‏ Numbers 18

Санаартадай болон левидүүдэй албан

1Эзэн Аһароондо иигэжэ айладаба:

– Ши, шинии үринэр, бүхы хотон бүлэтнай майхан һүмэдэ эсэргүү элдэб гэмэй түлөө харюусахат. Ши, мүн шинии үринэр санаартанай алба ябуулхада алдуу эндүү гарабал, мүн лэ харюусалгада татагдахат. 2Өөрынгөө аха дүүнэрые, левидүүдые, өөрын эсэгын зоной хүнүүдые асара. Тэдэнэр шинии хажууда байг, тэдэнэр шамда, шинии хүбүүдтэ Хэлсээнэй бэшэгэй хадагалагдажа байһан майхан һүмэдэхи алба хэлгэндэ туһалаг. 3Эдэ хүнүүд шинии харгалзалга доро майхан һүмэ соохи ажалда хамһалсаг. Таанад болон тэдэнэр үхэхэгүй гэбэл, нангин шүтөөнүүдтэ болон үргэлэй шэрээдэ бү дүтэлэгты. 4Тэдэнэр шинии хажууда байг, майхан һүмын албанда, тэндэхи алишье ажалда туһалаг. Ондоо хүнүүд таанадта дүтэлхэ ёһогүй. 5Дахяад израильшуудта Минии дураа гутан уурлахагүйн тула нангин һүмын, үргэлэй шэрээгэй ажалые сахин таанад өөһэдөө харюусаха болонот. 6Ойлгоорой, Би израильшуудай дундаһаа левидүүдые, танай аха дүүнэрые, шэлэн абааб. Эзэндэ алба хэхыень, майхан һүмэ соо ажаллахыень таанадта мүнөө тэдэниие үгэнэб. 7Гэбэшье ши, Аһароон, шинии үринэр гансал санаартын ажал хэхэт. Гансал таанад хүшэгын саана ородог, гансал таанад үргэлэй шэрээдэ дүтэлдэг байха ёһотойт. Санаартын нангин албые шамда Би бэлэг болгон үгэнэб. Шамһаа ондоо хэн нэгэн Нангинай Нангин таһалгада ороо һаа, шархияа хатааха тэрэ дары!

Санаартадай болон үхибүүдэйнь болохо үргэлнүүдэй хубитанууд

8Эзэн Аһароондо иигэжэ айладаба:

– Улад зоной Намда асарһан нангин бүхы үргэл бэлэгүүдыень Би шамда Өөрөө даалганаб. Би шамда нангин тэдэ бэлэгүүдые үгэнэб. Ши, шинии үринэр үргэлэй тэдэ бэлэгүүдһээ өөһэдынгөө хубитые абахат. Абадаг тэрэ хубитнай хэтын хэтэдэ таанадай болохо.

9Улад зон Намда иимэ үргэлнүүдые асарха: талхан үргэл, нүгэл сагааруулгын үргэл, гарза харюулгын үргэл. Эдэ хадаа агууехэ нангин үргэлнүүд болоно. Үргэлнүүдэй хубинь шинии болон үринэрэйш хубита болохо. 10Таанад тэдэнээ нангин газарта эдихэ ёһотойт. Шинии гэр бүлын бүхы эрэшүүл эдиг. Энэ бол таанадта нангин болог.

11Израильшуудай асарһан бүхы үргэлнүүд шинии хубита бэлэг болохо. Шамда, шинии хүбүүд болон басагадта Би эдэ үргэлнүүдые хэтын хэтэдэ үгэнэб. Шинии гэр бүлын хүн бүхэн сээрлэжэ, нүгэл хээгүй һаа, тэдэ бэлэгүүдыем эдихэдэнь болохо. 12Оливын тоһоной эгээл һайниие, уһан үзэмэй эгээл һайниие, ургаса таряанай эгээл шэные – Эзэндэ тэдэнэй үргэдэг тэдэ бүхы үргэлнүүдыень эдихэ, уухыншни тула шамда үгэнэб. 13Ургаса таряагаа хуряахадаа, арад зон ургасынгаа дээжые Эзэндэ бэлэг болгон асарха. Эдэ бүхы эдеэ хоолой зүйлнүүдые Би шамда, шинии гэр бүлэдэ үгэнэб. Бузартаагүй һаа, нүгэл хээгүй һаа, Бурханда үргэһэн үргэл эдихэдэтнай болохо. 14Эзэндэ үргэл болгожо асардаг Израильдахи бүхы юумэн шинии болохо. 15Эхынгээ умайе анха түрүүн нээһэн хүншье байг, малшье байг, Эзэндэ үгтэдэг, шинии болохо ёһотой. Хүнэй түрүүшын хүбүүд түлбэритэ. Сээртэй малай түрүүшын түл түлбэритэ. 16Үхибүүнэй нэгэ һаратай болоходонь, үгтэхэ түлбэрииень түлэхэ ёһотойш. Түлбэриеэ түлэхэ гэжэ сэбэр мүнгэ шэгнэхэдээ, тогтоомол хүндын шэгнүүрээр табан шээкэл мүнгэ шэгнэ. Тэрэш хорин гертэй адли. 17Гэбэшье түрүүшын түл болохо тугал, хурьган, эшэгэнэй түлөө түлбэри түлэхэ ёһогүйш. Юуб гэхэдэ, тэдэш сээргүй нангин амитад юм. Тэдэнэй шуһые үргэлэй шэрээдэ сүршэ, өөхыень шатаа, аятай һайхан хэншүү үнэрынь Эзэндэ һайшаагдаха. 18Эдэ малай мяхан, сээжэһээ халта дээшэнь даллан үргэдэг сээжэ үбсүүн болон баруун далань шинии болохо. 19Намда израильшуудай асардаг нангин үргэл, эдэ бүхы бэлэгүүдые Би, Эзэн, шамда үгэнэб. Эдэ бэлэгүүд шинии хубита болохо. Би хубита бэлэгыешни шамда, шинии хүбүүд болон басагадта хэтын хэтэдэ үгэнэб. Энэ болбол шамтай болон үри һадаһадтайш баталһан мүнхэ хэлсээн, Минии, Эзэнэй, урда дабһаар баталһан хэлсээн юм!

