‏ Numbers 22

Балаһаам ба Моһаабай хаан

1Тиигээд израильшууд тэндэһээ гаража, Иорданай хажуудахи Моһаабай тэгшэ газар дээрэ тогтобо. Иорданай нүгөө бэедэнь Ерихоон байгаа.

2Циппоорой хүбүүн Балаак израильшуудай яагаад эмооршуудые үгы хэһыень дууһан хараа. 3Моһаабай бүхы зон тэдээнһээ угаа ехээр айжа байгаа. Юундэб гэхэдэ, Израилиин сэрэгшэдэй тоо тэдээнһээ һураггүй олон дээрэһээ тэдэ израильшуудһаа айхабтар ехээр һүрдэбэ. 4Моһаабайхид Мидианай аха захатанда иигэжэ хандаба:

– Мүнөө энэ үй түмэн зон нугын зүлгэ ногоое үрэбхин эдиһэн үхэр мал мэтээр бидэниие, мүн тойроод байһан хамаг бүхы юумыемнай үгы хэхэнь!

Тэрэ үе сагта Циппоорой хүбүүн Балаак Моһаабай хаан бэлэй. 5Тэрэ Евфрат мүрэнэй эрье дээрэхи Пэтоор хотодо ажаһуудаг Бэһоорой хүбүүн Балаһаамда, тэндэхи арадта иимэ захяатайгаар элшэн сайдаа эльгээбэ:

– Энэ арад Египедһээ ерэжэ, эндэхи бүхы газар дайдыемни бүрхөөбэ. Энэ арад минии хотон хүреэнүүдэй хажууда хотон хүреэнүүдээ табибад. 6Түргөөр ерэ намда, энэ арадые хараалай муу хараалаар тарнида. Ушар юуб гэхэдэ, энэ арад намһаа хүсэтэй. Хараалай муу хараалаар тарнидабалшни, би тэдэниие үгы хэхэ шадал оложо магад, энэ газарһаа үлдэжэ болохоб. Хэниие ши үреэнэш, тэрээндэ һайн, хэниие ши хараанаш, тэрээндэ муу байдаг гэжэ би мэдэнэб.

7Моһаабай болон Мидианай аха захатан эльбэ жэльбын түлөө түлбэри баряад, Балаһаамда ерэжэ, Балаагай захяа дуулгаба. 8Балаһаам тэдээндэ иигэжэ хэлэбэ:

– Таанад эндэ хоногты. Намда Эзэнэй юун гэжэ айладаһые би таанадта хэлэхэб.

Моһаабай болон Мидианай аха захатан тэндэ хонохоёо Балаһаамтай үлэбэд. 9Эзэн Балаһаамда үзэгдөөд:

– Шамда юун хүнүүд ерээб? – гэжэ асууба.

10Балаһаам Бурханда:

– Моһаабай хаан, Циппоорой хүбүүн Балаак намда эдэниие эльгээгээд, иигэжэ захяа: 11«Ямар бэ даа ондоо арад Египедһээ ерэжэ, эндэхи бүхы газар дайдыемни бүрхөөбэ. Ши намда ерээд, эльбэ жадхаараа тэдэниие тарнидажа үгыш, тиигэбэлшни би тэдээнтэй дайлалдаха, тэдэниие эндэһээ намнан үлдэхэ хүсэ шадалтай боложо магадби» гээ, – гэбэ.

12Бурхан Балаһаамда:

– Ши тэдээнтэй бү яба. Ши тэрэ арадые бү тарнида. Ушар юуб гэхэдэ, тэдэнэр Минии үреэлдэ хүртэнхэй, – гэжэ айладаба. 13Үглөөгүүр Балаһаам бодоод, Балаагай эльгээһэн тайжануудта иигэжэ хэлэбэ:

– Өөһэдынгөө газарта бусагты. Таанадтай ошохо зүбшөөл Эзэн намда үгэбэгүй.

14Моһаабай тайжанууд нютагаа бусажа, Балаагта ерээд, иигэжэ хэлэбэд:

– Балаһаам бидэнтэй ерэхэеэ арсаба.

15Балаак тэдээнһээ бүри ехэ нэрэ солотой, бүри олон тайжануудаа Балаһаамда эльгээбэ. 16Тэдэнэр Балаһаамда ерээд хэлэбэ:

– Циппоорой хүбүүн Балаак иигэжэ захяа: Ши намда ерэхэеэ бү арсыш даа. 17Хэрэгыемни шинии бүтээбэл, би шамда элбэг дэлбэг бэлэг барихаб. Ерыш даа, энэ арадые намда хараалай муу хараалаар тарнидажа үгыш.

18Балаһаам Балаагай тайжануудта:

– Алта мүнгөөр дүүрэн өөрын ордон Балаагай намда үгөөшье һаа, би өөрынгөө дураар багаханшье һайн гү, али багаханшье муу юумэ хэхын тула Эзэнэй, өөрынгөө Бурханай, зарлигта харша буруу юумэ хэжэ шадахагүйб. 19Гэбэшье таанад намтай эндэ хоногты. Энэ һүни намда юун гэжэ Эзэн айладанаб, би тэрэнииень таанадта хэлэхэб, – гэжэ харюусаба.

20Һүни Бурхан Балаһаамда үзэгдөөд, иигэжэ айладаба:

– Эдэ хүнүүдэй дахин шамайе гуйжа абаашаха гээ һаань, тэдээнтэй хамта ошолсо. Гэбэшье Минии шамда айладаашаар юумэ хээрэй.

