Num 31 | BxrBBL2024 | STEP | Эзэн Моисейтэй хөөрэлдөөд, тэрээндэ иигэжэ айладаба:

‏ Numbers 31

Израиль мидиануудтай дайлалдаба

1 Эзэн Моисейтэй хөөрэлдөөд, тэрээндэ иигэжэ айладаба:

2 – Моисей, мидиануудһаа үһөөгөө аба. Тэрэнэй һүүлээр ши наһа барахаш.

3 Моисей израильшуудта хандан иигэжэ хэлэбэ:

– Эрэшүүлэй дундаһаа сэрэгшэдые шэлэгты. Эзэн таанадай сэрэгшэдээр мидиануудһаа үһөөгөө абахань. 4 Израилиин обог бүхэнһөө 1 000 сэрэгшые дайн дажарта эльгээхэ ёһотойбди.

5 Тиигэжэ Израилиин бүхы обогуудһаа 12 000 хүн сэрэгэй албанда татагдаба. 6 Моисейн 12 000 сэрэгшые дайлалдахыень эльгээхэдэ, тэдээнтэй хамта санаарта Эльазаарай хүбүүн Пинэһаас ошолдобо. Тэрэ дохёо үгэдэг бүреэнүүдые, нангин амһартануудые абаад ябаа.

7 Моисейдэ үгэһэн Эзэнэй захиралтаар израильшууд мидиануудтай дайлалдажа, тэдэнэй бүхы эрэшүүлыень алаба. 8 Тэдэнэй дунда мидиануудай табан хаашуул Эвии, Рээкэм, Хуур, Цуур болон Рээба гэгшэд алуулба. Мүн баһа эритэ һэлмээр сабшуулжа, Бэһоорой хүбүүн Балаһаам алуулба. 9 Израильшууд мидиан эхэнэрнүүдые, үхибүүдыень, үхэр малыень олзолон абаба. Тиигээд тэдэнэр мидиануудай газар дайда болон зөөри зөөшыень эзэмдээд, 10 бүхы хотонуудыень, бүхы тосхонуудыень шатаан галдаба. 11 Тэдэнэр бүхы мидиануудые, бүхы үхэр мал, зөөри зөөшыень суглуулжа, 12 Ерихоон тушаа сэхэ урдань, Иордан шадархи Моһаабай гол газарта байһан өөһэдынгөө хотон хүреэндэ, Моисейдэ, санаарта Эльазаарта, өөһэдынгөө арадта асарба.

13 Моисей, санаарта Эльазаар болон израильшуудай ударидагшад сэрэгшэдээ угтажа, өөһэдынгөө хотон хүреэнһөө гарабад. 14 Моисей дайнһаа бусажа ерэһэн мянганай болон зуунай дарганарта уурлан сухалдаад, тэдээндэ иигэжэ хэлэбэ:

15 – Юундэ таанад эхэнэрнүүдыень амиды үлөөгөөбта?! 16 Эдэ эхэнэрнүүд израиль эрэшүүлдэ гай тодхор асархал! Эзэндэ арад зомнай шүтэхөө болихол! Балаһаамай үедэ Пэһоорто бологшо үйлэ хэрэг дахинаа һэргэхэл! Эзэнэй арад дахяад үхэл тахалда добтолуулхал! 17 Энэ дары бүхы хүбүүдыень, эрэ эмын хурисал үзэһэн бүхы эмэгтэйшүүлыень алагты. 18 Эрэ эмын хурисал үшөө үзөөгүй эдир залуухан басагадыень өөһэдтөө үлөөгты. 19 Тиигэһэн хойноо тэдэниие алагшад, тэдэнэй үхэһэн бэедэ гар хүрэгшэд хотон хүреэнһөө гаража ошогты, хотон хүреэнһөө гадуур долоон үдэр байгты. Таанад болон олзо болоһон зон гурбадахи, мүн долоодохи үдэрнүүдтэ бэеэ арюудхахат. 20 Арһаар, ямаанай нооһоор оёһон алибаа бүхы хубсаһаяа, модоор хэһэн бүхы амһартаяа арюудхагты.

21 Санаарта Эльазаар дайнһаа бусаһан сэрэгшэдтэ иигэжэ хэлэбэ:

– Дайнһаа бусаһан сэрэгшэд тухай тогтоол хуулинуудые таанадта дамжуулан хэлэхыень Эзэн Моисейдэ иигэжэ захираа: 22 – 23 галда дүрэн шатахагүй алта мүнгэ, зэд ба түмэр, хара ба сагаан туулганууд мэтэ зүйлнүүдые гал соогуур гаргажа сэбэрлэгты, һүүлдэнь уһа сүршэн арюудхагты. Галда дүрэн шатаха юумэнүүдые уһаар угаажа арюудхагты. 24 Долоодохи үдэр бүхы хубсаһаа уһаар угаажа арюудхаад, бэеэ сэбэрлээд, өөрынгөө хотон хүреэндэ ороходотнай болохо.

