Num 30 | BxrBBL2024 | STEP | Моисей израильшуудта Эзэнэй захяа заабаринуудые дамжуулжа хэлэбэ.

‏ Numbers 30

Эхэнэрэй шахаа тангариг тухай

1 Моисей израильшуудта Эзэнэй захяа заабаринуудые дамжуулжа хэлэбэ. 2 Израилиин обогуудай удамаршадта Моисей иигэжэ хэлэбэ:

– Эзэн иигэжэ захираа: 3 «Хэрбэеэ хэн нэгэн Эзэндэ тангариг үргэбэл, үгышье һаа, энэ-тэрэ юумэнһээ зайлан байхаб гэжэ үгэеэ үгэбэл, тэрэ хүн үгэеэ эбдэхэ ёһогүй.

4 Хэрбэеэ залуу эхэнэр үшөө эсэгынгээ гэртэ байхадаа Эзэндэ үгэеэ үгэжэ, энэ-тэрэ юумэнһээ зайлан байхаб гэжэ тангариглабал, 5 бүхы дашаа тангаригаа тэрэ бэелүүлхэ, найдуулһанаа сахиха ёһотой. Эсэгэнь тангаригыень мэдээд, басагандаа буруушааһан үгэ хэлээгүй һаань, тэрэ залуу эхэнэр найдуулһан юумэеэ бэелүүлэг. 6 Тангариг тухайнь эсэгэнь дуулаад, тэрээндэ зүбшөөлөө үгөөгүй һаань, тэрэ эхэнэр тангаригһаа сүлөө боложо, найдуулагшаяа бэелүүлэнгүй байхадань болохо. Ушар юуб гэхэдэ, эсэгэнь хоримжолоо, тиихэдэнь Эзэн тэрэниие хүлисэхэ.

7 Тэрэ басаган хадамда гаража, тангариг, найдуулгань тэрээнтэй байжа, 8 үбгэниинь тэрэ тангариг тухайнь мэдээд, үгэ дуугүй байбалнь, тангаригаа, үгэһэн үгэеэ тэрэ эхэнэр бэелүүлэг. 9 Тангариг тухайнь үбгэниинь мэдээд, тэрээндэ зүбшөөлөө үгөөгүй һаань, тэрэ эхэнэр тангариг үгэһөө сүлөөржэ, найдуулагшаяа бэелүүлэнгүй байхадань болохо. Ушар юуб гэхэдэ, үбгэниинь хоримжолоо. Тиихэдэнь Эзэн тэрэниие хүлисэхэ.

10 Хэрбэеэ бэлбэһэн гү, али нүхэрһөө һалаһан эхэнэр тангариглабал, бэелүүлэг тэрэ тангаригаа.

11 Хэрбэеэ хадамтай эхэнэр тангариглан, энэ-тэрэ юумэнһээ зайлан байха тухайгаа найдуулбал, 12 тангариг үгэлгэ тухайнь үбгэниинь мэдээд, юушье хэлээгүй, хорёогүй һаань, тэрэ эхэнэр тангаригаа бэелүүлжэ, найдуулан хэлэгшэеэ бүтээг. 13 Хэрбэеэ тангариг үгэлгэ тухайнь үбгэниинь дуулаад, хорижо зүбшөөлөө үгөөгүй һаань, тэрэ эхэнэр тангаригаа бэелүүлжэ шадахагүй. Хэрбэеэ тангаригтань үбгэнэйнь һаалта хээ һаань, Эзэн тэрэ эхэнэрые хүлисэхэ.

14 Эхэнэрэй масаглажа, али нэгэн тангариг, ямар нэгэн үүргэ, харюусалга өөртөө абахадань, үбгэниинь һамгандаа зүбшөөжэшье, хорижошье болохо.

15 Тангариг тухайнь үбгэниинь дуулаад, тэрэнээ бэелүүлхэдэнь һаалта хээгүй һаань, тэрэ эхэнэр найдуулагшаяа түгэс дүүрэн бэелүүлэг. 16 Һамганайнгаа тангаригууд тухай үбгэниинь дуулаад, буруушаабал, һамганайнь гэм зэмэ үбгэндэнь тохогдохо».

17 Үбгэн ба һамган тухай, эсэгэ ба эсэгынгээ гэртэ байһан залуу басаган тухай Моисейдэ Эзэнэй айладаһан хуули энэ юм.