Num 28 | BxrBBL2024 | STEP | Эзэн Моисейтэй хөөрэлдэхэдөө, иигэжэ тэрээндэ айладаба:

‏ Numbers 28

Үдэр бүхэнэй үргэлнүүд

1 Эзэн Моисейтэй хөөрэлдэхэдөө, иигэжэ тэрээндэ айладаба:

2 – Израильшуудта иимэ захяа хэлэ: Намда һайшаагдаха талхан болон аятай һайхан хэншүү үнэртэ шатаалта үргэлнүүд Минии урда тодорхойлогдоһон сагтаа асарагдадаг байхын түлөө таанад харюусалгатайт.

3 Түгэс шатаалта үргэлдэ үдэр бүри эрэмдэг бэшэ хоёр түлгэн хурьга үргэжэ байгты. 4 Нэгэ түлгэн хурьгые үглөөгүүр, нүгөөдынь үдэшэлэн үргэжэ байгты. 5 Дүрбэнэй нэгэ хуби гиинэ оливын тоһотой эфаагай арбанай нэгэ хуби шэниисын гурил худхажа болгоһон талхан үргэлнүүдые үдэр бүхэндэ үргэгты. 6 Синай хада дээрэ саг үргэлжэ үргэдэг иимэ түгэс шатаалта үргэл Эзэндэ һайшаагдадаг аятай һайхан хэншүү үнэртэ үргэл мүн. 7 Нэгэ түлгэн хусатай хамта дүрбэнэй нэгэ хуби гиинэ үзэмэй дараһан архи асарагты. Нангин газарта Эзэнэй урда энэ үргэгдэхэ. 8 Хоёрдохи түлгэн хурьгаяа үдэшэлэн мүн лэ үглөөнэй шэнги тиимэ талхан, үзэмэй дараһан архи сэржэмтэйгээр үргэхэш. Энэ хадаа Эзэндэ таатай анхилма үнэр, Эзэндэ үргэгдэһэн бэлэг мүн.

Субботын үргэлнүүд

9 Субботодо эрэмдэггүй хоёр түлгэн хуса, оливын тоһонтой холёотой эфаагай арбанай хоёр хуби гурил, мүн үзэмэй дараһан архи асарагты. 10 Ходо үргэжэ байдаг түгэс шатаалта, үзэмэй дараһан архи үргэлнүүдһээ гадуур суббото бүхэндэ энэ түгэс шатаалта үргэл хэхэ хэрэгтэй.

Һара бүхэнэй үргэлнүүд

11 Шэнэ һарын эхиндэ тахилай шэрээ дээрэ түгэс шатаалта үргэлдэ иимэ үргэлнүүдые асарагты: эрэмдэггүй эбэртэ бодо малнуудһаа хоёр буруун буха, нэгэ хуса, долоон эрэ хурьга. 12 Буруун буха бүхэнтэй оливын тоһонтой холёотой эфаагай арбанай гурбан хуби шэниисын гурил, хусатай хамта үргэхэ үргэлдөө оливын тоһонтой холёотой эфаагай арбанай хоёр хуби шэниисын гурил асарха хэрэгтэй. 13 Түлгэн хуса бүхэндэ эфаагай арбанай нэгэ хуби шэниисын гурил оливын тоһонтой холёод асархат. Энэ түгэс шатаалта үргэл, аятай һайхан хэншүү үнэр Эзэндэ бэлэг болоно. 14 Үргэхэ буруун буха үргэлдөө хахад гиинэ үзэмэй дараһан архи, үргэхэ хуса үргэлдөө гурбанай нэгэ хуби гиинэ үзэмэй дараһан архи, тахилай эрэ хурьганда дүрбэнэй нэгэ хуби гиинэ үзэмэй дараһан архи асарагты. Энэ түгэс шатаалта үргэл – жэлдээ һара бүхэндэ үргэхэ үргэлнүүд. 15 Үдэр бүхэнэй түгэс шатаалта үргэлһөө гадуур сэржэм үргэхэ үзэмэй дараһан архитайгаар нэгэ тэхые нүгэл сагааруулгын үргэлдөө Эзэндэ асарагты.

Паасха

16 Түрүүшын һарын арбан дүрбэдэхи үдэртэ Эзэнэй Паасха юм. 17 Энэ һарын арбан табанай үдэр – эһээбэригүй талхаар болгоһон хилээмэн зүйлэй һайндэр юм. Долоон үдэр эһээбэригүй талхаар болгоһон хилээмэ эдигты. 18 Түрүүшын үдэр нангин суглаагаа үнгэргэгты, ямаршье ажал бү хэгты. 19 Эзэндэ бэлэг болгожо, ямаршье эрэмдэггүй иимэ мал – эбэртэ бодо малһаа хоёр буруун буха, бэеэ хүсэһэн нэгэ хуса, долоон эрэ хурьга түгэс шатаалта үргэл болгон тахигты. 20 Тэдэнэй хажууда иимэ үргэлнүүдые асарагты: буруун буха бүхэнэйнгөө үргэлдэ оливын тоһо холинхой эфаагай арбанай гурбан хуби гурил, бэеэ хүсэһэн нэгэ хуса үргэлдөө эфаагай арбанай хоёр хуби шэниисын гурил, 21 эрэ хурьган үргэлдэ эфаагай арбанай нэгэ хуби гурил, 22 нүгэл сагааруулгын үргэлдэ нэгэ тэхэ асарагты. 23 Эдэ бүгэдэ үргэлнүүдые үглөө бүхэндэ заабол үргэгдэдэг түгэс шатаалта үргэлнүүдтэ нэмээд үргэхэ зэргэтэй. 24 Хилээмэн үргэл, Эзэндэ уталгын үргэл долоон үдэр соо асарагты. Түгэс шатаалта үргэлһөө, үзэмэй дараһан архиһаа гадуур энээниие хэхэ ёһотойт. 25 Харин долоодохи үдэртөө нангин суглаагаа үнгэргэжэ, ямаршье ажал бү хэгты

Түрүүшын ургаса хуряалгын үдэр

26 Түрүүшын ургаса хуряалгын һайндэрэй үдэр шэнэ ургасаһаа Эзэндэ хилээмэн үргэл асарагты. Энэ үдэр нангин үргэл, мүргэл хэгты. Энэ үдэр ямаршье ажал бү хэгты. 27 Эзэндэ аятай һайхан хэншүү үнэр гаргахаяа эбэртэ бодо малһаа хоёр буруун буха, бэеэ хүсэһэн нэгэ хуса, долоон түлгэн хурьга түгэс шатаалта үргэлдэ асарагты, тэдэтнай эрэмдэг бэшэ байха ёһотой. 28 Тэдэнэй хажууда иимэ үргэлнүүдые асарагты: буруун буха бүхэнэйнгөө үргэлдэ оливын тоһо холинхой эфаагай арбанай гурбан хуби шэниисын гурил, бэеэ хүсэһэн нэгэ хуса үргэлдөө эфаагай арбанай хоёр хуби шэниисын гурил, 29 эрэ хурьган бүхэнэйнгөө үргэлдэ эфаагай арбанай нэгэ хуби шэниисын гурил. 30 Нүгэлөө сагааруулхын тула нэгэ тэхэ асарагты. 31 Үдэр бүхэнэй түгэс шатаалта болон талхан үргэлнүүдһээ гадуур ямаршье эрэмдэггүй малаар эдэ үргэлнүүдые үргэхэ хэрэгтэй.