Балаһаамай эмэ элжэгэн

21Үглөөгүүр Балаһаам бодоод, өөрынгөө эмэ элжэгые эмээллэжэ, Моһаабай тайжануудтай суг хамта ошолсобо. 22Балаһаамай тэдээнтэй ошоходонь, Бурхан сухалдажа, Эльгээмэлээ тэрээндэ эльгээбэ. Тэрэ Эльгээмэл Балаһаамай харгыень хаажа, сэхэ урдань зогсобо. Балаһаам өөрынгөө элжэгэн дээрэ һуунхай, тэрээнтэй суг хамта хоёр зарасань ябалсана.

23– 24Тэрэнэй элжэгэн хуйһаа һугалжа һэлмэеэ гартаа баряад, сэхэ урдань зогсоһон Эзэнэй Эльгээмэлые хараад, харгыһаа хажуу тээшээ гараба. Балаһаам элжэгэеэ сохижо, харгыда дахин оруулба. Тиигээд Эльгээмэл үзэм жэмэстэ модонуудай хоорондуур үнгэрөөд, хоёр талаһаа эгсэ ханатай, хажуу тээшээ гарахын аргагүй хадын харгын наридхада хүрэжэ ерэбэ. 25Тэрэнэй элжэгэн Эзэнэй Эльгээмэлэй урдань зогсохые хараад, сээжэ бэеэрээ Балаһаамай хүлые хабсагайда хашан тогтошобо. Балаһаам элжэгэеэ дахин сохижо, харгын тэгэн дунда оруулха гэжэ оролдобо.

26Эзэнэй Эльгээмэл тэрэнэй элжэгэнэй алхамшье хажуу тээшээ гарахын аргагүй бүри уйтан, бүри нарин газарта ошоод, харгыень хаажа урдань зогсобо. 27Элжэгэниинь Эзэнэй Эльгээмэлые хараад, харгы дээрэ хэбтэшэбэ. Балаһаам олиггүй ехээр сухалдажа, барижа ябаһан таягаараа элжэгэеэ нэрэ һурагүй сохижо мэдэбэ.

28Эзэн элжэгэнэйнь амые нээжэ, Балаһаамда хүнэй хэлээр иигэжэ хэлүүлбэ:

– Шамда ямар муу юумэ би хээбиб? Ши намайе юундэ гурба дахин сохибош?

29Балаһаам элжэгэндээ:

– Ши эдэнэртэ намайе тэнэглэбэ гэжэ харуулха гэбэ гүш? Намда мүнөө һэлмын байгаа һаа, би шамайе алаха һэм! – гэбэ. 30Элжэгэн Балаһаамда:

– Шинии элжэгэн би бэшэ юм гүб? Ши намайе энэ үдэр болотор унажа ябана бэшэ гүш? Урдань би иигэдэг һэн гүб? – гэбэ.

– Үгы, – гэжэ Балаһаам харюусаба.

31Эзэн Балаһаамай нюдыень нээбэ. Харгыень хаагаад, һэлмэеэ хуйһаань һугалжа гартаа баряад байһан Эзэнэй Эльгээмэлые хараад, Балаһаам доро дохижо, һүгэдэн унаба. 32Эзэнэй Эльгээмэл тэрээндэ:

– Ши юунэй түлөө гурба дахин элжэгэеэ сохибош? Шамда һаалта хэхэ гэжэ Би харгы замыешни хаагааб. Юундэб гэхэдэ, шинии хэрэг Намда һайшаагданагүй. 33Элжэгэншни Намайе хараад, Намһаа тэрьедэжэ, харгыһаа гурба дахин хадуураал! Хэрбэеэ Намһаа тэрэнэйш тэхэреэгүй һаа, шамайе Би алаха байгааб. Харин элжэгые амиды үлөөхэ байгааб! – гэжэ айладаба.

34Балаһаам Эзэнэй Эльгээмэлдэ:

– Би нүгэл хэбэб. Нарин харгы дээрэм зогсоходотнай, намда һаалта хэнэ гэжэ таниие огто би һанаагүйб. Буруушаагаа һаатнай, нютагаа тэхэрин бусаһуууб, – гэбэ. 35Эзэнэй Эльгээмэл Балаһаамда:

– Ши эдэнэртэй суг хамта ошолдо. Болгоомжолжо ябахые оролдо. Би шамда юун гэжэ айладанабиб, эгээл тэрэниием эдээндэ хэлэхэш, – гэжэ айладаба.

Балаһаам Балаагай эльгээһэн тайжануудтай суг хамта харгы замаа үргэлжэлүүлэн, саашаа ошобо. 36Балаак Балаһаамые ерэжэ ябана гэжэ дуулаад, тэрэниие угтажа, Арноон шадархи хилын хажууда байдаг Моһаабай хото руу ерэбэ. 37Балаак Балаһаамтай уулзаад:

– Шамайе дуудажа ерүүлхын тула шамда хүнүүдые би эльгээгээгүй аалби? Ши яаража намда юундэ ерээгүйбши? Шамда түлбэри түлэжэ шадахагүй гэжэ намайе һанаа гүш?! – гэжэ зэмэлбэ.

38Балаһаам Балаагта:

– Би мүнөө эндэб. Өөрөө би юу хэлэхэбиб даа? Шамда Эзэнэй дамжуула гэгшыень лэ үлөөн дутаангүйгөөр хэлэхэб, – гэжэ харюусаба.

39Балаһаам Балаагтай суг хамта Кирьяат-Хуцоот ошобо. 40Балаак бухануудые болон хонидые шарууһалаад, үргэлдэ үргэхэ хубияа Балаһаамда болон суг хамта ябаһан тайжануудта үгэбэ.

Балаһаам анха удаа абарагдаба

41Үглөө үглөөгүүрынь Балаак Балаһаамые дахуулаад, Бамоот-Бааһалда асарба. Тэндэһээ Балаһаам израильшуудай хотон хүреэнэй багахан хубиие обёорон хараба.