‏ Numbers 24

Балаһаам гурбадахияа абарагдана

1Балаһаам Эзэнэй Израилиие үреэхэеэ байхыень хараад, дүлгэ тэмдэгүүдые бэдэрэнгүй, урдынхидаал адли болонгүй, сүл губи тээшэ нюураараа эрьебэ. 2Тиихэдээ Балаһаам израильшуудай обог обогоороо жэрылдэн зогсоһые хараба. Бурханай Һүлдэ өөртэнь шэнгэжэ, 3тэрэ өөрынгөө һургаал үгүүлэлые иигэжэ айладаба:

– Бэһоорой хүбүүн Балаһаам хэлэнэб. Би тон һайнаар хаража байһан тухайгаа хэлэнэб. 4Би Бурханай айладахые дууланаб. Түгэс Хүсэтын үзэгдэлые харанаб. Хүтэлбэрилгэ доронь оронхойб, нюдэмни нээлтэтэй.

5Яков, шинии майхангууд, Израиль, шинии байранууд ямар һайханууд бэ! 6Тэдэ нэмжын һунаатай нюруу хүндынүүд мэтэ, горхоной эрье дээр тариһан сэсэрлиг мэтэ, Эзэнэй тариһан зуун наһата сэсэгүүд мэтэ, уһанай хажууда ургажа байһан гоё һайхан хушанууд мэтэ! 7Шинии үрэһэнүүдэй ургахын тула шамда уһан хододоо элбэг байха! Шинии хаан Агааг хааниие илаха, шинии хан түрэ агууехэ болохо. 8Тэрэ арадые Бурхан Египедһээ гаргаа, тэдээндэ зэрлиг бухын түргэн гүйдэл бии. Харша арадуудые залгижа, яһынь бутаргажа, годлинуудаараа бэеынь нэбтэ харбана. 9Израиль сахариглан хэбтэһэн арсалан мэтэ номгон! Тэрэ залуу арсалан мэтэл! Тэрэниие хэнэйшье һэрюулээгүй һаа, дээрэ! Тэрэниие үреэгшэ нэгэн үреэлдэ хүртэхэ, тэрэниие хараагша нэгэн хараалда хүртэхэл!

10Балаһаамда Балаак сухалдажа, гараа арбагануулан:

– Дайсадыемни эльбэдэн тарнидыш гэжэ дуудажа шамайе би эндэ ерүүлээб. Тиихэдэм ши тэдэниие гурбадахияа үреэжэ байнаш. 11Би шамда һайнаар түлбэри түлэхэб гэжэ хэлээ һэм. Бурхан шамайе тэрэ шагналһаам болюулаа! Арила эндэһээ өөрынгөө нютаг руу! – гэбэ.

12Балаһаам тэрээндэ:

– Ши намда элшэн сайдаа эльгээгээш. Шамда иимэ захяа хүргэгты гэжэ би тэдээндэш хэлээ һэм: 13«Дүүрэн алта мүнгэтэй ордон гэрээ Балаагай намда үгөөшье һаань, би Эзэнэй захиралта харгалзангүй, өөрөө мэдэжэ, һайн, муу юумэ хэжэ шадахагүйб. Бурханай намда айладаһан зарлигыел би шамда хэлэхэб». Шинии элшэдтэ иигэжэ минии хэлэһые мүнөө һанана гүш? 14Зай, мүнөө би өөрынгөө арадта бусахам. Гэбэшье ошохынгоо урда тээ би шамда ерээдүй сагта энэ арад түмэн шинии арадтай юу хэхыень уридшалан хэлэхэм, зүбшөөгыш.

Балаһаам һүүлшынхиеэ абарагдана

15Балаһаам өөрынгөө һургаал үгүүлэлые хэлэжэ эхилбэ:

– Бэһоорой хүбүүн Балаһаам хэлэнэб. Би тон һайнаар хаража байһан тухайгаа хэлэнэб. 16Би Бурханай айладахые дууланаб. Дээдэ Бурханай һанал мэдэнэб. Түгэс Хүсэтын үзэгдэлые харанаб. Хүтэлбэрилгэ доронь оронхойб, нюдэмни нээлтэтэй. 17Эзэн ерэхэ гэжэ харанаб, гэбэшье тон мүнөө бэшэ. Эзэн ерэхэ гэжэ харанаб, гэбэшье тон һаядаа бэшэ. Яковһаа одон толорон мандаха, Израильһаа засаг баригша бии болохо. Тэрэ засаг баригша Моһаабай тайжанарай толгой таһалха, Шээдэй үринэрые хюдаха. 18Израиль хүсэтэй болохо, Эдоомой газар тэрэ эзэмдэхэ, өөрынгөө дайсан Сэһиирэй газар эзэмдэхэ. 19Яковай үринэрэй нэгэн засаг баригша болохо, хотодо амиды үлэгшэдые хюдаха.

20Балаһаам амалээгүүдые хараад, иигэжэ өөрынгөө һургаал үгүүлбэ:

– Бүхы арадуудһаа амалээгүүд хүсэтэйшье һаа, баймга тэдэнэр булта хосорхо!

21Тиигээд Балаһаам хээншүүдые хараад, иигэжэ өөрынгөө һургаал үгүүлэлые хэлэбэ:

– Шубуунай ниидэдэг үндэртэ, годлиин хүрэшэгүй газарта орон нютагтайб гэжэ ши найдан этигэнэ гүш? 22Баряанда таанадые Ассириин абахадань, бултадаа таанад, хээншүүд, Бурханай Хаяаниие үгы хэгшэдэл булта хосорхот!

23Тиигээд Балаһаам саашань һургаал үгүүлэлээ үргэлжэлүүлэн, иигэжэ хэлэбэ:

– Ай, таанадтай Эзэнэй тулалдахада, таанадай хэн амиды үлэхэб даа?! 24Онгосонууд Киттиимһээ ерэхэ. Одоол тиихэдэнь Ассири болон Ээбэр диилдэжэ, булта хосорхо!

25Балаһаам бодоод, гэртээ хариба. Балаак өөрынгөө харгыгаар ошобо.