Num 14 | BxrBBL2024 | STEP | Тэрэ һүни бүхы зон оог хашхаралдан, бархиран байгаа.

‏ Numbers 14

Арад зоной буһалгаан

1 Тэрэ һүни бүхы зон оог хашхаралдан, бархиран байгаа. 2 Израильшууд Моисей Аһароон хоёрто дураа гутан, иигэжэ шангаар гэмэрэлдэшэбэд:

– Элһэн губида гү, али Египедтэ үхэхэеэ яагаабибди бидэнэр! 3 Эзэн бидэниие эндэ асаржа, эритэ һэлмээр алуулха гээ гү? Һамгад болон үхибүүдыемнай дайсанай олзо болог гээ гү? Египет руу бусабалнай бидэндэ дээрэ ха!

4 Зон өөһэд хоорондоо иигэжэ хэлсэдэг болобо:

– Шэнэ ударидагшые һунгаад, һөөргөө Египет руу бусая!

5 Моисей Аһароон хоёр бүхы израильшуудай урда нюураараа газар дэрлэн унаба. 6 Орон нютагые шэнжэлэн шалгажа ерэһэн Нүүнэй хүбүүн Иисүүс, Епуннээгэй хүбүүн Халээб тэндэ сугларагшадта гай гасалангаа мэдүүлжэ, үмдэжэ ябаһан хубсаһаа хахар шуу татаад, 7 иигэжэ хэлэбэд:

– Бидэнэй тагнан шэнжэлжэ хараһан тэрэ газар ехэ һайн, угаа һайн! 8 Эзэн бидэндэ энэрхы һаа, эдеэ хоолоор дэлбэржэ байдаг үрэжэлтэй тэрэ газарта бидэниие дахуулжа, үгэг лэ бидэндэ тэрэ газар. 9 Эзэнэй урдаһаа эсэргүүсэн таанад бү бодогты! Тэрэ орон нютагай арадһаа таанад бү айгты! Тэдэниие бидэ илахабди! Тэдээндэ ямаршье аршалалта үгы. Тиихэдэнь Эзэн бидэнтэй хамтал! Тэдээнһээ таанад бү айгты!

10 Теэд арад зон «Тэдээниие шулуудажа алая!» гэжэ хашхаралдажа байтараа, майхан һүмын дээрэ Эзэнэй ялбама гэрэл бахана харабад.

Моисей арад зонойнгоо түлөө зальбарба

11 Эзэн Моисейдэ иигэжэ айладаба:

– Хэды болотор энэ арад Намһаа буруу харахаб? Хэды болотор эдэнэр Намда этигэхэгүйб? Эдээндэ оло дахин дүлгэ үзэгдэл боложо Минии харагдаашье һаа, эдэнэр Намда этигэнэгүйл. 12 Би тэдэниие үхэлэй ташуураар сохихоб, хумхиин тооһон болгохоб. Эдээнһээ олон, эдээнһээ хүсэтэй арадые шинии удамһаа бии болгохоб.

13 Тиихэдэнь Моисей Эзэндэ иигэжэ хэлэбэ:

– Энэ арадые Египедэй дундаһаа хүсөөрөө гаргаа бэлэйт; египетшүүд энээн тушаа дуулахал. 14 Энэ орон нютагай зондо тэдэ юу болоһые хөөрэхэ. Өөрынгөө арадтай хамта Эзэн ябалсана гэжэ, Өөрыгөө тэдээндэ үзүүлээ гэжэ, үдэртөө Таниие үүлэн бахана болоод тэдэниие дахуулна гэжэ, үдэшэндөө Таниие дүлэтэ үүлэн болоод тэдэниие аршалан бүрхөөнэ гэжэ мэдэнэл. 15 Хэрбэеэ гансахан сохилтоор энэ арад зониие усадхаа гээшэ һаатнай, Тан тушаа дуулаһан арадууд иигэжэ хэлэхэл: 16 «Ай даа, үгэхэб гэжэ тангариглаһан газартаа Эзэн энэ арадаа абаашажа шадангүй, элһэн губиин дунда хосороогоол!» 17 Харин мүнөө минии Эзэнэй хүсэ шадал агууехээр толотохонь болтогой! Та Өөрөө айладаа бэлэйлта: 18 «Тэсэбэритэй, үршөөл хайраяа заяадаг Би, Эзэн, хуули эбдэгшэдые, гэм хэгшэдые хүлисэдэгби. Гэбэшье хэһэн зэмэтэ ябадалайнь түлөө хүүгэдынь, ашанарынь, гушанарыньшье хэһээгдэхэ». 19 Египедһээ энэ хүрэтэр ерэтэрнь тэдэниие хүлисэдэгтэл адляар энэ арадтаа агууехэ үршөөл хайраяа үзүүлэн, эдэнэй хэһэн нүгэлые хүлисыт!

