Num 35 | BxrBBL2024 | STEP | Моһаабдахи Иорданай нугада, Ерихооной сэхэ урдань урдадаг Иордан мүрэнэй хажууда Эзэн Моисейдэ иигэжэ айладаба:

‏ Numbers 35

Левидүүдэй хотонууд

1 Моһаабдахи Иорданай нугада, Ерихооной сэхэ урдань урдадаг Иордан мүрэнэй хажууда Эзэн Моисейдэ иигэжэ айладаба:

2 – Абаһан өөһэдынгөө хубаариин газарнуудһаа левидүүдэй амидарха хотонуудые, хотонуудые тойрон малай бэлшэхэ газар левидүүдтэ үгэгты гэжэ израильшуудта захира. 3 Тиихэдэ левидүүд ажаһууха хотонуудтай, малаа бэлшүүлхэ газартай байха. 4 Тэдэ хотонуудай хэрэм ханые тойроод, хэрэм ханаһаа мянган тохойһоо бага бэшэ газарта левидүүдэй малайнь бэлшээри нэмжыхэ ёһотой.

5 Хотын захаһаа зүүлжээ хоёр мянган тохой, хотын захаһаа урагшаа хоёр мянган тохой, хотын захаһаа баруулжаа хоёр мянган тохой, хотын захаһаа хойшоо хоёр мянган тохой газар хэмжэжэ тэдээндэ үгэгты. Тэдэнэй хото бүхы газарайнь тэгэн дунда байха ёһотой. Хотын дэргэдэхи бэлшээриин талмай иимэ хэмжүүртэй байха.

6 Тэдэ хотонуудай зургааниинь ами наһаяа абаржа хоргодохо хотонууд болог. Алууршад тэдэ хотонуудта бэеэ нюун хоргодог. Тэдэ хотонуудһаа гадуур үшөө дүшэн хоёр хото левидүүдтэ үгэгты. 7 Бүхыдөө дүшэн найман хото, мүн тэдэниие тойроод байһан бэлшээриин газар левидүүдтэ үгэгты. 8 Израилиин олон хүн зонтой обогуудһаа левидүүдтэ олон хото, үсөөн зонтой обогуудһаа үсөөн хото үгэгты. Левидүүдтэ үгэһэн хотонуудай тоо обог зоной тоодо тааралдуулан үгтэхэ зэргэтэй.

Хорохо хотонууд

9 Эзэн Моисейтэй хөөрэлдөөд, тэрээндэ иигэжэ айладаба:

10 – Израильшуудта соносхон, тэдээндэ иигэжэ хэлэ: таанад Иордан мүрэн гаталаад, Ханаһаанай газар дээрэ гарахадаа, 11 хорото һаналгүйгөөр хүниие алаад, хоргодожо ами наһаяа абарха гэһэн хүнүүдтэ хоргодолгын хотонуудые шэлэгты. 12 Хүн үһөөгөө абаха гэгшэдһээ тэрьедэн, ами наһаяа абаржа, ниитэ эмхиин шүүхын шиидхэбэриин гаратар тэндэ хоргодог. 13 Таанад хоргодолгын хотонуудые үгэхэ болонот. Тиимэ зургаан хото байха ёһотой. 14 Гурбан хото Иорданай энэ талада, гурбан хото Ханаһаанай газар дээрэ үгэгты. Үгэһэн тэдэ хотонуудтнай үһөө нэхэгшэдһээ хорохо хотонууд болохо. 15 Израильшуудай хэн нэгэн гү, тэдээнтэй хамта ажаһуудаг ерүүл зоной нэгэн гү, аяншадай нэгэн гү хорото һаналгүйгөөр хүниие алаад, тэдэ хотонуудай али нэгэндэнь хоргодожо болохо.

16 Хэрбэеэ хэн нэгэн хэнииешьеб түмэр зэбсэгээр сохижо алабал, тэрэ хүн алууршанда тоологдожо, толгойн саазада хүртэхэ ёһотой. 17 Хэрбэеэ хэн нэгэн хэнииешьеб шулуугаар шэдэжэ алабал, тэрэ шулууниинь хүниие аламаар томо байбалнь, тэрэ хүн алууршанда тоологдожо, толгойн саазада хүртэхэ ёһотой. 18 Хэрбэеэ хэн нэгэн хэнииешьеб модоор сохижо алабал, сохигшо модониинь хүниие аламаар томо байбалнь, тэрэ хүн алууршанда тоологдожо, толгойн саазада хүртэхэ ёһотой. 19 Шуһанай түлөө үһөө нэхэгшэ нэгэн алууршаниие намнан барижа хамаагүй алахадань болохо.

20 – 21 Хэрбэеэ хэн нэгэн хэнииешьеб үзэн ядахадаа зорюута түлхижэ гү, али зорюута юумэ шэдэжэ алабалнь, иимэ хүн алууршанда тоологдохо, өөрөө алуулха ёһотой. Үһөөгөө нэхэгшэд намнажа тэрэниие баряад алахадань болохо. 22 Алуур хэхэмни гэжэ ойлгонгүй, алагшаяа тэрэнэй түлхиһэн гү, али юумэ шэдэһэн байбалнь, 23 тудахаб гэжэ һанангүй, шулуу тэрэнэй унагааһан байбалнь, урдань дайсад байгаагүй, муу юумэ хүсөөгүй, 24 тиигэбэлнь, зоной ниитэ эмхи алууршан ба үһөө нэхэгшэ хоёрой хоорондохи асуудал шиидхэг. 25 Алууршаниие ниитэ эмхи аршалбал, хоргодолгын хотодо тэрэниие һөөргэнь абаашаг. Нангин тоһо түрхюулһэн ахамад санаартын наһа баратар алууршан тэндэ ажаһууг. 26 Алууршан хорожо байгаа хотоһоо гарабал, 27 үһөөгөө нэхэгшэтэй уулзаад, алуулбал, тэрэниие алагша хүн харюусалгада татагдахагүй. 28 Ойлгомторгүйгөөр хэн нэгые алагша ахамад санаартын наһа баратар тэрэ хорохо хотонуудай али нэгэндэнь ажаһууха, ахамад санаартын наһа барахада, нютагаа бусаха ёһотой байгаа. 29 Таанадай хаанашье ажаһуухада, бүхы обог, урагуудаартнай энэ хуули гурим оршохонь болтогой!

30 Гэршэнэрэй байбал, алууршан гэмтэ ябадал хэһэнэйнгээ түлөө толгойн саазада хүртэхэ ёһотой. Гэбэшье ори ганса гэршэ байха ёһогүй. 31 Үнэхөөрөө тэрэнэй алууршан байбал, тэрээндэ толгойн сааза хүртүүлэгты. Алууршын ами наһанай түлөө эдилгэ мүнгэ абажа болохогүй. 32 Хэнииешьеб хэн нэгэн алаад, хоргодолгын хотонуудай нэгэндэ гүйжэ ерэбэлнь, гэртээ бусажа амидархыень зүбшөөхын тула эдилгэ мүнгэ бү абагты. Тэрэ хүн ахамад санаартын наһа баратар хорохо хотодо ажаһууха ёһотой. 33 Газараа таанад бү бузарлагты. Юуб гэхэдэ, зоной шуһа урдахуулха гээшэ газар бузарладаг. Газар арюудхаха гэбэл, хүнэй шуһа урдахуулһан нэгэнэй өөрынь шуһа урдахуулхаһаа ондоо арга байхагүй. 34 Би Эзэмби! Би таанадай газар дээрэ, израильшуудай дунда оршоноб. Тиимэһээ таанад газараа бү бузарлагты!