Numbers 17
Аһарооной һүлдэ тулгуур сэсэглэбэ
1Эзэн Моисейдэ иигэжэ айладаба: 2– Израильшуудтай хөөрэлдэжэ, арбан хоёр обогой ударидагшадай һүлдэ тулгуурнуудые абаад, дээрэнь нэрынь бэшэ. Обогой ударидагша бүхэнһөө нэгэл тулгуур абаарай. 3Левиин обогой һүлдэ тулгуур дээрэ Аһарооной нэрэ бэшэ. Обогой удамарша бүхэнһөө нэгэл тулгуур байха ёһотой. 4Майхан һүмэ соо Минии бии болодог нангин ханзын урда тэдэ һүлдэ тулгуурнуудые таби. 5Би таанадай дундаһаа нэгые шэлэхэдэм, һүлдэ тулгууртань ногоон набшаһан ургаха. Таанад руу ходо гэмэрэлдэжэ байдаг израильшуудай гэмэрэлдээе Би иигэжэ болюулхаб! 6Эзэнэй энэ зарлигые Моисейн арад зондоо хэлэжэ үгэхэдэнь, обогуудай ударидагшад тулажа ябадаг дулдынуудаа тэрээндэ асаржа үгэбэд. Арбан хоёр дулды сугларба. Аһарооной тулгууршье байба. 7Моисей тэдэ дулдынуудые Хэлсээнэй бэшэгэй хадагалагдажа байһан майхан һүмэ соо оруулжа, Эзэнэй урда табиба. 8Үглөөдэрынь Моисей Хэлсээнэй бэшэгэй хадагалагдажа байһан майхан һүмэ соо оробо. Левиин уг гарбалай үенүүдые дамжан ябаһан Аһарооной һүлдэ тулгуурта ногоон набшаһад, сэсэгүүд ургажа, һалаануудтань бүйлсын һамар бии боложо байба. 9Моисей тэдэ һүлдэ тулгуурнуудые Эзэнэй урдаһаа абажа, майхан һүмэһөө газаашань гаргаад, бүхы израильшуудта харуулба. Арад зон тэдэ тулгуурнуудые шэнжэлэн хараба. Тиигээд гулбаанарынь өөр өөрынгөө һүлдэ тулгуур абаба. 10Эзэн Моисейдэ иигэжэ айладаба: – Аһарооной тулгуур Хэлсээнэй ханзын урда таби. Намда эсэргүү ябадал хэнгүй, Намда үнэн сэхээр алба хэһэн хүнүүдые амиды үлөөхэб гэһэн энэ зарлигыем Аһарооной һүлдэ тулгуур гэршэлжэ, арад зондош хэтын хэтэдэ һануулжа байг! 11Моисей Эзэнэй захиралтые гүйсэд дүүргэбэ. 12Израильшууд Моисейдэ иигэжэ хэлэжэ байба: – Бидэ үхэжэ байнабди! Бидэ хосоржо байнабди! Бүгэдөөрөө үхэхэмнайл! 13Эзэнэй майхан һүмэдэ дүтэлһэн хүн бүхэн үхэдэг. Булта бидэнэр үхэхэмнай гээшэ гү?!
Copyright information for
BxrBBL2024