Num 25 | BxrBBL2024 | STEP | Израильшуудай Шиттиимдэ тогтон байрлажа, хотон хүреэнүүдээ табяад, тэндэ ажаһуужа байха үедэнь эрэшүүлынь Моһаабай басагадтай танилсажа, һальхай ябадал хэжэ эхилбэ.

‏ Numbers 25

Израильшууд Пэһоорто

1 Израильшуудай Шиттиимдэ тогтон байрлажа, хотон хүреэнүүдээ табяад, тэндэ ажаһуужа байха үедэнь эрэшүүлынь Моһаабай басагадтай танилсажа, һальхай ябадал хэжэ эхилбэ. 2 Моһааб басагад өөһэдынгөө бурхадта үргэл үргэхэдөө, Израилиин эрэшүүлые уриба. Израильшууд үргэлэй мяха эдижэ, тэдэнэй бурхадта мүргэбэ. 3 Израильшууд Пэһоорой Баалда шүтэн мүргэжэ эхилбэ. Тиихэдэнь тэдээндэ Эзэнэй уур сухал бусалба. 4 Эзэн Моисейдэ иигэжэ айладаба:

– Энэ арадай бүхы ударидагшадые баряад, улад зонойнь нюдэн доро, улаан наранай элшэн доро тэдэниие ала. Тиигээ һааш, Би, Эзэн, израильшуудта уурлахаяа болихоб.

5 Моисей Израилиин ударидагшадта ерээд, иигэжэ хэлэбэ:

– Таанад өөһэд өөһэдынгөө обог соо Пэһоорой Баалда шүтэгшэдые барижа алагты!

6 Бүхы ударидагшад болон Моисей майхан һүмын үүдэнэй дэргэдэ суглараад голхорон гашуудажа байгаа. Энэ үедэ израиль хүбүүдэй нэгэн мидиан басагые дахуулаад, өөрынгөө гэртэ оруулба. 7 Санаарта Аһарооной ашань, Эльазаарай хүбүүн Пинэһаас эдэ бүгэдые хараад, бусадһаа холодон, жадаяа гартаа баримсаараа, 8 израиль хүбүүнэй хойноһоо дахан ошожо, майхан соонь оромсоороо тэдэ хоёрые хадхажа алаба. Тэдэниие алахадань, тэрэ үедэ израильшуудай дунда дэлгэрэн тараһан үхэл тахал замхаба. 9 Тиимэ үхэл тахалһаа боложо, хамтадаа 24 000 хүн үхэһэн байгаа.

10 Эзэн Моисейдэ иигэжэ айладаба:

11 – Арад зонойш ондоо бурхадта бэшэ, харин гансал Намда шүтэдэг байхынь тула атаа жүтөөрхэлтэйгөөр Би Өөрынгөө арадта хандадагби. Санаарта Аһарооной ашань болохо, Эльазаарай хүбүүн Пинэһаас Минии жүтөөрхэлые арад зондоо мэдүүлжэ, Минии уур сухалһаа бүхы израильшуудые абарба. Тиимэһээ Би эндэ суглараад байһан таанадые хосороохогүйб, 12 эб найрамдал асарха хэлсээ Би тэрээнтэй баталнаб. Ши энээн тухай Пинэһааста хэлээрэй. 13 Баталһан хэлсээмни иимэ: тэрэнэй гэр бүлэ хододоо санаартад болохо. Ушар юуб гэхэдэ, тэрэ өөрынгөө Бурханда оролдосотойгоор хандажа, иимэ үйлэ хэрэг бүтээгээд, израильшуудай гэмые сагааруулаа.

14 Мидиан басагантай суг хамта алуулагша хүбүүн Симеоной обогой гэр бүлэнүүдэй, үенүүдэй ударидагша Салуугай хүбүүн Зимрии гэжэ нэрэтэй байгаа. 15 Харин алуулһан мидиан басаганай нэрэ Хозбии юм. Тэрэ мидиан эсэгын зоной обогуудай нэгыень толгойлогшо Цуурай басаган байгаа.

16 Эзэн Моисейдэ иигэжэ айладаба:

17 – Таанадай дайсад – мидианууд. Тэдэниие хюдан алагты. 18 Ушар юуб гэхэдэ, тэдэнэр мидиан ударидагшын нэгэ басагаар, Хозбии гэжэ нэрэтэй эхэнэрээр таанадай сэдьхэл дурыетнай обтуулан, хуурмаг бурхан Бааһал-Пэһоортоо шүтүүлэн мэхэлжэ, таанадай дунда үхэл тахал тараагаа. Тиигэжэ тэдэнэр таанадай дайсад болоо.