25 Эзэн Моисейдэ иигэжэ айладаба:

26 – Хариин газарһаа эзэмдэн асарһан бүхы олзо зөөринүүдээ: хүнһөө эхилээд үхэр мал хүрэтэр бултыень ши, санаарта Эльазаар болон хүн зоноо ударидагшад бүридхэн тоологты. 27 Эдэ бүхы юумэ хахадлаад, дайнда хабаадалсаһан сэрэгшэдтэ, мүн эндэ үлэһэн арад зондо адли хубинуудые үгэгты. 28 Дайнда ябагшадай олзоһоо Эзэнэй хуби гэжэ иигэжэ илгагты: табан зуун олзо басагадһаа нэгые, табан зуун толгой эбэртэ бодо малһаа нэгэ үхэрые, табан зуун толгой элжэгэнүүдһээ нэгэ элжэгые, мүн табан зуун толгой хонинһоо нэгэ толгой хониие. 29 Энэ хадаа дайнай олзын сэрэгшэдэй хахадһаа Эзэндэ зорюулха хуби юм, санаарта Эльазаарта үргэхыень үгэ. 30 Арад зондоо хубаари болгожо, тэн хахадыень үгэһэн олзоһоо хүнүүдшье, үхэрнүүдшье, элжэгэнүүдшье, хонидшье байг хамаагүй, тэдэнэй табин толгойн нэгыень левидүүдтэ үгэ. Ушар юуб гэхэдэ, левидүүд Эзэнэй майхан һүмэдэ алба хэнэ ха юм.

31 Эзэнэй Моисейдэ айладаһан зарлигые Моисей ба санаарта Эльазаар бэелүүлэн дүүргэбэ. 32 Сэрэгшэд 675 000 толгой жэжэ бодо мал, 33 72 000 эбэртэ бодо мал, 34 61 000 толгой элжэгэ, 35 хурисал үшөө үзөөгүй 32 000 басагадые олзолон абаһан байба. 36 Дайнда ябаһан сэрэгшэд 337 500 толгой жэжэ бодо мал абабад, 37 тэдэнэйнгээ 675 толгойень Эзэндэ үргэбэд. 38 Сэрэгшэд 36 000 толгой эбэртэ бодо мал абабад, тэдэнэйнгээ 72 толгойе Эзэндэ үргэбэд. 39 Тэдэ 30 500 толгой элжэгэ абабад, тэдэнэйнгээ 61 толгой элжэгэ Эзэндэ бэлэглэбэд. 40 Сэрэгшэд эрэ эмын хурисал үшөө үзөөгүй 16 000 басагадые абабад, тэдэнэйнгээ 32 басагые Эзэндэ бэлэглэбэд. 41 Эзэнэй үгэһэн захиралтые дүүргэжэ, Моисей эдэ бүхы юумэнүүдые Эзэндэ үргэл хэжэ, санаарта Эльазаарта дамжуулан үгэбэ.

42 Сэрэгшэдэй олоһон бүхы олзын тэн хахадыень Моисей израильшуудта дамжуулаа. 43 Дайнда ябаагүй зон 337 500 толгой жэжэ бодо мал, 44 36 000 толгой эбэртэ бодо мал, 45 30 500 толгой элжэгэ, 46 16 000 басагадые абаба. 47 Моисей олзолон абтаһан тэдэ басагадай болон үхэр малай табин толгой бүхэнһөө нэгэ толгойень абаад, майхан һүмэдэ алба хэдэг левидүүдтэ үгэбэ, Эзэнэй захиралта дүүргэбэ.

48 Мянгатын болон зуутын дарганар Моисейдэ ерээд, 49 иигэжэ хэлэбэ:

– Бидэ, шинии зарасанууд, өөһэдынгөө сэрэгшэдые тоолообди, нэгэнииньшье алуулаагүй. 50 Эзэндэ бэлэг болгожо, бидэ алтаар хэһэн гарай боолтонуудые, бугаануудые, бэһэлигүүдые, һиихэнүүдые болон хүзүүнэй гоёолтонуудые сэрэгшэ бүхэнһөө асарбабди. Бидэнэй хэһэн нүгэл арюудхажа, эдэ бэлэгүүдые Эзэндэ үргэл болгоёл.

51 Моисей тэдээнһээ алтаар хэһэн гоёолто зүүдхэлнүүдые абаад, тэдэнээ санаарта Эльазаарта үгэбэ. 52 Мянгатын болон зуутын дарганарай дайсадһаа тоножо абаад, Эзэндэ үргэһэн алтан зүүдхэлнүүд арбан зургаан мянга долоон зуун табин шээкэл шэгнүүртэй болобо.

53 Дайсадһаа тоножо абаһан алтан зүүдхэлнүүдһээ сэрэгшэд хуулиин ёһоор хүртэхэ хубитаяа өөһэдтөө үлөөбэ. 54 Дайсадһаа олзолһон, мянгатын болон зуутын дарганарай асарһан алтан зүүдхэлнүүдые Моисей ба санаарта Эльазаар майхан һүмэ соо абаашажа табиба. Тэрэ болбол Эзэнэй урда Израилиин улад зоной үнэн сэхэ байһан тухай һануулга болоо бэлэй.