Num 19 | BxrBBL2024 | STEP | Эзэн Моисей Аһароон хоёрто иигэжэ айладаба:

‏ Numbers 19

Улаан шарагшан үнеэнэй үнэһэн

1 Эзэн Моисей Аһароон хоёрто иигэжэ айладаба:

2 – Эзэнэй зарлиглаһан хуули иимэ: эрэмдэг бэшэ, хөөмэгшэ үзөөгүй улаан шарагшан үнеэ ологты гэжэ израильшуудта хэлэгты. 3 Тэрэниие санаарта Эльазаарта үгэгты. Хотон хүреэнһөө тэрэниие гарган абаашаад, үүсэлүүлэг. 4 Эльазаар тэрэнэй шуһанһаа догоодожо, майхан һүмын үүдэндэ долоо дахин сүршэг. 5 Санаартын урда тэрэ үнеэгөө бүхыдэнь – шуһа мяхыень, гэдэһэ доторыень шатаажа, дууһан галдаха ёһотой. 6 Тиихэдэтнай санаарта Эльазаар хуша болон эссооб ургамалай һалаа мүшэрнүүдые, хүри улаан томоһон нооһо тэрэ гал дээрэ хаяг. 7 Тиигээд санаарта хубсаһаа угааг, бэеэ уһаар угааг, тиигээд санаарта хотон хүреэндээ бусаг. Гэбэшье санаарта үдэшэ болотор үшөөл бузарланхай зандаа ябаха. 8 Үнеэ галдан шатаагшад үмдэжэ ябаһан хубсаһаяа, бэеэ угааг. Үдэшэ болотор тэдэнэр үшөөл бузарланхай зандаа ябахад. 9 Нүгэл хээгүй хэн нэгэн нурма үнэһыень суглуулаад, хотон хүреэнһөө холо, сэбэр газарта абаашажа табиг. Улаан шарагшанай үнэһэниинь улад зондо үлэхэ. Хүниие сэбэрлэхэ ушарта, хүнэй нүгэл наманшалхада, улаан шарагшанай үнэһэн уһан соо хэгдэжэ, улад зондо хэрэглэгдэхэ. 10 Үргэл хэжэ дууһан шатааһан үнеэнэй үнэһэ нурмыень суглуулагша үмдэжэ ябаһан хубсаһаяа угааг, үдэшэ болотор тэрэ үшөөл бузарланхай зандаа ябаха. Энэ хэтэ мүнхын хуули. Израильшуудай, тэдээнтэй хамта ажаһуудаг ерүүл зоной хуули мүн.

Үхэгшэдэй бэедэ гар хүрэлгэ

11 Хэн үхэһэн хүнэй бэедэ гар хүрэнэб, тэрэ хүн долоон хоногто бузартай байха. 12 Гурбадахи үдэртөө тэрэ хүн арюудхадаг уһаар бэеэ угааг. Долоодохи үдэртөө тэрэ хүн арюудхадаг уһаар бэеэ угааг. Тиигээд тэрэ арюун сэбэр болохо. Тиигээгүй һаа, тэрэ хүн бузарлагдаһан зандаа үлэхэ. 13 Үхэһэн хүнэй бэе барижа бузартай болоһон хүн үнэһэтэй уһаар бэеэ сүршүүлэнгүй нангин майханда ороо һаа, нангин майханиие бузарлаха. Нангин майхан бузарлагшые намнажа үлдэгты арад зонһоонь. Ушар юуб гэхэдэ, тэрэ хүн бэеэ арюудхаагүй, бузарлагданхай зандаа ябана.

14 Энэ хадаа өөрынгөө майхан соо үхэһэн хэн нэгэн тухай хуули. Хэрбэеэ өөрынгөө майхан соо хэн нэгэнэй үхөө һаань, хамта тэрээнтэй байгшад долоон хоногто бузартай ябаха. 15 Домбонууд болон амһартанууд хабхаггүй байбал, бузарланхай байха. 16 Хэрбэеэ хээрэ һэлмээр сабшуулжа алуулһан хүндэ гү, али гэртээ наһа бараад, хуурсаг соо хэбтэгшын бэедэ, яһандань, хүүртэнь гар хүрэһэн хүн долоон хоног соо бузарланхай ябаха. 17 Тэрэниие дахин арюудхахын тула таанад нүгэл сагааруулгын үргэлдэ шатааһан шарагша үнеэнэй үнэһэ абаад, домбо соо хээд, урдажа байһан уһа дээрэһэнь эюулэгты, 18 Нүгэл хээгүй хэн нэгэн эссообой мүшэр абаг, тэрэ мүшэрөө арюудхадаг уһан соо хэг. Тиигээд тэрээгээрээ майхандань, тэрээн соо байһан амһартануудта болон хүнүүдтэ сүршэг, алуулагшын гү, үхэгшын гү яһанда, хуурсагта гар хүрэгшэдэ арюудхадаг уһанһаа сүршэн сасаг. 19 Бузарлаагүй хүн тэрэ уһаар сүршэжэ, бузарлагшые гурбадахи, долоодохи үдэрнүүдтэ иигэжэ арюудхаг. Тэрэ хүн долоодохи үдэрөөл сэбэр болохо. Тэрэ хүн нангин уһаар хубсаһаяа, бэеэ угааг. Тиихэдээ тэрэ хүн үдэшэ багта арюун сэбэр болохо. 20 Хэрбэеэ хэн нэгэн бузарлаад, нангин уһаар бэеэ арюудхангүй, нангин майханда ороо һаа, нангин майханда бузар халдааха. Бузараа арюудхаагүй хүниие израильшуудай дундаһаа үлдэжэ ябуулагты. Нангин уһаар сүршүүлээгүй һаа, тэрэ хүн наранай оротор бузарланхай зандаа ябаха.

21 Энэ хуулиие таанад хэтын хэтэдэ сахиха ёһотойт. Арюун уһаар сүршэгшэ хүн хубсаһаа угааха ёһотой. Арюудхадаг уһаар бэеэ сүршүүлэгшэ хүн бүхэн үдэшэ болотор бузарлагданхай ябаха. 22 Бузартай алибаа хүнэй бузарлаагүй хүндэ гар хүрэбэлнь, тэрэ хүн бузарлагдаха. Тэрээндэ гар хүрэгшэ нэгэн үдэшэ болотор бузарлагданхай ябаха.