүхы энэ арадые хооллуулха мяха хаанаһаа би олохобиб? 14 Ори гансаараа би энэ олиггүй хүндэ арадые даажа ябажа шадахагүйб. 15 Хэрбэеэ Та дахяад намда хойшодоо тэдэнэй зоболонгые харуулха гээгүй һаа, намайе мүнөө алагты. Хэрбэеэ Танай үршөөл хайрада хүртөө гээшэ һаам, Та намда гай зоболон бү үзүүлыт!

16 Эзэн Моисейдэ иигэжэ айладаба:

– Арад түмэнэй аха захатан, удамаршад гэжэ өөрынгөө мэдэдэг Израилиин далан аха захатаниие асара Нам руу. Шамтай хамта зогсохыень тэдэниие майхан һүмын дэргэдэ асара. 17 Би дээрэһээ буужа, Шамтай хөөрэлдэхэб. Шамда шэнгэһэн Һүлдэһөө зарим тэдые абажа, тэдэ далан зон дээрэ табихаб. Зоной ашаа гансаараа шинии тээжэ ябахагүйн тула тэдэ туһалха.

18 Улад зондо иигэжэ хэлэ:

– Үглөөгүүр болотор бэеэ арюудхан бэлдэгты. Үглөөдэр таанад мяха эдихэт. «Бидэнэр хаанаһаа мяха олохобибди? Бидэндэ үл залгаха талаар үлүү һайн байгаал Египедтэ!» – гэжэ хашхаралдан, Эзэнэй дуулахые хүсэжэ байгаат. Эзэн иигэжэ таанадта эдихэ мяхыетнай үгэхэл. 19 Таанар тэрэ мяхыень нэгэ, хоёр үдэршье бэшэ, табан, арбан үдэршье бэшэ, хорин үдэршье бэшэ, 20 бүхэли һара эдихэт. Танай дунда байгааша Эзэниие буруушаажа гэмэрэлдэһэнэйнгээ түлөө эдихэт тэрэниие ойгоо гутатараа, бөөлжэтэрөө. «Египедһээ бидэнэр юундэ гаража ошоо гээшэбибди?!» – гэлдэн, Эзэнэй урда уйлалдаат.

21 Моисей иигэжэ хэлэбэ:

– Минии хажууда зургаан зуун мянган хүн лэ. Харин Та: «Бүхэли һара хүрэхэ мяха тэдээндэ үгэхэб», – гэнэт. 22 Бидэнэй бүхы хони малаа шарууһалаашье һаа, бүхэли һара эдихэ хоол энэ арадта хүрэхэгүйл. Бүхы загаһыень далайһаа губшуурдаашье һаа, бүгэдэ зондо энэшье хүртэхэгүйл.

23 Эзэн Моисейдэ иигэжэ айладаба:

– Гарни хүсэгүй юм аал? Минии үгын бэелүүлэгдэхэ, үгыень мүнөө ши харахаш.

24 Моисей майхан һүмэһөө гаража, Эзэнэй айладаһан зарлигые арад зондоо дамжуулан хэлээд, израильшуудай далан ахалагшые дуудан, майхан һүмын хажууда ерүүлбэ. 25 Тиихэдэнь майхан һүмэ дээрэ Эзэнэй бахана үүлэнэй буухадань, Моисей Эзэнтэй хөөрэлдэбэ. Моисейдэ үгэһэн нангин һүлдэеэ Эзэн далан ахалагшатай хубаалсаба. Тэдэнэртэ Эзэнэй һүлдын ороходонь, тэдэнэр ерээдүйн сагта болохо юумэнүүд тухай уридшалан хэлэбэ, тиигээд болибо.

26 Элдаад, Мэдаад гэжэ нэрэтэй хоёр аха захатан майхан һүмэдэ ерэнгүй, хотон хүреэнэй дунда үлэһэн байбад. Тэдээндэ Эзэнэй һүлдэ баһал оронхой байжа, хотон хүреэнэйнгээ зондо ерээдүйн сагта болохо юумэнүүд тухай уридшалан хэлэжэ эхилбэд. 27 Залуухан хүбүүн Моисейдэ гүйжэ ерээд:

– Элдаад Мэдаад хоёр хотон хүреэн соогоо зондо ерээдүйн сагта болохо юумэнүүд тухай уридшалан хэлэжэ байна, – гэжэ хэлэбэ.

28 Моисейн туһамаршан, залуушуулай дундаһаа тэрээндэ эгээл дүтэ болохо Нүүнэй хүбүүн Иисүүс иигэжэ хэлэбэ:

– Минии эзэн Моисей! Тэдэниие болюулыт!

29 – Ай даа, намайе гансааран Эзэнэй мэдээе дуулгагша байһай гэжэ һанана гүш? Эзэн Һүлдэеэ Өөрын арад зондо бултанда бэлэглэжэ, тэдэ бүгэдэ лүндэншэд болодог һаань! – гэжэ Моисей хэлээд, 30 Израилиин аха захатантай хамта хотон хүреэн руу ошобо.

Бүдэнэ

31 Эзэн шанга һалхи далайһаа эльгээжэ, зоной байгша хотон хүреэнэй урда хойнонь тоо томшогүй олон бүдэнэ хаяба. Хотон хүреэнһөөнь урагшаа нэгэ үдэр, хойшоо нэгэ үдэр ябаха зайтай бүхы газар дайда бүдэнэнүүдээр хоёр тохой шахуу зузаанаар хушагдаба. 32 Израильшууд бүхэли үдэр, бүхэли һүни, удаадахи үшөө нэгэ үдэр бүдэнэнүүдые суглуулба. Эгээ багаар суглуулагшын олзо арбанһаа үлүү хоомэр болобо. Тэдэ бүдэнэнүүдэй мяхые ябталан, хотон хүреэ тойруулан обоолжо табяад, 33 захаһаань шанажа, шаража, бэе бэеһээ үрдилдэжэ, хүсэд жажалангүйгөөр, тэдэнэй залгин хомхойрходонь, Эзэнэй сухал дэлбэржэ, садахаяа мэдэдэггүй хэжэг үбшэ тэдэнэй дунда дэлгэрүүлбэ.

34 Арад зон энэ газарые «Киброот-Һа-Таһаваа» ^{▼▼11:34 Киброот-Һа-Таһаваа – энэ нэрэ «садахаа мэдэхэгүйн булаша» гэһэн удхатай.} гэжэ нэрлэбэ. Ушар юуб гэхэдэ, садахаа мэдэдэггүй хэжэгээр үхэһэн хүнүүдые тэндэ булан хүдөөлүүлһэн юм.

35 Арад зон Киброот-Һа-Таһавааһаа гараад, Хацэроот хүрэжэ, тэндэ тогтобо.