Num 12 | BxrBBL2024 | STEP | Мириам Аһароон хоёр Моисейдэ дураа гутажа, Күүшһээ уг гарбалтай эхэнэрые һамга абаһанайнь түлөө зэмэлбэд.

‏ Numbers 12

Мириамые хэһээлгэ

1 Мириам Аһароон хоёр Моисейдэ дураа гутажа, Күүшһээ уг гарбалтай эхэнэрые һамга абаһанайнь түлөө зэмэлбэд.

2 – Эзэн гансал Моисейгээр дамжуулан һургаал заабаринуудаа арад зондо хэлүүлнэ гэжэ гү? Эзэн бидэнэрээршье дамжуулан, ерээдүйн сагта болохо юумэнүүдые уридшалан арад зондо хэлэнэл, – гэжэ тэдэ хоёрой хэлэхые Эзэн дуулаба.

3 Моисейһээ бэшэ даруу номгон зантай хүн энэ дэлхэй дээрэ үгы байгаа.

4 Тэрэ дары Эзэн Моисей, Аһароон, Мириам гурбанда иигэжэ айладаба:

– Та гурбан майхан һүмэдэ ошогты.

Тэдэ гурбан майхан һүмэ руу шэглэбэ. 5 Эзэнэй үүлэн бахана майхан һүмын үүдэн дээрэ тогтоод, Аһароон Мириам хоёрые дуудахадань, тэдэ хоёр дүтэлэн ошобо. 6 Эзэн тэдэ хоёрто иигэжэ айладаба:

– Минии үгэ шагнагты! Хэрбэеэ Минии лүндэншэн таанадай дунда бии болоһон байбал, Би, Эзэн, тэрээндэ үзэгдэл үзүүлдэгби. Зүүдэлжэ байхадань, тэдээндэ айладхал буулгадагби. 7 Моисейтэй тад ондоогоор харилсанаб, Моисей – Минии үнэн сэхэ зараса. Тэрэ Минии гэртэ бүримүһэн түгэс этигэмжэтэ мүн! 8 Тэрээнтэй Би улаан нюураараа уулзалдан, далда хэлээр бэшэ, сэхэ хөөрэлдэнэб. Тэрэ Минии дүрсэ үзэдэг. Тиигээд таанад Моисейдэ, Минии зарасада, юундэ эсэргүүсэхэ болообта?!

9 Тэдээндэ Эзэн уур сухалаа орьёлуулба. Тиигээд Тэрэ тэндэһээ зайлаба.

10 Үүлэн баханын майхан һүмэһөө холодоходонь, Мириамай бэе саһан мэтэ сагаан арһанай үбшөөр хушагдаба. Аһароон эрьелдээд, арһанай үбшэндэ Мириамай нэрбэгдэһые хараба.

11 Аһароон Моисейдэ иигэжэ хэлэбэ:

– Минии эзэн, гуйнаб, мунхажа тэнэгээр дуугарһан маанадай нүгэлые хүлисыт. 12 Эхын умай соо һамшаад, хахад бэень үжэһэн, амигүй түрэһэн үхибүүн мэтэ бү болгыт Мириамые.

13 Моисей Эзэндэ шанга дуугаар хандан, иигэжэ гуйба:

– Бурхан, тэрэниие аргалыт даа!

14 Эзэн Моисейдэ иигэжэ айладаба:

– Эсэгэнь тэрээндэ уурлажа, нюуртань нёлбоо һаань, эшэгүүридэ тэрэ орохогүй байгаа гү? Долоон хоногто тэрэ хотон хүреэнһөө арилаг. Долоон хоногой үнгэрһэн хойно дахинаа тэрэ хотон хүреэндээ бусаг.

15 Мириам долоон хоногоор сүлүүлжэ, хотон хүреэнһөө гаража ошобо. Израильшууд аян замаа үргэлжэлүүлэнгүй, Мириамай бусатар тогтон байрлаһан газартаа байба.