‏ Numbers 20

Мириамай наһа баралга

1Нэгэдэхи һарада израильшууд Циин губида ерэжэ, Кадээшдэ тогтобо. Тэндэ Мириам наһа бараба. Тэрэниие тэндэнь хүдөөлүүлбэ.

Моисейн алдуу

2Ууха уһанай байхагүйдэ, улад зон Моисей Аһароон хоёрой урдаһаа үгэсэлдэжэ, 3иигэжэ Моисейдэ гэмэр гутар болобо:

– Бидэнэй аха дүүнэрэй Бурханай урда наһа барагшадал бидэнэр булта үхэхэеэ яагаабибди?! 4Юундэ бидэниие дахуулжа, эзэгүй хооһон губида асараабта? Али бидэниие үхэр малтаймнай хамта алаха гэжэ эндэ асараа гүт?! 5Бидэниие юундэ Египедһээ гаргажа, энэ муу газарта асараабта? Балгаха уһагүй энэ газарта инжир, уһан үзэм, анар модод, таряа талхан огто ургахагүйл!

6Моисей Аһароон хоёр арад зонһоо холодожо, майхан һүмын үүдэндэ ошоод, нюураараа газар дэрлэн унажа, Эзэндэ һүгэдэн зальбарба. Эзэнэй һаруул гэрэл бии болобо. 7Эзэн Моисейдэ иигэжэ айладаба:

8– Дулдыгаа абаарай, тиигээд Аһароон ахатаяа хамта арад зоноо суглуулаад, шулуун байсада дүтэлэ. Арад зоной хараһаар байтар дулдыгаараа шулуун байса тоншо. Шулуун байсаһаа уһанай урдахадань, ши арад зоноо үхэр малтайнь хамта ундалуулхаш.

9Эзэнэй захиралтаар Моисей Тэрэнэй урда табяатай дулды абаба. 10Моисей Аһароон хоёр арад зониие шулуун байсын дэргэдэ суглуулба. Моисей тэдээндэ иигэжэ хэлэбэ:

– Таанад саг үргэлжэ гэмэр гутар гэлдэнэт. Тиимэһээ анхаран бидэниие шагнагты! Дулдыгаар энэ байса тоншожо, таанадай ууха уһа эндэһээ гаргахамнай бэшэ аал?!

11Моисей гараа үргэжэ, тэрэ дулдыгаар байсын шулууе хоёр дахин тоншобо. Тэрэ шулуунһаа уһанай ехээр урдахада, тэндэ байһан хүнүүд болон үхэр мал уһа уужа, ундаа харяабад.

12Эзэн Моисей Аһароон хоёрто иигэжэ айладаба:

– Таанад Намайе хүндэлэнгүй, бүхы израильшуудтаа Минии арюун нангиниие харуулаагүйт, Намда этигэжэ ябадагаа гэршэлээгүйт. Энэ арадта найдуулагша газараа Би үгэхэб. Теэд таанад түрэл арадаа дахуулжа, тэрэ газартамни орохогүйт!

13Тэрэ газар Мэрибаагай уһан гэжэ нэрэтэй болобо. Тэрэ газарта израильшууд уһанай түлөө гэмэрэлдэн, Эзэнтэй арсалдаа үүсхээ. Тиихэдэнь Эзэн Өөрынгөө нангиниие тэдээндэ эндэ харуулаа бшуу.

Эдоомой хаан гараха зам Израильда үгэбэгүй

14Моисей Кадээшдэ ерээд, Эдоомой хаанда иигэжэ хэлэхыень хэдэн хүнүүдые эльгээбэ:

– Танай аха дүү болохо израильшууд танда хандана. Та бидэнэй зобоһон бүхы зоболонгуудые мэдэнэт. 15Үнгэрһэн олон жэлнүүдэй саана үбгэ эсэгэнэрэйнгээ Египедтэ ошоходонь, үни удаан тэндэ бидэнэр ажаһуужа, египет арадта харшалуулаабди. 16Бидэ Эзэнһээ туһа эреэбди. Бидэнэй гуйлтые Эзэн дуулаад, бидэндэ туһалхыень Эльгээмэлээ эльгээгээ, бидэниие Тэрэ Египедһээ гаргаа. Бидэнэр эндэ, Кадээштэ, ерээд, танай газарай хилэ дээрэ тогтоод байнабди. 17Танай газар дээгүүр бидэнэй ошохые бидэндэ зүбшөөгыт. Танай таряалан дээгүүр, үзэмэй сэсэрлиг соогууртнай ошохогүйбди, танай худагуудһаа уһа уухагүйбди. Танай орон нютаг үнгэртэрөө зүүлжээшье, баруулжаашье хадуурхагүйбди. Танай хан түрын гол харгыгаар ошохобди.

18Теэд эдоом зон тэрээндэ:

– Харьяата манай газар дээгүүр гарахагүйт. Хэрбэеэ таанадай ошохо гээ һаа, хатуу тулалдаанда һэлмэеэ барин гарахабди, – гэжэ хэлэбэ.

19Израильшууд тэдээндэ:

– Танай дардам харгыгаар ошохо гэнэбди. Танай худагһаа манай үхэр малай уһалаа, өөһэдөө бидэ уугаа һаа, таанадта бидэ түлбэри түлэхэбди. Танай газарые хүлөөрөө гаталжа гараха һанаатайбди, маанадта бэшэ юуншье хэрэггүйл, – гэжэ хэлээ бэлэй.

20Эдоомой хаан дахяад тэдээндэ иигэжэ харюусаба:

– Орон нютагайнгаа газар дээгүүр гараха зүбшөөл бидэ таанадта үгэнэгүйбди.

Эдоом хүсэтэй олон сэрэгшэдээ хүл дээрэнь суглуулжа, тулалдан байлдахыень израильшуудай урдаһаа эльгээбэ. 21Тиигэжэ Эдоомой хаан орон нютагайнгаа газар дээгүүр израильшуудай гарахыень буруушааба. Тиихэдэнь израильшууд тэдэнэй газарые тойроод ошохо баатай болобо.

Аһарооной наһа баралга

22Израильшууд Кадээшһээ гараад, Һоор хадада хүрэбэ. 23Эдоомой хилын хажуудахи Һоор хадада Эзэн Моисей Аһароон хоёрто иигэжэ айладаба:

24– Аһароон элинсэг хулинсагтаа ниилэг. Израильшуудта Минии найдуулһан тэрэ газарта Аһароон орохогүй. Мэрибаагай уһанай дэргэдэ айладагша Минии зарлигые та хоюулан дүүргэбэгүйт. 25Моисей, ши Аһароониие, тэрэнэй хүбүүн Эльазаарые абаад, Һоор хада дээрэ гарга. 26Аһарооной санаарта хубсаһа тайлаад, тэрэнэй хүбүүн Эльазаарта тэрэ хубсаһые үмдэхүүлэ. Тэндэ Аһароон наһа бараха.

27Моисей Эзэнэй зарлигые дүүргэжэ, бүхы израильшуудай хараһаар байтар Аһароон ба Эльазаартай хамта Һоор хадын оройдо гараба. 28Моисей Аһароонһоо санаартынь хубсаһа тайлаад, тэрэнэй хүбүүн Эльазаарта үмдэхүүлбэ. Тэндэ, хадын оройдо Аһароон наһа бараба. Моисей Эльазаар хоёр тэрэ хадаһаа буубад. 29Аһароон наһа бараа гэжэ израильшууд мэдэбэд. Тиигээд тэдэнэр Аһароониие шаналжа, гушан үдэр соо уйлалдан гашуудабад.