Левидүүдэй хуби

20Эзэн Аһароондо иигэжэ айладаба:

– Ши ямаршье газар абахагүйш. Шамда хубиин зөөри байха ёһогүй. Израильшуудай дунда шинии хуби бол Би мүн. Би уг залгамжалан дамжуулагдаха шинии заяан гээшэб. 21Арад зон бүхы олзынгоо арбанай нэгэ хубиие Намда үгэхэ. Тэрэ үгэгшэ хубииень майхан һүмын албанда ажаллаһанайнь түлөө Би Левиин үри бэенэртэ үгэнэб. 22Израилиин бусад зон хэзээдэшье майхан һүмэдэ бү дүтэлэг. Хэрбэеэ тэдэнэр майхан һүмэдэ дүтэлөө һаа, нүгэлтэй болохо, хэһээлтэдэм хүртэжэ үхэхэ. 23Уулзалгын майхан һүмэ соо гансал левидүүд алба хэхэ, буруу юумэнэй болобол, гансал тэдэ харюусаха. Энэ хуули үеһөө үедэ дамжан үргэлжэлхэнь болтогой! Минии израильшуудта найдуулһан газарһаа левидүүд хуби газар абахагүй. 24Бүхы газарайнгаа арбанай нэгэ хубиие израильшуудай Намда үргэл болгон асархадань, Би абагша тэрэ хубияа левидүүдтэ үгэнэб. Би юундэ тиигэжэ айладанабиб гэхэдэ, таанад, левидүүд, израильшуудта үгтэһэн тэрэ газарһаа хубита газар абахагүйт.

Арбанай нэгэ хуби

25Эзэн Моисейдэ иигэжэ айладаба:

26– Ши левидүүдтэй хөөрэлдөөд, тэдээндэ иигэжэ хэлэ: израильшууд арбанай нэгэ хубиие – таанадта үгэдэг байха гэжэ Минии тодорхойлһон хубиие – үгэдэг байха, тэрэ арбанай нэгэ хубиһаа үшөө арбанай нэгые амяарлажа, Намда, Эзэндэ, үргэгты. 27Тэдэнэр хуряаһан таряанайнгаа орооһонһоо таанадта үгэхэ. Тэдэнэр үзэмэй дараһан архиһаа таанадта баһал асарха. Тэдэнииень таанад өөһэдынгөө үргэл болгожо, Эзэндэ үргэхэ ёһотойт. 28Израильшуудай асарһан тэдэ бэлэгүүдые үргэл болгожо, Эзэндэ үргэхэ ёһотойт. Тиихэдээ таанад өөһэдынгөө арбанай нэгэ хубиин арбанай нэгые Эзэндэ үргэбэ гээшэт. Тиигээд тэрэ арбанай нэгэ хубиһаа санаартан Аһароондо үгэхэ ёһотойт. 29Израильшууд олоһон бүхы олзынгоо арбанай нэгэ хуби асарха. Тиихэдэнь тэрээнһээнь шэлэжэ, эгээл һайнииень, эгээл арюунииень абаад, Эзэндэ үргэхэдэтнай, тэрэ бэлэг таанадай үргэхэ арбанай нэгэ хуби болохо юм.

30Левидүүдтэ үшөө иигэжэ хэлэ: израильшууд таанадта өөһэдынгөө ургасын, үзэмэй дараһан архиин арбанай нэгэ хубиие үгэдэг байха. Тиихэдэнь тэрээнһээ эгээл һайн хубиие таанад Эзэндэ үргэдэг байхат. 31Таанад, гэр бүлынхидтнай үлөөшыень хаанашье эдихэдэтнай болохо. Энэ хадаа майхан һүмын албанда таанадай хэһэн ажалай түлбэри гээшэ. 32Эрхимэй эрхим үргэлнүүдые Эзэндэ үргөө хадаа, үлөөшэһөөнь хүртэлсэхэдөө, таанад нүгэл абахагүйт. Израильшуудай нангин бэлэгүүдые таанад бузарлана бэшэт, тиимэһээ таанад хосорхогүйт.