20 Эзэн Моисейдэ иигэжэ айладаба:

– Шинии гуйгаа хадаш тэдэниие хүлисэнэб. 21 Харин Өөрөөрөө, бүхэдэлхэйе дүүргэһэн Минии, Эзэнэй, алдар солоор тангаригланаб: 22 Минии алдар солые, дүлгэ тэмдэгүүдые Египедтэ ба элһэн сүл губида хараашье һаа, Минии айладаһан захяа үгэнүүдые дуулаагүй, арба дахин Минии тэсэбэриие шалгаһан тэдэ бултадаа 23 үбгэ эсэгэнэртэнь үгэхэб гэжэ Минии тангариглаһан тэрэ орон нютагые харахагүй! Намда этигэдэггүй бүгэдэ зон тэрэ газар нютагые үзэхэгүй! 24 Минии зараса Халээб тэдээнһээ гансааран илгаржа, Намда үнэн сэхэ зандаа үлөө. Тэрэнэйнь түлөө Би тэрэниие харагша газартань хүргэн абаашахаб. Үри һадаһадынь энэ орон нютагые эзэмдэн ажаһууха! 25 Тэрэ нугада амалээгүүд, ханаһаанууд ажаһууна. Үглөөдэр хотиржо, элһэн сүл губи руу, Хулһата далай тээшэ ошогты.

Эзэн арад зониие хэһээбэ

26 Эзэн Моисей Аһароон хоёрто иигэжэ айладаба:

27 – Хэрүүлшэ энэ арад Намда хэды болотор дураа гутахаб? Израильшуудай Намда гомдожо байхые Би соносожо байнаб. 28 Тэдээндэ ши иигэжэ дамжуула: «Өөрөөрөө тангаригланаб! – гэжэ Эзэн айладана, – Өөдөө шэдэһэн шулуунтнай өөһэдынтнай толгой дээрэ бууха! 29 Хамтын тоо бүридхэлдэ ороһон Минии арадай хоринһоо дээшэ наһатайшуул энэ сүл губида булта хосорхо. Ушар юуб гэхэдэ, Намда уурлажа, дураа гутан гэмэрэлдээт. 30 Тиимэһээ үгэхэб гэжэ Минии гараа үргэн тангариглаһан тэрэ газарта таанадай хэншье хүрэжэ ошохогүй. Гансал Епуннээгэй хүбүүн Халээб, Нүүнэй хүбүүн Иисүүс тэрэ газар дээрэм хүлөө табиха. 31 „Тулалдаанай эсэстэ дайсадай олзо болохонь лэ“гэһэн таанадай үхибүүдтэ Би тэрэ газар заяанаб. Таанадай буруушааһан тэрэ газарай хэды һайхан байһые тэдэ мэдэжэ абаха. 32 Харин таанадай һэенүүд энэ элһэн сүл губида үлэхэ! 33 Таанадай бултадаа энэ сүл губида үхэтэр, таанадай Намда үнэн сэхэ бэшэ ябаһанай түлөө үри хүүгэдтнай тэнэжэ, сүл губида дүшэн жэл соо зобохо. 34 Таанад тэрэ газарые дүшэн үдэр соо тагнан шэнжэлээт. Тиимэһээ мүнөө хэһэн нүгэлэйнгөө түлөө дүшэн жэл соо тулиха зобохот, нэгэ үдэр нэгэ жэлтэй сасуу. Тиихэдээл таанад Намһаа холодолго ямар бэ гэжэ ойлгохот». 35 Би, Эзэн, айладажа байнаб, Минии урдаһаа эсэргүүсэн бодогшо энэ муухай бүлэг зониие иигэжэ заабол хэһээхэб. Энэ сүл губида тэдэ хосорхо, тэндэ үхэхэ.

36 Шэнэ газар тагнан шэнжэлхыень Моисейн эльгээһэн хүнүүдэй бусахадаа тэрэ газар тухай муу үгэ хүүр израильшуудай дунда тараахада, арад зон Моисейдэ дураа гутажа, гэмэрэлдэшэбэ. 37 Тэрэ орон нютаг тухай муу үгэ тарааһан зондо Эзэн тахал үбшэн һүжэрүүлэн, тэдэниие хюдаба. 38 Гэбэшье шэнэ газар тагнан шэнжэлээд ерэгшэдэй дундаһаа Нүүнэй хүбүүн Иисүүс Епуннээгэй хүбүүн Халээб хоёр амиды мэндэ үлэбэд.

Арад зон Ханаһаанай газарта ошохо гэбэ

39 Эзэнэй үгэ арад зондо Моисейн дамжуулхада, израильшууд голхоролдон гэмшэжэ, 40 эртэ үглөөгүүр бодоод, уула хада руу шэглэбэ:

– Нүгэл хээ хадаа бидэнэр нүгэлөө арюудхан сэбэрлэхэеэ Эзэнэй ошогты гэһэн газарта ошохомнай.

41 Моисей тэдээндэ иигэжэ хэлэбэ:

– Эзэнэй зарлигые таанад юундэ дүүргэнэгүйбта? Таанад амжалта туйлахагүйт! 42 Эрьеэд һөөргөө таанад бусагты! Эзэн таанадай дунда үгы байха, тиимэһээ дайсадтнай таанадые хюдахал. 43 Урдатнай амалээгүүд, ханаһаанууд байна, һэлмээр сабшагдан усадхагдахат! Таанад Эзэнһээ буруу хараат, Тиимэһээ Эзэн таанадтай хамта бэшэл!

44 Израильшууд Моисейн хэлэһэн үгэдэ этигэнгүй, хада өөдэ гараба. Харин Моисей ба Эзэнэй хэлсээнэй ханза хотон хүреэнэй дунда үлэбэ. 45 Тэрэ хада ууланууд дээрэ ажаһуудаг амалээгүүд болон ханаһаанууд дээрэһээнь добтолон буужа, тэдэниие үй бута сохёод, амиды үлэгшэдыень Хормаа хүрэтэр намнаба.